Psalms 100

መዝሙር ፡ ዘዳዊት ።
ምሕረተ ፡ ወፍትሕ ፡ አኀሊ ፡ ለከ ።
እዜምር ፡ ወእሌቡ ፡ ፍኖተ ፡ ንጹሕ ፤
ማእዜ ፡ ትመጽእ ፡ ኀቤየ ።
ወአሐውር ፡ በየዋሃተ ፡ ልብየ ፡ በማእከለ ፡ ቤትየ ።
ወኢረሰይኩ ፡ ቅድመ ፡ አዕይንትየ ፡ ግብረ ፡ እኩየ ፤
ጸላእኩ ፡ ገበርተ ፡ ዐመፃ ፡
ወኢተለወኒ ፡ ልብ ፡ ጠዋይ ።
ሶበ ፡ ተግሕሠ ፡ እኩይ ፡ እምኔየ ፡ ኢያእመርኩ ።
ዘየሐሚ ፡ ቢጾ ፡ በጽሚት ፡ ኪያሁ ፡ ሰደድኩ ፤
ዕቡየ ፡ ዐይን ፡ ወሥሡዐ ፡ ልብ ፡ ኢይትሀወል ፡ ምስሌየ ።
አዕይንትየሰ ፡ ኀበ ፡ መሀይምናነ ፡ ምድር ፡
ከመ ፡ ኣንብሮሙ ፡ ምስሌየ ፤
ዘየሐውር ፡ በፍኖት ፡ ንጹሕ ፡ ውእቱ ፡ ይትለአከኒ ።
ወኢይነብር ፡ ማእከለ ፡ ቤትየ ፡ ዘይገብር ፡ ትዕቢተ ፤
ወኢያረትዕ ፡ ቅድሜየ ፡ ዘይነብብ ፡ ዐመፃ ።
በጽባሕ ፡ እቀትሎሙ ፡ ለኵሎሙ ፡ ኃጥኣነ ፡ ምድር ፤
ከመ ፡ እሠርዎሙ ፡ እምሀገረ ፡ እግዚአብሔር ፡ ለኵሎሙ ፡ ገበርተ ፡ ዐመፃ ።
Copyright information for Geez