Psalms 146

ሀሌሉያ ።
ሰብሕዎ ፡ ለእግዚአብሔር ፡ እስመ ፡ ሠናይ ፡ መዝሙር ፤
ወለአምላክነ ፡ ሐዋዝ ፡ ሰብሖ ።
የሐንጻ ፡ እግዚአብሔር ፡ ለኢየሩሳሌም ፤
ወያስተጋብእ ፡ ዝርወቶሙ ፡ ለእስራኤል ።
ዘይፌውሶሙ ፡ ለቍሱላነ ፡ ልብ ፤
ወይፀምም ፡ ሎሙ ፡ ቍስሎሙ ።
ዘይኌልቆሙ ፡ ለከዋክብት ፡ በምልኦሙ ፤
ወይጼውዖሙ ፡ ለኵሎሙ ፡ በበአስማቲሆሙ ።
ዐቢይ ፡ እግዚአብሔር ፡ ወዐቢይ ፡ ኀይሉ ፤
ወአልቦ ፡ ኍልቆ ፡ ጥበቢሁ ።
ያነሥኦሙ ፡ እግዚአብሔር ፡ ለየዋሃን ፤
ወያኀስሮሙ ፡ ለኃጥኣን ፡ እስከ ፡ ምድር ።
ሰብሕዎ ፡ ለእግዚአብሔር ፡ በአሚን ፤
ወዘምሩ ፡ ለአምላክነ ፡ በመሰንቆ ።
ዘይገለብቦ ፡ ለሰማይ ፡ በደመና ፡
ወያስተዴሉ ፡ ክረምተ ፡ ለምድር ፤
ዘያበቍል ፡ ሣዕረ ፡ ውስተ ፡ አድባር ፡
ወኀመልማል ፡ ለቅኔ ፡ እጓለ ፡ እመሕያው ።
10 ዘይሁቦሙ ፡ ሲሳዮሙ ፡ ለእንስሳ ፤
ወለእጕለ ፡ ቋዓት ፡ እለ ፡ ይጼውዕዎ ።
ኢይፈቅድ ፡ ኀይለ ፡ ፈረስ ፤
ወኢይሠምር ፡ በአቍያጸ ፡ ብእሲ ።
ይሠምር ፡ እግዚአብሔር ፡ በእለ ፡ ይፈርህዎ ፤
ወበኵሎሙ ፡ እለ ፡ ይትዌከሉ ፡ በምሕረቱ ።
Copyright information for Geez