Psalms 4

ፍጻሜ ፡ ዘአኩቴት ፤ መዝሙር ፡
ዘዳዊት ።
ሶበ ፡ ጸዋዕክዎ ፡ ለእግዚአብሔር፡ ሰምዐኒ ፡ ጽድቅየ ፡
ወእምንዳቤየ ፡ አርሐበ ፡ ሊተ ።
ተሥሀለኒ ፡ ወስምዐኒ ፡ ጸሎትየ ።
ደቂቀ ፡ እጓለ ፡ እመሕያው ፡ እስከ ፡ ማእዜኑ ፡ ታከብዱ ፡ ልብክሙ ፡
ለምንት ፡ ታፈቅሩ ፡ ከንቶ ፡ ወተኀሡ ፡ ሐሰተ ።
ኣእምሩ ፡ ከመ ፡ ተሰብሐ ፡ እግዚአብሔር ፡ በጻድቁ ፤
እግዚአብሔር፡ ይሰምዐኒ ፡ ሶበ ፡ ጸራኅኩ ፡ ኀቤሁ ።
ተምዑ ፡ ወኢተአብሱ ፤
ወዘትሔልዩ ፡ በልብክሙ ፡ ውስተ ፡ መስካቢክሙ ፡ ይትዐወቀክሙ ።
ሡዑ ፡ መሥዋዕተ ፡ ጽድቅ ፡ ወተወከሉ ፡ ለእግዚአብሔር ።
ብዙኃን ፡ እለ ፡ ይቤሉ ፡ መኑ ፡ ያርእየነ ፡ ሠናይቶ ፤
ተዐውቀ ፡ በላዕሌነ ፡ ብርሃነ ፡ ገጽከ ፡ እግዚኦ ።
ወወደይከ ፡ ትፍሥሕተ ፡ ውስተ ፡ ልብነ ፤
እምፍሬ ፡ ስርናይ ፡ ወወይን ፡ ወቅብእ ፡ በዝኃ ።
በሰላም ፡ ቦቱ ፡ እሰክብ ፡ ወእነውም ።
እስመ ፡ እንተ ፡ እግዚኦ ፡ በተስፋ ፡ ባሕቲትከ ፡ ኣኅደርከኒ ።
Copyright information for Geez