Psalms 46

ፍጻሜ ፡ ዘበእንተ ፡ ውሉደ ፡ ቆሬ ፡ መዝሙር ።
ኵልክሙ ፡ አሕዛብ ፡ ጥፍሑ ፡ እደዊክሙ ፤
ወየብቡ ፡ ለእግዚአብሔር ፡ በቃለ ፡ ትፍሥሕት ።
እስመ ፡ ልዑል ፡ ወግሩም ፡ እግዚአብሔር ፤
ወንጉሥ ፡ ዐቢይ ፡ ውእቱ ፡ ዲበ ፡ ኵሉ ፡ ምድር ።
አግረረ ፡ ለነ ፡ አሕዛብ ፡ ወሕዘበ ፡ ታሕተ ፡ እገሪነ ፡
ወኀረየነ ፡ ሎቱ ፡ ለርስቱ ፤
ሥኖ ፡ ለያዕቆብ ፡ ዘአፍቀረ ።
ዐርገ ፡ እግዚአብሔር ፡ በይባቤ ፤
ወእግዚእነ ፡ በቃለ ፡ ቀርን ።
ዘምሩ ፡ ለአምላክነ ፡ ዘምሩ ፤ ዘምሩ ፡ ለንጉሥነ ፡ ዘምሩ ።
እስመ ፡ ንጉሥ ፡ እግዚአብሔር ፡ ለኵሉ ፡ ምድር ፡
ዘምሩ ፡ ልብወ ።
ነግሠ ፡ እግዚአብሔር ፡ ላዕለ ፡ ኵሉ ፡ አሕዛብ ፤
እግዚአብሔርሰ ፡ ይነብር ፡ ዲበ ፡ መንበሩ ፡ ቅዱስ ።
መላእክተ ፡ አሕዛብ ፡ ተጋብኡ ፡ ምስለ ፡ አምላከ ፡ አብርሃም ፤
እስመ ፡ ለእግዚአብሔር ፡ ጽኑዓነ ፡ ምድር ፡ ፈድፋደ ፡ ተለዐሉ ።
Copyright information for Geez