Psalms 95

ዘአመ ፡ ተሐንጸ ፡ ቤት ፡ ዘእምድኅረ ፡ ፂዋዌ ፤
ማኅሌት ፡ ዘዳዊት ።
ሰብሕዎ ፡ ለእግዚአብሔር ፡ ስብሐተ ፡ ሐዲሰ ፤
ሰብሕዎ ፡ ለእግዚአብሔር ፡ ኵላ ፡ ምድር ።
ሰብሕዎ ፡ ለእግዚአብሔር ፡ ወባርኩ ፡ ለስሙ ፤
ወተዘያነዉ ፡ እምዕለት ፡ ዕለተ ፡ አድኅኖቶ ።
ወንግርዎሙ ፡ ለአሕዛብ ፡ ስብሐቲሁ ፤
ወለኵሎሙ ፡ አሕዛብ ፡ ተኣምሪሁ ።
እስመ ፡ ዐቢይ ፡ እግዚአብሔር ፡ ወብዙኅ ፡ አኰቴቱ ፤
ወግሩም ፡ ውእቱ ፡ ላዕለ ፡ ኵሉ ፡ አማልክት ።
እስመ ፡ አማልክተ ፡ አሕዛብ ፡ አጋንንት ፤
ወእግዚአብሔርሰ ፡ ሰማያተ ፡ ገብረ ።
አሚን ፡ ወሠናይት ፡ ቅድሜሁ ፤
ቅድሳት ፡ ወዕበየ ፡ ስብሐት ፡ ውስተ ፡ መቅደሱ ።
አምጽኡ ፡ ለእግዚአብሔር ፡ በሓውርተ ፡ አሕዛብ ፤
አምጽኡ ፡ ለእግዚአብሔር ፡ ክብረ ፡ ወስብሓተ ።
አምጽኡ ፡ ለእግዚአብሔር ፡ ስብሐተ ፡ ለስሙ ፤
ንሥኡ ፡ መሥዋዕተ ፡ ወባኡ ፡ ውስተ ፡ አዕጻዲሁ ።
ስግዱ ፡ ለእግዚአብሔር ፡ በዐጸደ ፡ መቅደሱ ፤
ታድለቀልቅ ፡ እምቅድመ ፡ ገጹ ፡ ኵላ ፡ ምድር ።
በልዎሙ ፡ ለኣሕዛብ ፡ ከመ ፡ እግዚአብሔር ፡ ነግሠ ፡
10 ወአጽንዓ ፡ ለዓለም ፡ ከመ ፡ ኢታንቀልቅል ፤
ወይኴንኖሙ ፡ ለአሕዛብ ፡ በርትዕ ።
11 ይትፌሥሓ ፡ ሰማያት ፡ ወትትሐሠይ ፡ ምድር ፤
ወትትከወስ ፡ ባሕር ፡ በምልኣ ።
ትትሐሠይ ፡ ገዳም ፡ ወኵሉ ፡ ዘውስቴታ ፤
ውእቱ ፡ አሚረ ፡ ይትፌሥሑ ፡ ኵሉ ፡ ዕፀወ ፡ ገዳም ።
እምቅድመ ፡ ገጹ ፡ ለእግዚአብሔር ፡ እስመ ፡ ይመጽእ ፡
ወይመጽእ ፡ ወይኴንና ፡ ለምድር ፤
ወይኴንና ፡ ለዓለም ፡ በጽድቅ ፡
ወለአሕዛብኒ ፡ በርትዕ ።
Copyright information for Geez