1 Chronicles 15

Taravatu Maua be Ierusalema dekenai idia mailaia

Davida ese ruma haida ia haginia ia sibona ena, Davida ena Hanua dekenai. Davida ese danu Dirava ena Taravatu Maua ena gabu ia karaia hegaegae, bona ena Palai Dubu danu ia haginia. Bona Davida ia gwau, “Tau ta ese Dirava ena Taravatu Maua do ia huaia lasi, to Levi taudia sibona. Badina be Lohiabada ese Levi taudia ia abia hidi vadaeni, Lohiabada ena Taravatu Maua do idia huaia, bona iena hesiai gaukara do idia karaia ela bona nega ibounai.”

Vadaeni Davida ese Israela taudia ibounai ia haboua Ierusalema dekenai, Lohiabada ena Taravatu Maua be ena gabu, ia karaia hegaegae gabuna dekenai do idia atoa totona.

Davida ese Arona ena bese taudia bona Levi taudia ia haboua, inai bamona: Kohata besena dekena amo: Uriele, lohia tauna, mai ena varavara taudia 120. Merari besena dekena amo: Asaia, lohia tauna, mai ena varavara taudia 220. Geresone besena dekena amo: Ioela, lohia tauna, mai ena varavara taudia 130. Elisapana besena dekena amo: Semaia, lohia tauna, mai ena varavara taudia 200. Heberona besena dekena amo: Eliele, lohia tauna, mai ena varavara taudia 80. 10 Usiele besena dekena amo: Aminadaba, lohia tauna, mai ena varavara taudia 112.

11 Ma Davida ese hahelagaia tauna Sadoka bona Abiatara, bona Levi taudia Uriele, Asaia, Ioela, Semaia, Eliele, bona Aminadaba ia boiria mai, 12 ia hamaoroa, ia gwau, “Umui be Levi taudia edia iduhu gunalaia taudia. Umui sibona do umui hagoevaia, umui bona emui varavara taudia do umui helaga, Lohiabada, Israela ena Dirava ena Taravatu Maua be idia karaia hegaegae gabuna dekenai do umui atoa totona. 13 Umui Levi taudia ese nega gunana dekenai Taravatu Maua umui huaia lasi dainai, Lohiabada iseda Dirava ese ita ia dagedage henia. Inai dika ita davaria badina Dirava ena ura dalana ita tahua guna lasi.”

14 Unai dainai hahelagaia taudia bona Levi taudia ese idia sibona idia hahelagaia, Lohiabada, Israela ena Dirava ena Taravatu Maua be Ierusalema dekenai do idia abia lao totona. 15 Vadaeni Levi taudia ese Dirava ena Taravatu Maua mai ena huaia audia be edia pagadia dekenai idia huaia, Mose ese Lohiabada ena hereva dekena amo ia gwauraia dalana hegeregerena.

16 Davida ese danu Levi lohia taudia ia oda henia, edia varavara haida do idia abia hidi, ane do idia abia, bona muisiki gaudia idauidau, gita maragidia bona badadia, bona auri laboralabora botaia gaudia do idia gadaralaia dekena amo moale bada ena regena do idia karaia. 17 Unai dainai Levi taudia ese Hemana Ioela idia abia hidi. Ma Hemana ena varavara taudia dekena amo Asapa Berekaia idia abia hidi. Ma edia varavara taudia Merari iduhu dekena amo Etana Kusaia danu idia abia hidi. 18 Bona idia danu be ma varavara haida idia abia hidi, orea iharuana totona, edia ladana be Sekaraia, Iasiele, Semiramoto, Iehiele, Uni, Eliaba, Benaia, Maseaia, Matitaia, Elipelehu, bona Mikineia, bona magu iduara gimaia taudia, Obeda Edoma bona Ieiele.

19 Ane abia taudia Hemana bona Asapa bona Etana ese auri laboralabora botaia gaudia do idia botaia. 20 Sekaraia, Iasiele, Semiramoto, Iehiele, Uni, Eliaba, Maseaia bona Benaia ese gita badadia do idia gadaralaia, alamota gadara dalana dekenai. 21 Bona Matitaia, Elipelehu, Mikineia, Obeda Edoma, Ieiele bona Asasaia ese gita maragidia do idia gadaralaia, seminiti gadara dalana dekenai.

22 Kenanaia, Levi taudia edia ane abia gunalaia tauna, ese ane do ia hakaua, badina be ane idauidau ia diba momo. 23 Berekaia bona Elikana ese Taravatu Maua gimaia gaukara do idia karaia.

24 Hahelagaia taudia Sebanaia, Iosepata, Netanele, Amasai, Sekaraia, Benaia, bona Eliesere ese kibi do idia hiriria, Dirava ena Taravatu Maua ena vairana dekenai. Obeda Edoma bona Iehaia danu be Taravatu Maua gimaia gaukara do idia karaia.

Taravatu Maua be Ierusalema dekenai idia abia lao

25 Unai dainai Davida, bona Israela ena gunalaia taudia, bona ena tuari biagudia, be Obeda Edoma ena ruma dekenai idia lao, Lohiabada ena Taravatu Maua do idia abia totona, bona mai moale danu idia karaia.

26 Bona Dirava ese Levi taudia, iena Taravatu Maua idia huaia taudia ia durua dainai, idia ese boromakau tau 7 bona mamoe tau 7 idia abia, boubou gaudia idia halaoa.

27 Davida be dabua latana namo herea ia karaia, bona ane abia taudia, bona Kenanaia, ane abia gunalaia tauna, danu ese dabua unai bamona idia karaia. Davida danu be dabua aukana dekenai idia karaia epodi, dabua helagana, ia karaia. 28 Unai bamona, Israela taudia ibounai ese Lohiabada ena Taravatu Maua idia abia mailaia, mai moale ena boiboi, bona mai kibi idauidau, bona botaia gaudia edia regena danu, bona gita badadia bona maragidia edia regena namona danu.

29 Lohiabada ena Taravatu Maua be Davida ena Hanua dekenai ia ginidae neganai, Mikala, Saulo ena natuna hahine, be uindo dekena amo iena matana ia negea, bona ia ese king Davida ia itaia. Davida be ia mavaru noho, ma ia roho daekau, roho daekau noho, mai moale danu. Mikala ese ia itaia neganai, ia ese Davida dekenai ia badu, iena lalona sibona dekenai ia ura henia lasi.

Copyright information for `HMO