1 Chronicles 20

Davida ese Raba hanua ia halusia

Keru negana ia ore, to siahu neganai do ginidae lasi neganai, unai be king taudia tuari totona idia lao negana, Ioaba ese tuari orea ta ia hakaua, bona Amono taudia edia tano be tuari dekenai ia hadikaia. Vadaeni ma ia lao, Raba hanua ia koua hagegea. To Davida be Ierusalema dekenai ia noho.

Vadaeni Ioaba ese Raba ia tuari henia, bona ia halusia.
Davida ese Amono ena king ena kwara gauna be iena kwarana dekena amo ia kokia, ia be golo ena metau 35 kilogaram bamona. Unai golo ena lalonai be herahera nadi namo hereana ta. Vadaeni Davida ena kwarana dekenai idia atoa. Davida ese danu kohu momo herea Raba hanua dekena amo ia abia lao.

Davida ese danu Raba hanua taudia ia abia lao, gaukara idia dekenai ia henia, iri bona auri piki bona ira dekena amo do idia gaukara. Amono hanua ibounai edia taudia dekenai unai bamona gaukara ia henidia.

Vadaeni Davida bona iena tuari taudia be Ierusalema dekenai idia giroa lou.

Davida ena orea taudia ese Pilistia tau latadia idia tuari henia

Unai murinai idia be Pilistia taudia danu idia tuari lou, Gesere dekenai. Vadaeni Davida ena orea tauna ta, ena ladana Sibekai, Husata hanua tauna ese Sipai, tau lata herea, ia alaia mase. Vadaeni Pilistia taudia be unai neganai tuari idia lusi.

Bona Pilistia taudia danu ma idia tuari lou. Unai neganai Elihanana Iairi ese Lahami, Gata tauna Goliata ena tadikakana, ia alaia mase. Unai Lahami ena io auauna ena bada, be dabua hatua tauna ena au, ena bada bamona.

Ma Gata hanua dekenai idia tuari lou, bona unuseni be tau lata herea, iena imana ruaosi dekenai kwakikwaki 6 bona 6 idia noho, bona iena aena ruaosi dekenai danu be kwakikwaki 6 bona 6 idia noho. Iena kwakikwaki ibounai be 24. Ia danu be Repaima bese tauna, tau lata herea. Unai tau ese Israela taudia ia kirikirilaia, mai hekokoroku danu, vadaeni Ionatana, Davida ena kakana Simea ena natuna tau ese ia alaia mase.

Inai tau toiosi be Gata hanua dekenai idia noho tau latadia, Repaima bese taudia. To Davida bona iena tuari taudia ese inai taudia idia alaia mase.

Copyright information for `HMO