1 Chronicles 25

Ane abia taudia edia orea

King Davida bona Levi gunalaia taudia ese Levi iduhu haida idia abia hidi, miusiki dekenai Dirava ena peroveta hereva do idia gwauraia hedinarai totona, gita badadia bona maragidia bona tareko dekena amo. Idia gwauraia iduhu be inai: Asapa, Hemana, bona Iedutunu. Inai bamona tomadiho gaukara totona idia abia hidi taudia edia ladana, bona edia gaukara be inai:

Asapa ena natuna tau dekena amo:

Sakuru, Iosepa, Netanaia bona Asarela. Idia be Asapa ena natuna, bona Asapa ese idia ia biagua. Asapa ese Dirava ena hereva ia gwauraia, king ese ia oda henia negadia ibounai.

Iedutunu ena natuna tau dekena amo:

Gedalaia, Seri, Iesaia, Simei, Hasabaia, bona Matitaia, ibounai be 6. Edia tamana ese idia ia gunalaia, bona idia ese Lohiabada hanamoa totona, Dirava ena hereva idia gwauraia hedinarai, mai ane abia, bona mai gita badadia edia regena namona danu.

Hemana ena natuna tau dekena amo:

Bukaia, Matanaia, Usiele, Sebuele, Ierimoto, Hananaia, Hanani, Eliata, Gidaloti, Romamati Esere, Iosobekasa, Maloti, Hotiri bona Mahasioto.

Unai ibounai be Hemana, king ena peroveta tauna, ena natuna. Dirava ese Hemana dekenai inai natuna tau 14 bona natuna kekeni 3 ia henia, iena gwauhamata hegeregerena, Hemana dekenai siahu do ia henia totona.
Inai tau ibounai be edia tamadia ese idia gunalaia, bona idia ese Lohiabada ena Dubu Helaga ena tomadiho totona miusiki idia karaia, gita badadia bona maragidia, bona tareko dekena amo. Inai gaukara be Asapa, Iedutunu bona Hemana ese idia karaia, king ena oda ibounai hegeregerena.

Inai tau ibounai 24 be miusiki diba momo taudia, bona edia varavara Levi taudia ibounai danu be Lohiabada ena ane abia dekenai idia manada vadaeni. Inai tau ibounai be 288.

Idia ibounai be laki idia gadara, ta ta edia gaukara, edia gaukara do idia abia totona. Maragidia bona badadia, diba tahua taudia bona hadibaia taudia, be maka tamona dekenai inai abia hidi gaukara idia karaia.

Inai tau ibounai 288 be edia bese hegeregerena orea 24 dekenai idia haridia. Orea ta ta be tau 12, bona inai orea ta ta be mai edia gunalaia tauna. Laki ese ia gwauraia edia orea ta ta gunalaia taudia, bona edia gaukara ena nega bona maka be inai:

1. Iosepa, Asapa ena bese tauna.
2. Gedalaia
3. Sakuru
4. Seri
5. Netanaia
6. Bukaia
7. Iesarela
8. Iesaia
9. Matanaia
10. Simei
11. Asarele
12. Hasabaia
13. Subaele
14. Matitaia
15. Ieremoto
16. Hananaia
17. Iosobekasa
18. Hanani
19. Maloti
20. Eliata
21. Hotiri
22. Gidaloti
23. Mahasioto
24. Romamati Esere.
Copyright information for `HMO