1 Chronicles 27

Israela basileia idia naria taudia

Israela taudia edia iduhu lohia taudia bona tuari orea edia biagudia, bona king ena hesiai gaukara idia karaia opesa taudia edia ladadia be inai. Tuari orea be 12, bona lagani ibounai lalonai, hua ta ta dekenai, orea ma ta ese basileia naria gaukara idia karaia, edia nega, edia nega dekenai. Tuari orea ta ta edia tuari taudia be 24,000.

Orea ginigunana, hua ginigunana dekenai ia gaukara oreana ena biaguna be Iasobeama Sabidiele. Iena orea taudia be ibounai 24,000. Ia be Perese ena bese tauna ta, bona ia ese tuari lohia ibounai ia biagua, hua ginigunana dekenai.

Hua iharuana dekenai ia gaukara orea ena biaguna be Dodai, Ahohi tauna. Mikiloto be iena iharuana. Dodai ena orea taudia be ibounai 24,000.

Hua ihatoina dekenai ia gaukara orea ena biaguna be Benaia, hahelagaia tauna Iehoiada ena natuna tau. Benaia ena orea taudia be ibounai 24,000. Inai Benaia be goada herea tauna ta. Ia be Davida ena “Tuari Taudia Goadadia 30” edia memba ta. Bona ia ese unai “30” ia gunalaia. Benaia ena natuna tau Amisabada ese iena orea ia gunalaia.

Hua namba 4 dekenai ia gaukara orea ena biaguna be Asahele, Ioaba ena tadina. Asahele ena natuna tau, Sebadaia ese inai orea ia gunalaia, iena tamana ena gabu dekenai. Asahele ena orea taudia ibounai be 24,000.

Hua namba 5 dekenai ia gaukara orea ena biaguna be Samahutu, Isiraha tauna. Samahutu ena orea taudia ibounai be 24,000.

Hua namba 6 dekenai ia gaukara orea ena biaguna be Ira, Ikese, Tekoa tauna ena natuna. Ira ena orea taudia ibounai be 24,000.

10 Hua namba 7 dekenai ia gaukara orea ena biaguna be Helese, Pelono tauna, Eparaima tano dekena amo. Helese ena orea taudia ibounai be 24,000.

11 Hua namba 8 dekenai ia gaukara orea ena biaguna be Sibikai, Husata tauna. Ia be Sera iduhu dekena amo. Sibikai ena orea taudia ibounai be 24,000.

12 Hua namba 9 dekenai ia gaukara orea ena biaguna be Abiesere, Anatoto tauna, Beniamina iduhu tauna. Abiesere ena orea taudia ibounai be 24,000.

13 Hua namba 10 dekenai ia gaukara orea ena biaguna be Maharai, Netopa tauna. Ia be Sera iduhu tauna ta. Maharai ena orea taudia ibounai be 24,000.

14 Hua namba 11 dekenai ia gaukara orea ena biaguna be Benaia, Piratono tauna, Eparaima iduhu dekena amo. Benaia ena orea taudia ibounai be 24,000.

15 Hua namba 12 dekenai ia gaukara orea ena biaguna be Heledai, Netopa tauna. Ia be Otoniele ena bese tauna, Heledai ena orea taudia ibounai be 24,000.

Israela ena iduhu naria taudia

16 Israela ena iduhu naria taudia be inai:

Rubena iduhu: Eliesere Sikiri
Simeona iduhu: Sepataia Maka
17 Levi iduhu: Hasabaia Kemuela
Arona iduhu: Sadoka
18 Iuda iduhu: Elihu, Davida ena kakana ta.
Isakara iduhu: Omeri Mikaela
19 Sebuluno iduhu: Isimaia Obadaia
Napatali iduhu: Ieremoto Asariele
20 Eparaima iduhu: Hosea Asasaia
Manase iduhu kahana: Ioela Pedaia
21 Manase iduhu kahana (Gileada): Ido Sekaraia
Beniamina iduhu: Iasiele Abinere
22 Dano iduhu: Asarele Ierohama
Israela ena iduhu lohia taudia be unai.

23 Davida ese edia mauri lagani 20 idia do abia lasi taudia ia duahia lasi, badina Lohiabada ese ia gwauhamata vadaeni, ia ese Israela taudia edia namba do ia habadaia, guba ena hisiu idia momo herea hegeregerena. 24 Ioaba Seruia ese taunimanima duahia gaukara ia hamatamaia, to ia haorea lasi. Inai taunimanima duahia gaukara dainai Dirava ese Israela ia badu henia. Unai dainai king Davida ena Sivarai Buka lalonai taunimanima edia namba idia torea lasi.

King ena kohu naria taudia

25 King ena kohu naria taudia be inai:

Asamavete Adiele ese king ena kohu haboua rumadia ia naria.

Ionatana Usaia ese tano kahana ibounai dekenai, hanua badadia bona maragidia dekenai, bona kohoro dekenai noho kohu haboua rumadia ia naria.

26 Uma gabu bona biru taudia ia naria tauna be Esiri Kelubu.

27 Vain audia edia uma gabudia naria tauna be Simei, Ramata tauna.

Vain huahua ena ranu idia haboua gabudia be Sabidi, Sipimi tauna ese ia naria.

28 Olive audia bona fig audia, dina diho kahana tano palaka dekenai idia vara, be Bala Hanana, Gedere tauna, ese ia naria.

Bona olive huahua ena dehoro idia haboua gabudia be Ioasa ese ia naria.

29 Sitirai, Sarona tauna ese boromakau oreadia be Sarona tano palaka dekenai ia naria. Bona koura dekenai noho boromakau oreadia be Sapata, Adelai ena natuna ese ia naria.

30 Kamelo ia naridia tauna be Obili, Isamaela tauna ta, bona doniki ia naridia tauna be Iehedeia, Merenoto tauna.

Mamoe bona nanigosi oreadia be Iasisi, Hagere tauna ese ia naria .

31 Inai taudia ibounai ese king Davida ena kohu idia naria.

Davida dekenai sisiba idia henia taudia

32 Ionatana, Davida ena tamana maragi, be sisiba henia tauna mai aonega danu. Ionatana danu be taravatu hadibaia tauna ta. Ia bona Iehiele, Hakamoni ena natuna, ese king ena natuna idia hadibaia. 33 Ahitopela ese Davida ia sisiba henia, bona ia hagoadaia, bona Husai, Araki tauna be king Davida ena turana. 34 Ahitopela ena gabuna be Iehoiada Benaia bona Abiatara ese idia abia.

Ioaba be king ena tuari orea ena biaguna.

Copyright information for `HMO