1 Corinthians 16

Ierusalema Keristani taudia durua monina

Ierusalema dekenai ekalesia orea durua totona moni lau ura herevalaia. Galatia ekalesia orea lau hamaoroa hegeregerena, umui danu lau hamaoroa, moni do umui haboua. Pura ena dina ginigunana ibounai umui ta ta ese emui ruma ta ta dekenai moni do umui haboua noho, ena bada be emui gaukara davana ena bada hegeregerena. Vadaeni do lau ginidae neganai, moni haboua gaukara ena hekwarahi be lasi. Vadaeni umui dekenai lau ginidae neganai, umui ese umui abia hidi taudia dekenai revareva ta do lau henia. Vadaeni inai taudia mai revareva danu do lau siaia, emui harihari gauna moni, Ierusalema dekenai do idia abia lao. To bema dala ia noho neganai, idia danu do lau lao.

Paulo ia ura loaloa Korinto kahanai

Makedonia do lau raka hanaia murinai, lau be umui do lau vadivadi henia. Badina be lau laloa Makedonia do lau raka hanaia guna. Umui dekenai do lau noho nega sisina daudau, sedira ela bona keru negana do ia ore. Unai murinai, egu laolao ma do lau hamatamaia lou neganai, umui ese egu dala do umui durua. Badina be lau ura lasi lau hanaia lao neganai, umui lau itaia nega sisina sibona. To bema Lohiabada ia ura neganai, umui dekenai do lau noho nega daudau.

To Efeso dekenai do lau noho ela bona Pentekoste ena nega. Badina be unai gabu dekenai iduara badana ia kehoa vadaeni, bona hari be gaukara badana bona mai anina ena nega namona. To lauegu dala idia koua gwauraia taudia be momo.

10 Timoteo bema umui dekenai ia lao neganai do umui naria namonamo, vadaeni mai gari lasi danu umui dekenai do ia noho. Badina be ia ese Lohiabada ena gaukara ia karaia noho, lau bamona. 11 Unai dainai tau ta ese do ia hahemaraia lasi, o iena hereva negea lasi. To umui durua, vadaeni maino dekenai iena laolao do ia hamatamaia lou, lau dekenai do ia mai. Badina be ia, bona iseda varavara taudia haida danu, lau naria noho.

12 Iseda varavara tauna, Apolo lau noia goadagoada, ia bona varavara taudia haida ese umui dekenai do idia vadivadi henia, lau gwau. To ia be ia ura lasi, badina ia laloa inai be Dirava ena ura lasi. To nega namona do ia davaria neganai umui dekenai do ia lao.

Hereva dokona

13 Umui naria namonamo, abidadama dekenai umui gini goada, metau ibounai lalonai do umui haheauka, do umui goada. 14 Umui emui gaukara ibounai be lalokau dekenai do umui karaia.

15 Umui be Stepana mai ena famili umui diba vadaeni. Idia be Keriso idia abidadama henia taudia ginigunadia Akaia dekenai. Idia ese sibodia idia henia, Dirava ena taudia edia hesiai gaukara do idia karaia totona. Lauegu varavara taudia e, umui lau noia, 16 inai bamona taudia edia hereva do umui kamonai henia. Bona inai taudia danu idia gaukara hebou bona durua taudia, idia do umui kamonai henia danu.

17 Lau moale, badina be Stepana bona Forotunato bona Akaiko be lau dekenai idia ginidae dainai. Badina be umui mai lau dekenai be dala lasi, to inai taudia ese emui gabu dekenai, durua lau dekenai idia henia noho. 18 Oibe, inai taudia ese lauegu lalona idia hanamoa bona hagoadaia, umui emui lalona idia hagoadaia guna bamona. Unai bamona taudia umui hanamoa bona matauraia be namo.

19 Ekalesia oreadia Asia dekenai ese edia hanamoa idia siaia inai. Akwila bona Prisikila, bona edia ruma dekenai idia hebou noho Keristani taudia ese umui idia hanamoa bada. 20 Keristani varavara taudia ibounai inai gabu dekenai ese umui idia hanamoa noho. Umui ta ta dekenai umui hanamoa, umui ta ta dekenai ekalesia ena lalokau kisi umui henia.

21 Lau Paulo, lauegu imana dekenai hanamoa hereva lau torea inai bamona: “Umui ibounai lau hanamoa.”

22 Bema tau ta ese Lohiabada Iesu ia ura henia lasi, unai tau madi ia be dika momokani!

Lohiabada Iesu e, mani oi mai!

23 Lohiabada ena hariharibada umui dekenai do ia noho.

24 Lauegu lalokau be umui ibounai dekenai lau henia noho, Keriso Iesu dainai. Amen.

Copyright information for `HMO