1 Samuel 19

Saulo ese Davida ia dagedage henia

Saulo ese iena natuna tau Ionatana bona iena hesiai taudia ibounai ia hamaoroa, ia gwau, “Davida do umui alaia mase.” To Ionatana ese Davida ia lalokau henia. Vadaeni Ionatana ese Davida ia hamaoroa, ia gwau, “Lauegu tamana Saulo ese oi do ia alaia dalana ia tahua noho. Unai dainai, oi naria namonamo, gabu ta dekenai do oi hunia ela bona dabai. To lau be uma dekenai do lau raka lao, oiemu hunia gabuna dekenai. Bona lauegu tamana ena badibadinai do lau gini, iena hereva oi totona do lau kamonai. Vadaeni oi totona hereva lau diba neganai, oi dekenai do lau mai, oi do lau hadibaia.”

Bona Ionatana ese Davida durua totona, hereva namona Saulo dekenai ia hamaoroa, ia gwau, “Oi be king tauna, oiemu hesiai tauna Davida do oi kara dika henia lasi, badina be ia ese oi dekenai ia kara dika henia lasi. Iena kara ibounai be oi hanamoa totona ia karaia noho. Badina be ia ese iena mauri ia laloa lasi, to Pilistia tauna Goliata ia alaia mase. Unai dainai Lohiabada ese kwalimu badana Israela ibounai dekenai ia henia. Oi ese oi itaia, bona oi moalelaia. Unai dainai, dahaka dainai Davida do oi alaia kava gwauraia? Ia ese kerere ta ia karaia lasi.”

Vadaeni Saulo ese Ionatana ena hereva ia kamonai. Saulo ese gwauhamata metau ia karaia, ia gwau, “Mauri Lohiabada dekenai lau gwauhamata inai, Davida be do lau alaia lasi.”

Unai dainai Ionatana ese Davida ia boiria, bona Saulo ena hereva ia hamaoroa. Vadaeni Ionatana ese Davida ia hakaua lao Saulo dekenai. Bona Davida be Saulo ena vairana dekenai ia noho, guna ia karaia hegeregerena.

Tuari be ma ia vara lou, vadaeni Davida be ia raka lao, Pilistia taudia ia tuari henia, momo herea ia alaia mase, bona idia oredia be ia luludia, idia heau.

Vadaeni lauma dikana ta Lohiabada dekena amo Saulo dekenai ia mai. Ia be iena ruma dekenai ia helai, iena imana dekenai be io ia noho, bona Davida be gita ia gadaralaia noho. 10 Vadaeni Saulo ese iena io ia abia, Davida be haba dekenai do ia gwadaia kau totona. To Davida ese ia dekea, bona io be haba sibona ia gwadaia. Vadaeni Davida be ia heau, ia heau mauri.

11 Unai hanuaboi, Saulo ese iena hesiai taudia haida Davida ena ruma dekenai ia siaia hunia dekenai, Davida ena ruma badinai idia naria, dabai do idia alaia mase totona. To Mikala, Davida ena adavana ese ia hamaoroa, ia gwau, “Hari hanuaboi bema oi heau mauri lasi, kerukeru be oi do idia alaia mase.” 12 Unai dainai Mikala ese uindo dekenai kwanau ta ia kwatua, ia taua dae, vadaeni Davida ese kwanau dekena amo murimuri dekenai ia diho, vadaeni ia heau mauri. 13 Bona Mikala ese idia koroa vadaeni laulau gauna ta ia abia, mahuta patana dekenai ia atoa, ena toana be tau ta ia hekure bamona. Kwarana kahana dekenai be nani ena huina pilo ia atoa, bona bilankesi dekenai ia koua.

14 Saulo ese iena hesiai taudia ia siaia, Davida do idia abia totona. Mikala ese idia ia hamaoroa, ia gwau, “Davida be ia gorere.”

15 Saulo ese iena hesiai taudia ma ia siaia Davida do idia itaia totona. Ia gwau, “Mai ena mahuta patana danu do umui huaia mai, vadaeni do lau alaia mase.” 16 To hesiai taudia idia raka vareai neganai, inai laulau ia koroa gauna sibona idia itaia, mahuta patana dekenai, bona nani huina dekena amo ia karaia pilo be kwarana ena henunai.

17 Vadaeni Saulo ese Mikala ia gwau henia, ia gwau, “Dahaka dainai inai bamona lau oi koia? Lau ia hadikaia tauna be oi koua lasi, vadaeni ia heau mauri?” Mikala ese Saulo dekenai ia haere, ia gwau, “Davida be lau dekenai ia hereva, ia gwau, ‘Lau do oi koua lasi, oi do lau alaia mase garina.’ ”

18 Davida be ia heau mauri, Rama dekenai ia lao, Samuela dekenai. Ia ese Saulo ia dekenai ia karaia vadaeni karadia, be Samuela dekenai ia hamaoroa. Vadaeni ia bona Samuela be idia lao, Naioto dekenai idia noho.

19 Haida ese Saulo idia hamaoroa, idia gwau, “Oi kamonai, Davida be Naioto dekenai, Rama kahana dekenai.” 20 Vadaeni Saulo ese hesiai taudia ia siaia, Davida do idia abia totona. To idia ese peroveta taudia orea ta idia itaia, idia peroveta karaia. Bona Samuela danu ia gini, edia gunalaia tauna. Vadaeni Dirava ena Lauma ese Saulo ena hesiai taudia ia abia, bona unai neganai idia danu idia peroveta. 21 Haida ese Saulo idia hamaorolaia, unai dainai ia ese hesiai taudia haida ma ia siaia, vadaeni idia danu idia peroveta. 22 Vadaeni Saulo sibona be Rama kahanai ia lao neganai, ranu guri badana ta Seku dekenai ia ginidae. Vadaeni ia ese tau haida ia nanadaia, ia gwau, “Samuela bona Davida be edeseni?” Tau ta ia haere, ia gwau, “Idia be Naioto dekenai, Rama kahanai.”

23 Seku dekena amo, Saulo be Naioto dekenai ia lao gwauraia, Rama kahanai, to ia danu be Dirava ena Lauma ese ia abia. Vadaeni ia be ia raka lao neganai, ia peroveta noho, ela bona Naioto dekenai ia ginidae, Rama kahanai. 24 Unai neganai ia ese iena dabua ia kokia, ma ia danu Samuela ena vairanai ia peroveta, bona kopina kavakava dekenai ia hekure noho, unai dina ibounai, bona hanuaboi ibounai danu. Unai dainai hereva ta idia gwauraia loaloa, idia gwau, “Saulo danu be peroveta tauna ta, a?”

Copyright information for `HMO