1 Samuel 3

Dirava ese Samuela dekenai ia hereva

Inai mero Samuela ese Lohiabada ena hesiai gaukara ia karaia. Ia ese Eli ia durua. Unai dinadia dekenai Lohiabada ena hereva be nega ta ta sibona ia hedinaraia, bona mata hanai danu idia hedinarai momo lasi.

Hanuaboi ta, Eli be iena daiutu lalonai ia mahuta. Iena matana be diburadibura, gau ta ia itaia namonamo lasi. Samuela be Lohiabada ena Dubu lalonai ia hekure, Dirava ena Taravatu Maua ia noho gabuna kahirakahira. Vadaeni, daba ia do rere lasi, Dirava ena lamepa do idia habodoa lasi neganai, Lohiabada be ia boiboi, ia gwau, “Samuela e! Samuela e!” Samuela ia gwau, “Lau inai!” Vadaeni ia heau lao, Eli dekenai, ia gwau, “Oi ese lau oi boiria, lau mai inai!”

To Eli ia haere, ia gwau, “Lau boiboi lasi oi dekenai, oi hekure lou!” Vadaeni Samuela be geda dekenai ia hekure lou.

Lohiabada ma ia boiboi lou, ia gwau, “Samuela e!” Samuela ma ia toreisi, Eli dekenai ia giroa lou, ia gwau, “Lau dekenai oi boiboi, lau mai inai.” To Eli ia gwau, “Natugu, oi dekenai lau boiboi lasi, oi hekure lou!” Samuela be Lohiabada ia do diba lasi, bona Lohiabada ena hereva be nega ta Samuela dekenai ia hedinarai lasi.

Vadaeni Lohiabada ese Samuela dekenai ia boiboi lou, nega ihatoina. Samuela ia toreisi, Eli dekenai ia lao, ia gwau, “Oi boiboi, lau mai inai.”

Vadaeni Eli be iena lalona ia kehoa, Lohiabada ese unai mero dekenai ia boiboi.
Unai dainai Eli ese Samuela ia hamaoroa, ia gwau, “Oi lao, oi hekure, bema ia boiboi lou, oi gwau, ‘Lohiabada e, lau dekenai oi hereva, badina be lau inai, oiemu hesiai tauna lau kamonai noho.’ ” Unai dainai, Samuela be ia lao, iena gabu dekena ma ia hekure.

10 Vadaeni Lohiabada be ia mai, ia gini, nega guna hegeregerena ia boiboi, ia gwau, “Samuela e, Samuela e!”

Samuela ia haere, ia gwau, “Mani oi hereva, badina be lau inai, oiemu hesiai tauna, lau kamonai noho.”

11 Vadaeni Lohiabada ese Samuela dekenai ia hamaoroa, ia gwau, “Oi kamonai, lau be kara ta Israela dekenai do lau karaia, bona unai kara ena sivarai idia kamonai taudia be do idia hoa, mai gari danu. 12 Lau ese Eli dekenai lau hamaoroa vadaeni karadia ibounai, iena bese taudia edia dika davana do lau karaia, be unai dina dekenai do lau karaia, hamatamaia negana ela bona dokona. 13 Badina be Eli lau hamaoroa vadaeni, iena natuna taudia ruaosi edia dika dainai idia do lau hadikaia ela bona hanaihanai. Idia ese lauegu ladana idia hadikaia. Eli be edia dika ia diba, to ia koua lasi. 14 Unai dainai Eli ena bese taudia dekenai lau hereva metau henia, lau gwau, ‘Idia edia boubou gauna ta, o boubou karana ta, ese edia kara dika do idia kokia diba lasi momokani, ela bona hanaihanai!’ ”

15 Samuela be geda dekenai ia hekure ela bona daba rere, vadaeni ia ese Lohiabada ena dubu ena iduara ia kehoa. Samuela ia kamonai vadaeni, Lohiabada ena hereva, be Eli dekenai do ia hamaoroa totona, be ia gari. 16 To Eli ese Samuela dekenai ia boiboi, ia gwau, “Natugu Samuela e!” Mero ia gwau, “Lau inai.”

17 Eli ia gwau, “Lohiabada ese oi dekenai dahaka ia hamaoroa? Lau dekena amo gau ta do hunia lasi. Bema iena hereva ta lau dekena amo oi hunia neganai, Dirava ese davana oi dekenai do ia henia, bona do ia habadaia.” 18 Unai dainai Samuela ese hereva ibounai Eli dekenai ia hamaoroa, hereva ta ia hunia lasi. Vadaeni Eli ia gwau, “Ia be Lohiabada, iena laloa hegeregerena do ia karaia.”

19 Samuela ia tubu noho ela bona ia bada, ena dina ibounai lalonai, Lohiabada ese ia dekenai ia noho. Vadaeni Samuela ese ia gwauraia hereva ibounai, be Lohiabada ese ia hamomokania. 20 Unai dainai Israela taudia ibounai, Dano dekena amo ela bona Bere Sieba, idia diba Samuela be ia gini vadaeni, Lohiabada ena peroveta tauna ta. 21 Lohiabada be Silo dekenai ma ia hedinarai lou noho, badina be unai gabu dekenai Lohiabada ese Samuela dekenai ia hedinarai, bona ia hereva henia. Samuela ese ia hereva negadia ibounai, Israela taudia idia kamonai.

Copyright information for `HMO