1 Samuel 6

Pilistia taudia ese Taravatu Maua idia siaia lou

Lohiabada ena Taravatu Maua be hua 7 Pilistia tano dekenai ia noho. Vadaeni Pilistia taudia ese edia dubu helaga taudia bona meamea taudia idia boiria, idia nanadaia, idia gwau, “Lohiabada ena Taravatu Maua dekenai be dahaka do ita karaia? Bema iena gabu korikori dekenai ita siaia lou neganai dahaka gau danu do ita siaia nega tamona?”

Idia haere, idia gwau, “Bema Israela ena Dirava ena Taravatu Maua umui siaia lou neganai, do umui siaia kava lasi. To harihari gauna, emui kerere ena boubou gauna, do umui siaia danu. Inai harihari gauna ese emui dika ena davana do ia karaia. Inai bamona umui karaia neganai, emui gorere do ia ore, bona do umui diba dahaka dainai Dirava ese umui ia panisia noho.”

Idia ma idia nanadaia, idia gwau, “Aiemai dika ena davana karaia totona dahaka harihari gauna do ai siaia?”

Pilistia meamea taudia idia haere, idia gwau, “Gudu dikadia edia laulau 5, bona bita edia laulau 5, golo dekena amo karaia gaudia, Pilistia lohia taudia ibounai be 5 dainai. Badina be unai gorere dikana be tamona, umui ibounai dekenai ia kamokau, emui lohia taudia 5 dekenai danu.
Unai dainai emui gudu dikadia edia laulaudia do umui karaia, bona emui tano idia hadikaia bita edia laulaudia danu do umui karaia, bona Israela ena Dirava ena ladana do umui hanamoa. Vadaeni sedira ia ese umui dekenai, emui dirava dekenai, bona emui tano dekenai ia panisia kara do ia hadokoa. Badina dahaka emui lalona idia auka, Aigupito taudia bona edia king Farao edia lalona idia auka bamona? Do umui laloaboio lasi, Dirava ese Aigupito taudia be kavakava taudia ia halaodia, ela bona idia ese Israela taudia Aigupito dekena amo idia siaia lao.

“Unai dainai treila matamata ta do umui abia hegaegae, bona boromakau hahine rua, maduna ta idia do huaia lasi gaudia. Inai boromakau ruaosi be treila veria totona do umui kwatua, to edia natudia be idia dekena amo do umui abia, ruma dekenai do umui koua. Unai murinai Lohiabada ena Taravatu Maua do umui abia, treila dekenai do umui atoa. Vadaeni Taravatu Maua ena badibadinai maua ta do umui atoa, bona ena lalonai inai golo gaudia, umui emui kerere ena boubou gaudia do umui udaia. Inai be Lohiabada dekenai do umui henia gaudia. Vadaeni unai boromakau mai treila danu do umui siaia lao, idia sibona edia dala do idia lao. Vadaeni do umui itaia noho. Bema unai treila bona unai boromakau ruaosi be edia tano korikori, Bete Semese hanua ena dala dekenai idia lao neganai, inai anina be Israela ena Dirava ese inai gorere dikana ita dekenai ia siaia vadaeni. To bema unai dala dekenai idia lao lasi, ita diba Dirava ese ita ia hadikaia lasi, to inai gorere ia vara kava.”

10 Vadaeni Pilistia taudia be unai bamona idia karaia. Boromakau hahine rua idia abia, treila veria totona idia kwatua. To boromakau edia natudia be ruma dekenai idia koua.

11 Lohiabada ena Taravatu Maua idia abia, treila dekenai idia atoa, bona golo dekena amo idia karaia bita 5 bona gudu 5 edia laulau gaudia danu. 12 Vadaeni boromakau be maoromaoro idia lao, Bete Semese hanua dekenai ia lao dalana dekena amo. Mai boiboi danu idia raka lao, dala dekena amo idia raka siri lasi, idiba kahanai o lauri kahanai. Bona Pilistia lohia taudia be edia murina dekenai idia raka, ela bona Bete Semese hanua ena tano hetoana dekenai.

13 Unai neganai Bete Semese taudia be edia uiti idia utua noho, koura dekenai. Vadaeni edia kwarana idia abia isi, Taravatu Maua idia itaia. Idia itaia neganai idia moale bada herea. 14 Treila be Iosua, Bete Semese tauna, ena uma lalonai ia vareai, unuseni ia gini. Unai gabu dekenai nadi badana ta ia noho. Vadaeni Israela taudia ese treila ena au idia siria, bona boromakau ruaosi idia alaia. Ibounai be boubou gauna totona Lohiabada ena vairana dekenai idia gabua ore. 15 Levi taudia ese Lohiabada ena Taravatu Maua, bona golo gaudia idia udaia maua danu idia abia diho. Vadaeni unai maua ruaosi be nadi badana ena latanai idia atoa. Bona unai dina dekenai Bete Semese taudia ese gabua bouboudia idia karaia, bona boubou idauidau Lohiabada dekenai idia henia. 16 Pilistia lohia taudia 5 ese unai kara idia itaia, vadaeni unai dina dekenai Ekarona hanua dekenai idia giroa lou.

17 Unai gudu dikadia 5 edia laulaudia be Pilistia taudia ese Lohiabada dekenai idia siaia, edia kerere davana karaia totona. Unai gudu 5 be hanua 5 totona, hanua be inai: Asadoda ena ta, Gasa ena ta, Asakelona ena ta, Gata ena ta, Ekarona ena ta. 18 Bita edia laulaudia danu idia siaia, golo gaudia. Idia siaia golo bitadia 5 be Pilistia lohia taudia 5 idia biagua hanua ibounai totona, mai magu hanuadia, bona mai magu lasi hanua gabudia danu. Unai nadi badana, iena latanai Lohiabada ena Taravatu Maua idia atoa gauna, be toa ta ia lao. Bona ia be do noho, Iosua, Bete Semese tauna ena uma tano dekenai, ia mai bona hari dina.

19 Lohiabada ese Bete Semese taudia ibounai 70 ia alaia mase, badina be Taravatu Maua ena lalona be matana dekenai idia itaia dainai. Bona hanua taudia idia taitai, badina be Lohiabada ese unai ala-ala badana be idia edia huanai ia karaia dainai.

Taravatu Maua be Kiriata Iearimi dekenai idia atoa

20 Vadaeni Bete Semese taudia idia gwau, “Daika ese inai Dirava helagana, Lohiabada ena vairanai do ia gini diba? Bona edeseni Taravatu Maua do ita siaia lao, ita dekena amo do ia noho siri totona?” 21 Unai dainai, idia ese hesiai taudia idia siaia, Kiriata Iearimi taudia dekenai, idia gwau, “Pilistia taudia ese Lohiabada ena Taravatu Maua idia siaia lou vadaeni. Umui mai, Maua umui abia, emui hanua dekenai do umui atoa.”

Copyright information for `HMO