1 Timothy 3

Ekalesia gunalaia taudia

Inai hereva be momokani: Bema tau ta ia ura be ekalesia ena gunalaia tauna ena dagi do ia tahua, ia be dagi namona ia ura henia inai. Ekalesia gunalaia tauna be kara maoromaoro tauna, kerere ta lasi. Tau ta ese iena kerere ta ia gwauraia diba lasi. Ia be hahine tamona ena adavana, inua momo lasi tauna, mai ena aonega, bona lalo namo, bona mai ena bogahisihisi kara. Ia ese idau taudia be iena ruma dekenai do ia abidia dae, bona ia be hadibaia gaukara namona do ia karaia diba tauna. Ia be kekero tauna lasi, heatu tauna lasi, to mai ena manau bona maino. Ia ese moni do ia mataganigani henia lasi. Iena ruma taudia, adavana bona iena natuna do ia biagua namonamo. Iena natuna ese ia do idia kamonai henia bona matauraia. Badina be bema tau ta ese iena ruma korikori taudia ia biagua diba lasi neganai, Dirava ena ekalesia edena bamona do ia gunalaia diba? Keristani matamata tauna ese inai dagi do ia abia lasi, do ia hekokoroku, vadaeni Satani ena dibagani ese do ia hakererea garina. Ekalesia gunalaia tauna ena ladana be do ia namo, ekalesia lasi taudia edia vairana dekenai. Vadaeni inai murimuri taudia ese unai ekalesia gunalaia tauna do idia matauraia, haida ese ia do idia samania, bona Satani ena koikoi gabuna lalonai do ia moru garina.

Diakono taudia

Diakono taudia danu be do idia kara maoromaoro taudia, bona tau namodia momokani. Idia be inuinu momo taudia lasi, bona moni do idia mataganigani henia lasi. Iesu Keriso abidadama henia ena sivarai momokani do idia badinaia, mai edia laloa maoromaoro danu. 10 Diakono dagi do idia abia kava lasi, to edia kara do umui tahua guna be namo. Bema ta ese edia kerere ia gwauraia diba lasi, vadaeni dagi idia abia diba. 11 Edia adavana danu, be do idia kara maoromaoro hahine taudia. Do idia hereva dika lasi, do idia inuinu momo lasi, bona mai edia laloa maoromaoro danu do idia noho, edia kara ibounai lalonai. 12 Diakono tauna be hahine tamona ena adavana, bona iena natuna bona ruma taudia do ia biagua namonamo. 13 Badina be diakono gaukara idia karaia namonamo taudia, be taunimanima ese do idia matauraia. Vadaeni edia ladana be namo dainai, edia abidadama Iesu Keriso dekenai, be do idia herevalaia goadagoada diba.

Hunia hereva badana

14 Inai hereva oi dekena lau torea noho, to lau ura be nega daudau lasi lalonai oi dekenai do lau mai. 15 To bema lau mai haraga lasi neganai, inai revareva ese oi do ia hadibaia, edena kara do ita karaia Dirava ena ekalesia lalonai. Ita be Dirava ena orea taudia, bona inai orea be mauri Diravana ena ekalesia. Ekalesia be hereva momokani ena du, bona hereva momokani ia gimaia maguna.

16 Momokani, Dirava ena dala ita badinaia, be hunia gauna badana, ani? Bona Dirava ese inai hereva ena anina be ita dekenai ia hedinaraia, inai bamona:

Taunimanima edia tauanina dekenai Keriso ia hedinarai,
Lauma Helaga ese iena kara maoromaoro momokani ia gwauraia.
Aneru ese ia idia itaia.
Bese ibounai edia huanai ia idia harorolaia.
Tanobada taudia ese ia idia hamomokania,
bona idia ese ia idia abidadama henia.
Guba dekenai Dirava ese ia abia daekau,
bona ia ese ladana bada momokani ia abia.
Copyright information for `HMO