2 Chronicles 13

Abaisa bona Ieroboama idia tuari

Israela ena king, Ieroboama, Nebata ena natuna, be lagani 18 ia king neganai, Abaisa ese Iuda ena king dagi ia abia hamatamaia. Abaisa be lagani toi lalonai Ierusalema dekenai ia lohia. Iena sinana be Maka, Gibea tauna, Uriele ena natuna hahine ta.

Abaisa bona Ieroboama be idia ta ta dekenai idia tuari henia hamatamaia.
Abaisa ese tuari taudia 400,000 ia abia hegaegae, bona Ieroboama ena tuari taudia be 800,000.

Unai tuari orea ruaosi be Eparaima ororo tano dekenai idia haboua. King Abaisa be Semaraima Ororo ena latanai ia gini, bona Ieroboama bona Israela taudia dekenai ia boiboi, ia gwau, “Egu hereva umui kamonai! Umui diba lasi a, Lohiabada, Israela ena Dirava, ese Israela basileia be Davida bona iena bese taudia dekenai ia henia ela bona hanaihanai, damena dekena amo ia hamomokania gwauhamata dekenai? To Ieroboama Nebata, Solomona Davida ena hesiai tauna be ia toreisi, iena king ia dagedage henia. Bona ia ese kara dika taudia haida be ia dekenai ia haboua, Rehoboama Solomona idia dagedage henia. Unai neganai Rehoboama be eregabe bona laloa manoka tauna, bona ia ese ia koudia diba lasi.

“Harihari umui haboua mai, Lohiabada ese Davida ena bese dekenai ia henia king siahuna do umui tuari henia gwauraia. Umui emui tuari orea be momo herea, bona umui ese golo boromakau tau, emui dirava totona Ieroboama ese ia karaia gaudia umui abia mai danu. To umui ese Lohiabada ena hahelagaia taudia, Arona ena bese taudia bona Levi taudia umui lulua lao. Edia gabudia dekenai umui sibona emui ura taudia, be emui hahelagaia taudia umui halaoa, idau bese taudia idia karaia hegeregerena, a? Bema tau ta do ia mai, boromakau tau o mamoe tau 7 do ia mailaia, sibona do ia hahelagaia totona, ia ese hahelagaia tauna ena dagi ia abia diba, a? Lasi, unai tau be dirava ta lasi ena hahelagaia tauna.

10 “To aiemai Dirava be Lohiabada, ai ese ai rakatania lasi. Ai be mai aiemai hahelagaia taudia, bona idia ese Lohiabada ena hesiai gaukara idia karaia noho. Idia be Arona ena bese taudia, bona Levi taudia ese idia durudia noho. 11 Daba ibounai bona adorahi ibounai idia ese gabua bouboudia, bona mai bonana namo muramura, Lohiabada dekenai idia henia noho. Paraoa helagana be pata helagana ena latanai idia atoa, bona adorahi ibounai idia ese lamepa idia gabua noho, lamepa namona, golo gauna, ena latanai. Ai ese Lohiabada, aiemai Dirava ena hereva ai badinaia noho, to umui ese Lohiabada umui rakatania vadaeni. 12 Kamonai, Dirava be ai dekenai ia noho, ia ese ai ia gunalaia noho. Iena hahelagaia taudia ese edia kibi do idia hiriria, umui dekenai do ai tuari henia totona. Israela besena e, Lohiabada, emui sene taudia edia Dirava do umui tuari henia lasi, badina do umui kwalimu diba lasi.”

Iuda ese Israela ia halusia

13 To Ieroboama ese iena tuari taudia orea ta hunia dekenai ia siaia, Iuda taudia edia murina kahana do idia lao, vadaeni Iuda taudia edia vairana kahanai be tuari orea ia noho, bona edia murina kahana danu be unai tuari orea hunia taudia idia noho. 14 Iuda taudia ese edia matana idia negea, idia itaia tuari be edia vairanai bona edia murinai danu, vadaeni idia ese Lohiabada dekenai durua totona idia boiboi henia, bona hahelagaia taudia ese kibi idia hiriria. 15 Vadaeni Iuda taudia ese tuari ena boiboi badana ena regena idia karaia hamatamaia. Iuda taudia idia boiboi noho neganai, Dirava ese Ieroboama bona Israela taudia ibounai ia halusia, Abaisa bona Iuda taudia edia vairanai. 16 Israela taudia ese Iuda taudia edia vairanai idia heau, bona Dirava ese Iuda taudia edia siahu henunai ia atodia. 17 Abaisa bona iena tuari taudia ese idia aladia mase, ala-ala bada herea. Israela ena tuari taudia goadadia ibounai 500,000 idia mase. 18 Unai neganai Israela taudia idia lusi bona Iuda taudia idia kwalimu, badina be Iuda taudia ese Lohiabada, edia sene taudia edia Dirava idia abidadama henia dainai.

19 Vadaeni Abaisa ese Ieroboama ia lulua, bona hanua haida Ieroboama dekena amo ia abia, Betele, mai ena hanua maragidia danu, bona Iesana, mai ena hanua maragidia danu, bona Eparona, mai ena hanua maragidia danu. 20 King Ieroboama ese iena siahu ia abia lou lasi Abaisa ena nega lalonai. Lohiabada ese Ieroboama ia botaia diho, vadaeni ia mase.

21 To Abaisa be ia goada noho. Ia ese hahine 14 ia adavaia, bona iena natuna tau be 22, iena natuna hahine be 16. 22 Abaisa ena sivarai orena, iena kara bona iena hereva, be peroveta tauna Ido ena Sivarai Buka lalonai idia torea vadaeni.

Copyright information for `HMO