2 Chronicles 2

Dubu Helaga haginia totona kohu ma idia haboua mai

King Solomona ena ura be Dubu Helaga ta do ia haginia Lohiabada ena Ladana hanamoa totona. Solomona ese ia sibona ena ruma danu do ia haginia gwauraia. Vadaeni Solomona ese tau ibounai 70,000 dekenai gaukara ia henia, idia ese kohu do idia huaia. Bona ia ese ma tau ibounai 80,000 dekenai gaukara ia henia, idia ese ororo kahadia dekenai nadi idia geia. Bona tau ibounai 3600 ese inai gaukara taudia edia gaukara idia naria bona biagua.

Solomona ese king Hirama, Turo ena king, dekenai hereva ia siaia, ia gwau, “Sida audia be guna egu tamana Davida dekenai oi siaia, iena noho ruma do ia haginia totona. Mani emui kara, tamagu dekenai oi karaia hegeregerena, lau dekenai danu do oi karaia. Lau ese egu Dirava, Lohiabada, ena Ladana do lau hanamoa totona Dubu Helaga ta do lau haginia. Inai Dubu be helaga gabuna, bona unuseni egu basileia taudia, bona lau ese Lohiabada do ai tomadiho henia. Ai ese bonana namo muramura inai Dubu lalonai do ai gabua, paraoa helagana be nega ibounai do ai henia noho, bona gabua bouboudia be daba bona adorahi ibounai bona Sabati Dinadia, Hua Matamata ariadia bona dina helagadia haida danu do ai henia noho, Lohiabada, aiemai Dirava do ai hanamoa totona. Badina be ia ese Israela taudia ia oda henia vadaeni, inai bamona bouboudia do idia henia ela bona hanaihanai.

“Lau ese do lau haginia Dubu Helaga be do ia bada, badina be aiemai Dirava ese dirava ibounai ia hereaia noho. To daika ese Dirava ena Dubu Helaga do ia haginia diba? Badina be guba, io, guba ataiai momokani, be ia hegeregere lasi Dirava ena noho gabuna do ia lao. Be edena bamona iena Dubu Helaga do lau haginia diba? Sedira Lohiabada dekenai bonana namo muramura gabua gabuna sibona do lau karaia?

“Unai dainai, mani emu kara tau ta do oi siaia mai, golo bona siliva bona auri laboralabora, bona auri, bona dabua kakakaka sisina, bona kakakaka, bona bulu, bona gau ia koroa diba tauna. Vadaeni ia ese Iuda dekenai bona Ierusalema dekenai egu gaukara diba momo taudia danu do idia gaukara hebou. Egu tamana Davida ese inai egu taudia ia abia hidi vadaeni.

“Sida bona kasuarina bona iunipa audia danu Lebanona dekena amo mani do oi siaia mai, badina lau diba oiemu hesiai taudia be Lebanona audia idia utua diba. Egu gaukara taudia be oiemu gaukara taudia danu do idia gaukara hebou. Au momo herea lau dekenai do idia abia hegaegae, badina be lau ese do lau haginia Dubu Helaga be do ia bada, bona hoa bada gauna. 10 Oiemu gaukara taudia, au utua taudia, be edia gaukara davana do lau henia inai bamona: Uiti ena metau 2000 toni, bali ena metau 2000 ton, uaina 400,000 lita, bona olive dehoro 400,000 lita.”

11 Vadaeni Hirama, Turo ena king, ese revareva dekena amo iena haere Solomona dekenai ia siaia lao, ia gwau, “Lohiabada ese iena bese taudia ia lalokau henia dainai, ia ese edia king be oi ia halaoa vadaeni.”

12 Hirama ma ia gwau, “Lohiabada, Israela ena Dirava, guba bona tanobada ia karaia ena Dirava be lau hanamoa inai, badina ia ese king Davida dekenai natuna tau ia henia vadaeni, aonega tauna, mai ena diba maoro, bona mai ena lalona kehoa danu. Ia ese Dubu Helaga do ia haginia, Lohiabada ena, bona king ena ruma danu, ia sibona ena.

13 “Unai dainai lau ese gaukara diba momo bona aonega bada tauna ta oi dekenai lau siaia vadaeni. Iena ladana be Hurama Abi. 14 Ia be Dano iduhu hahine ta ena natuna, to iena tamana be Turo tauna. Golo bona siliva bona auri laboralabora, bona auri bona nadi bona au, bona dabua kakakaka sisina, bona bulu, bona kakakaka, bona dabua namo herea gaukaralaia dekenai ia manada momokani. Ia ese danu koroa gaukara ia diba momo, bona do oi henia gaukara idauidau ibounai do ia karaia diba. Ia be oiemu gaukara taudia, bona oiemu tamana Davida ena gaukara taudia danu do idia gaukara hebou.

15 “Unai dainai, inai uiti bona bali bona uaina bona olive dehoro, oi ese oi gwauhamata vadaeni gaudia do oi siaia mai. 16 Bona ai ese Lebanona ena audia, oi ura gaudia be do ai utua, tupe dekenai do ai atodia, bona davara dekena amo do ai huredia lao ela bona Iopa. Iopa dekena amo oi ese Ierusalema dekenai do oi huaia lao.”

17 Vadaeni Solomona ese idau bese taudia, Israela tano dekenai idia noho taudia edia namba ia duahia, iena tamana Davida ese ia karaia duahia gaukara bamona. Ia davaria, idau bese taudia Israela dekenai be 153,600. 18 Solomona ese idia 70,000 be kohu huaia gaukara ia henidia, bona idia 80,000 be ororo dekenai nadi utua gaukara ia henidia. Bona tau ibounai 3600 ese inai gaukara taudia edia gaukara idia naria bona biagua.

Copyright information for `HMO