2 Chronicles 25

King Amasaia, Iuda ena king

Amasaia ese king dagi ia hamatamaia neganai iena mauri lagani be 25, bona ia be lagani 29 lalonai Ierusalema dekenai ia king. Iena sinana be Iehoadini, ia be Ierusalema hahine.

Amasaia ese Lohiabada ena vairanai ia kara maoromaoro, to mai ena kudouna ibounai danu lasi. Amasaia ia diba king ena siahu be momokani ia dogoatao neganai, ia ese iena tamana idia alaia taudia ia aladia mase. To unai taudia edia natudia danu be Amasaia ia aladia lasi, badina be Mose ena Taravatu Buka ia matauraia. Mose ena Taravatu lalonai Lohiabada ese oda ia gwauraia, ia gwau, “Tamana be do umui alaia lasi, edia natudia edia dika dainai, bona memero do umui alaia lasi, edia tamadia edia dika dainai, to tau ta ta ena kara dika, ena kara dika, dainai do ia mase.”

Amasaia ese Edoma taudia ia halusia

Vadaeni king Amasaia ese Iuda bona Beniamina iduhu taudia ibounai ia haboua, bona iduhu ta ta hegeregerena, tuari taudia 1000 idia biagua taudia bona tuari taudia 100 idia biagua taudia ia abidia hidi. Inai tuari orea ibounai be tuari totona ia abidia hegaegae. Edia mauri lagani 20, bona 20 idia hanaia taudia ibounai ia haboua, bona idia ia duahia, idia be ibounai 300,000. Idia be tuari totona idia hegaegae momokani taudia, io bona kesi gaukaralaia dekenai idia manada taudia.

Amasaia ese danu Israela dekena amo tuari taudia 100,000 ia hoia, edia davana be siliva ena metau 3400 kilogaram bamona. To Dirava ena peroveta tauna ta ese Amasaia ia hamaoroa, ia gwau, “King e, inai Israela tuari taudia be oi danu do oi abidia lasi, badina Lohiabada be Israela taudia bona Eparaima taudia ibounai danu ia noho lasi. Bona bema oi laloa unai taudia edia durua dekena amo do oi goada, Lohiabada ese umui do ia halusia, badina ia ese umui dekenai idia tuari henia taudia do ia durudia.”

To Amasaia ese Dirava ena peroveta tauna ia nanadaia, ia gwau, “Lau ese siliva ena metau 3400 kilogaram lau henia vadaeni, unai tuari taudia hoia totona. Unai moni be edena bamona?”

Peroveta tauna ia haere, ia gwau, “Lohiabada ese oi dekenai ia henia diba moni ese unai moni ena bada do ia hanaia momokani.”

10 Unai dainai Amasaia ese unai Israela tuari taudia, Eparaima dekena amo taudia, ia siaidia lou, edia hanua dekenai do idia lao. Vadaeni idia lao, to idia badu momokani Iuda taudia dekenai.

11 Unai neganai Amasaia be ia boga auka, iena tuari orea ia hakaua lao, Damena Koura dekenai idia lao. Unuseni Edoma taudia danu idia tuari, bona Amasaia ena tuari taudia ese Edoma taudia 10,000 idia alaia mase. 12 Iuda taudia ese danu Edoma taudia ma 10,000 idia abia mauri. Inai abia mauri taudia be Sela hanua ororo, ena nadi hagahaga dekenai idia abidia daekau. Bona unai ataiai nadi gabuna dekena amo Iuda taudia ese Edoma taudia idia negea diho, ibounai idia mase.

13 To Amasaia ese ia siaia lou Israela taudia, ia danu do idia tuari gwauraia, to edia dala be Amasaia ese ia koua taudia, ese Iuda hanua haida idia tuari henia. Unai hanua be Samaria bona Bete Horono edia huanai idia noho. Unai Israela taudia ese tau ibounai 3000 idia alaia, bona kohu momo idia abia, edia gabu dekenai idia abia lao.

14 Amasaia be Edoma taudia ia aladia mase dekena amo ia giroa mai neganai ia ese Seiri taudia edia dirava laulaudia ia mailaia, bona ia haginidia, iena dirava. Vadaeni ia ese ia tomadiho henidia, bona boubou gaudia idia dekenai ia henia. 15 Unai dainai Lohiabada ese Amasaia ia badu henia, bona ia ese peroveta tauna ta Amasaia dekenai ia siaia. Unai peroveta tauna ese ia hereva henia, ia gwau, “Badina dahaka oi ese inai idau bese taudia edia dirava oi tomadiho henia noho? Unai dirava ese edia taunimanima be oiemu siahu dekena amo idia hamauria diba lasi, to oi ese unai dirava dekenai oi lao, a?”

16 To Amasaia ese peroveta tauna ena hereva ia utua, ia gwau, “Ai ese king ena sisiba henia tauna oi ai halaoa vadaeni, a? Hereva hadokoa, lau ese oi do lau alaia mase garina!”

Vadaeni peroveta tauna ese iena hereva ia hadokoa, to ia gwau, “Lau diba Dirava ese iena lalona ia ha-aukaia vadaeni, oi do ia hadikaia ore, badina be inai kara be oi karaia vadaeni, bona egu sisiba hereva oi kamonai henia lasi dainai.”

Israela taudia ese Iuda taudia idia tuari henia

17 Gabeai Amasaia, Iuda ena king be iena sisiba henia taudia danu idia hereva hebou. Vadaeni Amasaia ese Iehoasa, Iehoahasa ena natuna, bona Iehu ena tubuna, Israela ena king, dekenai hereva ia siaia, ia gwau, “Emui tuari taudia do umui abia hegaegae, bona do ita tuari.”

18 To Iehoasa, Israela ena king ese Amasaia, Iuda ena king dekenai hereva ia siaia lao, ia gwau, “Lebanona ava ginigini ta ese Lebanona sida auna ta dekenai hereva ia siaia lao, ia gwau, ‘Oiemu natuna kekeni be lauegu natuna tau dekenai do oi henia, do idia headava,’ to Lebanona ena uda boroma ta ese ia raka hanaia, bona ia ese unai ava ginigini ia moia diho momokani. 19 Momokani, oi ese Edoma oi halusia, vadaeni unai dainai oi hekokoroku noho. Namona be oiemu hanua dekenai oi noho, oiemu kwalimu do oi moalelaia noho. Anina be dahaka tuari do oi havaraia, bona do oi moru, oi bona Iuda besena ibounai danu?”

20 To Amasaia be unai hereva ia kamonai lasi. Badina be Dirava ena ura be Amasaia be do idia halusia, ia ese Edoma taudia edia dirava laulaudia ia tomadiho henidia dainai. 21 Unai dainai Iehoasa, Israela ena king be iena tuari taudia danu idia raka lao, bona Bete Semese dekenai ia ese Amasaia mai ena tuari taudia ia tuari henia. Bete Semese be Iuda ena tano dekenai.

22 Vadaeni Iuda tuari taudia be Israela tuari taudia ese idia halusia, bona Iuda taudia idia heau, ta ta edia ruma, edia ruma dekenai idia lao. 23 Unai neganai Iehoasa, Israela ena king ese Amasaia, Iuda ena king, ia abia mauri, Bete Semese dekenai. Vadaeni Iehoasa be Ierusalema dekenai ia lao, Ierusalema ena magu ia hadikaia. Magu be Eparaima Iduara ela bona Kona Iduara kahana ibounai Iehoasa ese ia hamakohia, ena lata be 200 mita bamona.

24 Iehoasa ese danu Lohiabada ena Dubu Helaga dekenai idia noho golo bona siliva, kapusi, uro bamona gaudia, Obeda Edoma ese ia gimaia gaudia, bona king ena ruma ena davana bada gaudia danu be Samaria dekenai ia abia lao. Iuda abia mauri taudia danu unuseni ia abidia lao.

Amasaia, Iuda ena king ia mase

25 King Iehoasa, Israela ena king ia mase murinai, Amasaia, Iuda ena king be ma lagani 15 ia mauri noho, vadaeni ia danu ia mase. 26 Amasaia ena kara orena be Iuda bona Israela Edia King Edia Sivarai Buka lalonai idia torea vadaeni. 27 Lohiabada dekena amo Amasaia ia raka siri negana dekena amo, Ierusalema taudia haida ese ia do idia alaia dalana idia tahua. Unai dainai ia ese Lakisi hanua dekenai ia heau. To idia ese tau haida Amasaia ena murinai idia siaia lao ela bona Lakisi, bona unuseni idia ese Amasaia idia alaia mase.

28 Vadaeni hosi ena latanai idia atoa, Ierusalema dekenai idia abia lou, bona unuseni, king ena guria gabunai, Davida Ena Hanua lalonai, idia guria.

Copyright information for `HMO