2 Chronicles 34

King Iosaia, Iuda ena king

Iosaia ese king dagi ia abia hamatamaia neganai iena mauri lagani be 8. Ia be Ierusalema dekenai ia king lagani 31 lalonai. Iosaia ese Lohiabada ena vairanai kara maoromaoro ia karaia. Iena sene tauna Davida ena dala dekenai ia raka, bona Dirava ena taravatu ibounai ia kamonai henia.

Iosaia ese Dirava koikoi tomadiho kara ia koua gwauraia

Iosaia ena king lagani namba 8 lalonai, ia be do mero neganai, ia ese iena sene tauna king Davida ena Dirava ia tahua hamatamaia. Iena lohia lagani namba 12 lalonai Iosaia ese Iuda bona Ierusalema dekenai idia noho ataiai tomadiho gabudia, Asera ena au badadia bona kaivakuku, bona auri dekenai idia karaia dirava edia laulaudia ibounai ia hadikaia hamatamaia. Iosaia ia oda henidia, vadaeni iena taudia ese Bala ena boubou patadia, bona idia kahirakahira idia noho muramura mai bonana patadia idia hadikaia ore. Idia ese Asera ena kaivakuku, bona kaivakuku idauidau ibounai idia hamakohia maragimaragi, kahu idia halaoa. Bona inai kahu be unai kaivakuku idia tomadiho henia taudia edia guria gabudia edia latanai idia negea lao.

Iosaia ese danu unai dirava koikoidia edia hahelagaia taudia edia turiadia,be edia boubou patadia latanai ia gabua ore. Unai kara dekena amo Iosaia ese Iuda bona Ierusalema ia hagoevaia lou. Iosaia ese unai bamona ia karaia danu Manase, bona Eparaima bona Simeona edia hanua ibounai dekenai, ma ela bona Napatali tano ena hanua ibounai danu. Unai mirigini kahana hanua ibounai dekenai Iosaia ese boubou patadia ia hamakohia, bona Asera au badadia bona kaivakuku be ia utua maragimaragi, kahu ia halaodia. Muramura mai bonana patadia danu ia hadikaia ore Israela tano ibounai dekenai. Unai murinai Ierusalema dekenai ia giroa lou.

Taravatu Buka idia davaria

Iena king lagani namba 18 lalonai, tano bona Dubu Helaga ia hagoevaia murinai, king Iosaia ese tau toi ia siaia lao Lohiabada Dirava ena Dubu Helaga do idia hanamoa lou totona. Edia ladana be inai: Sapana, Asalaia ena natuna, Maseaia, Ierusalema ena lohia tauna badana, bona Ioa Ioahasa, toretore tauna badana. Idia be Hilekaia, Hahelagaia Tauna Badana dekenai idia ginidae, vadaeni taunimanima ese Dirava ena Dubu Helaga lalonai idia atoa vareai moni idia henia. Unai moni be Levi taudia, Dubu iduara idia naridia taudia, ese Manase bona Eparaima taudia, bona Israela kahanai do noho taudia, bona Iuda bona Beniamina taudia ibounai, bona Ierusalema taudia dekena amo idia abia monina.

10 Vadaeni inai moni be Lohiabada ena Dubu Helaga hanamoa lou ena gaukara naria taudia badadia dekenai idia henia. Inai taudia ese inai moni dekena amo Dubu hanamoa lou gaukara taudia edia gaukara davana idia henia. 11 Inai moni haida danu be kamuta taudia bona ruma haginia taudia dekenai idia henia, nadi namodia bona au namodia do idia hoia totona. Unai dekena amo idia ese Iuda ena king taudia idia naria lasi dainai idia dika rumadia, do idia hanamoa lou.

12 Unai gaukara taudia ese Dubu Helaga idia hanamoa lou, mai maoromaoro bona momokani danu. Levi taudia 4 ese unai gaukara idia naria, edia ladana be Iahata bona Obadaia, Merari besena taudia, bona Sekaraia bona Mesulama, Kohata besena taudia. Levi taudia ibounai be miusiki gadaralaia diba taudia. 13 Bona idia ese kohu huaia taudia edia gaukara idia itaia noho, bona hesiai gaukara idauidau idia karaia taudia ibounai idia biagua. Levi taudia haida be kohu duahia bona torea taudia, bona Dubu iduara naria taudia.

14 Unai moni, Lohiabada ena Dubu dekenai idia atoa vareai moni be kohu haboua daiutu dekena amo idia abia neganai, hahelagaia tauna Hilekaia ese Lohiabada ena Taravatu Buka, Dirava ese Mose dekenai ia henia gauna, ia davaria. 15 Vadaeni Hilekaia ese toretore tauna Sapana ia hamaoroa, ia gwau, “Lau ese Taravatu Buka lau davaria, Lohiabada ena Dubu lalonai.” Bona Hilekaia ese Buka be Sapana dekenai ia henia.

16 Vadaeni Sapana ese Buka be king Iosaia dekenai ia abia lao. Ia ese king ia hamaoroa, ia gwau, “Oiemu hesiai taudia ese oi henidia gaukara ibounai idia karaia noho. 17 Lohiabada ena Dubu lalonai idia davaria moni be gaukara naria taudia bona gaukara taudia dekenai idia henia.” 18 Vadaeni toretore tauna Sapana ese king ma ia hamaoroa, ia gwau, “Hahelagaia tauna Hilekaia ese Buka ta lau dekenai ia henia.” Vadaeni Sapana ese king ena vairana dekenai Buka ia duahia hedinarai.

19 King Iosaia ese Taravatu Buka ena hereva ia kamonai neganai, ia ese gari dainai iena dabua ia darea. 20 Vadaeni king ese hahelagaia tauna Hilekaia, bona Ahikama Sapana, bona Abidona Mikaia, bona toretore tauna Sapana, bona Asaia, king ena hesiai tauna ta dekenai ia oda henia, ia gwau, 21 “Umui lao, Lohiabada dekenai umui nanadaia, lau dainai, bona do noho Israela bona Iuda taudia dainai, inai idia davaria Buka ena hadibaia hereva do ita laloa namonamo totona. Badina Lohiabada be ita dekenai ia badu, iseda sene taudia ese iena hereva idia kamonai henia lasi, bona inai Buka ia torea hereva idia badinaia lasi dainai.”

22 King ena oda dainai, Hilekaia bona king ia siaia vadaeni taudia be peroveta hahine Hulida, Salumu Tikava ena adavana dekenai idia lao. Unai Salumu be Harahasa ena tubuna. Ia be king ena dabua naria tauna. Inai peroveta hahine be Ierusalema ena kahana matamata dekenai ia noho. Idia be ia danu idia herevahereva.

23 Vadaeni hahine ese idia ia hamaoroa, “Do umui giroa lou, bona king dekenai Dirava ena hereva do umui hamaoroa, Dirava ia gwau: 24 ‘Lau, Lohiabada, Israela ena Dirava, ese Ierusalema bona iena taudia do lau panisia momokani, Iuda ena king ia duahia Buka ia torea hadikaia gaudia hegeregerena. 25 Badina be idia ese lau idia rakatania, bona idau dirava edia vairanai muramura mai bonana idia gabua, bona edia kara ibounai dekena amo lauegu badu idia havaraia. Egu badu ia toreisi vadaeni Ierusalema dekenai, bona ia keru diba lasi.’

26 “Iuda ena king do umui hamaoroa, umui gwau: ‘Lau, Lohiabada, Israela ena Dirava be inai bamona lau hereva, lau gwau: Oi ese inai Buka ena hereva, oi kamonai, 27 bona oiemu lalona oi giroa, bona egu vairana dekenai oi manau, oiemu dabua danu oi darea, bona oi taitai. Unai bamona oi karaia vadaeni, badina be oi kamonai lau ese Ierusalema bona iena taudia do lau panisia. To lau Lohiabada ese oiemu guriguri lau kamonai vadaeni, oiemu lalona oi giroa dainai. 28 Unai dainai unai dika Ierusalema ena latanai do lau atoa, be do ia vara lasi, ela bona oi mase murinai. Mai maino danu do oi mase.’ ”

Vadaeni unai tatau ese king Iosaia dekenai idia giroa lou, unai hahine ena hereva idia hamaoroa.

Iosaia ese ia gwauhamata, Lohiabada do ia kamonai henia

29 King Iosaia ese oda ia gwauraia, vadaeni Iuda bona Ierusalema dekenai idia noho tau badadia be ia dekenai idia haboua. 30 Vadaeni king Iosaia ese idia ia hakaua lao Lohiabada ena Dubu Helaga dekenai. Hahelagaia taudia bona Levi taudia ese king idia bamoa, Iuda taudia ibounai danu, kohu momo taudia bona ogogami taudia. Vadaeni Iosaia ese Taravatu Buka, Lohiabada ena Dubu Helaga lalonai idia davaria gauna, ena hereva ibounai idia dekenai ia duahia hedinarai.

31 Iosaia be Dubu ena du badana ena badibadinai ia gini, bona Lohiabada ena vairana dekenai ia gwauhamata, Lohiabada ena gwauhamata taravatuna do ia kamonai henia, bona Lohiabada ena oda bona iena hadibaia hereva, bona iena taravatu do ia badinaia, mai ena lalona ibounai, bona mai ena kudouna ibounai danu. Ia gwauhamata danu unai Buka lalonai taravatu hereva gaudia ibounai do ia karaia. 32 Bona Iosaia ese Ierusalema bona Beniamina taudia ia oda henidia idia danu unai bamona do idia gwauhamata. Vadaeni Ierusalema dekenai noho taudia ese Dirava, edia sene taudia edia Dirava, ena gwauhamata taravatuna hegeregerena, inai gwauhamata idia karaia.

33 King Iosaia ese kaivakuku ibounai bona dirava koikoi edia laulau gaudia ibounai, dika rohoroho gaudia, Israela taudia edia tano dekenai idia noho gaudia, ia hadikaia ore. Iosaia ese danu ia oda henia, Israela dekenai idia noho taudia ibounai ese Lohiabada, edia Dirava ena hesiai gaukara do idia karaia. Bona Iosaia ena mauri dinadia lalonai, idia be Lohiabada, edia sene taudia edia Dirava, ena dala dekena amo idia raka siri lasi.

Copyright information for `HMO