2 Chronicles 9

Sieba ena kwini ese Israela ia vadivadi henia

Sieba tano ena kwini hahine ese Solomona ena kara, bona Lohiabada ese Solomona ia durua sivarai namona ia kamonai, vadaeni Ierusalema dekenai ia mai, henanadai aukadia dekenai Solomona ena laloa do ia tahua totona. Ierusalema dekenai ia ginidae, mai iena hesiai taudia momo, bona mai iena kamelo, kohu momo, aniani ena mamina hanamoa muramura, golo bona davana bada nadidia idia huaia mai. Solomona dekenai ia ginidae neganai, kwini ese iena henanadai ibounai ia nanadaia. Solomona ese henanadai ibounai dekenai ia haere henia, idia ta be auka lasi ia dekenai. Sieba ena kwini ese Solomona ena aonega ia kamonai, bona iena ruma badana, Solomona ese ia haginia gauna ia itaia. Kwini ese Solomona ena aniani patana danu ia itaia, iena gaukara badana naria taudia edia noho ruma, iena hesiai taudia edia kara, bona edia dabua namodia, Solomona ena kapusi bona aniani mailaia taudia, bona iena boubou karadia Dubu Helaga lalonai danu. Inai gau ibounai ia itaia neganai, kwini ese ia hoa bada.

Kwini ese Solomona ia hamaoroa, ia gwau, “Lauegu tano dekenai oiemu kara bona oiemu aonega ena sivarai lau kamonai, be harihari lau itaia, idia be momokani vadaeni. To unai sivarai lau hamomokania lasi ia mai bona hari lau mai, lau sibona egu matana dekenai lau itaia. Bona momokani, lau idia hamaoroa gauna be kahana sibona! Oiemu aonega bona oiemu kohu momo ese lau kamonai sivarai idia hereaia momokani. Oiemu hesiai taudia be dahaka moale! Oiemu opesa taudia, dina ibounai oiemu vairanai idia gini, bona oiemu aonega hereva idia kamonai noho, be idia laki bada, ani? Lohiabada, oiemu Dirava ita hanamoa be namo! Oi dekenai ia laloa dainai, ia ese Israela ena king oi ia halaoa vadaeni. Lohiabada ese Israela taudia ia ura henia, bona ia ura idia noho hanaihanai dainai, ia ese edia king oi ia halaoa vadaeni, oi ese iena Ladana dainai taravatu bona kota maoromaoro do oi haginia goada totona.”

Vadaeni kwini ese king Solomona dekenai harihari gaudia ia henia, golo ibounai 4000 kilogaram bona aniani ena mamina hanamoa muramura, bona davana bada nadi momo herea. Unai aniani hanamoa muramura edia namo hegeregerena be nega ta Iuda lalonai idia davaria lou lasi.

10 Inai danu, king Hirama bona Solomona ena lagatoi taudia Opiri dekena amo golo idia mailaia gaudia, be Opiri dekena amo danu au namodia, ladana iunipa bona davana bada nadidia idia mailaia. 11 Unai iunipa audia dekena amo king ese Dubu Helaga ena vadavada, bona iena ruma ena vadavada ia karaia. Unai iunipa au dekena amo danu ane abia taudia edia gita bona unai bamona miusiki gadaralaia gaudia idia karaia. Iunipa audia unai bamona haida be Iuda dekenai idia vareai lou lasi, bona unai bamona audia idia itaia lou lasi ia mai bona hari dina.

12 Vadaeni king Solomona ese Sieba ena kwini ia ura gaudia ibounai ia henia. King Solomona ena harihari gaudia ese kwini ena noinoi gaudia idia hereaia momokani. Vadaeni hahine be ia toreisi, iena hesiai taudia danu, bona edia tano korikori dekenai idia giroa lou.

King Solomona ena kohu momo

13 Lagani ta ta ibounai king Solomona dekenai idia mailaia golo ena metau be 23,000 kilogaram. 14 Bona moni haida danu be laolao taudia bona hoihoi taudia bona Arabia king taudia ibounai, bona Israela bona Iuda tano edia biagudia taudia dekena amo Solomona ese ia abia.

15 King Solomona ese golo kesi badadia 200, hama dekenai idia botaia palaka gaudia ia karaia, kesi ta ta dekenai golo ena metau be 7 kilogaram. 16 Ma Solomona ese kesi maragidia 300 ia karaia, idia danu be hama dekenai idia botaia palaka gaudia. Idia ta ta dekenai golo ena metau be 3 kilogaram. King Solomona ese unai kesi be ruma ta ena ladana “Lebanona ena Uda Rumana” lalonai ia atoa.

17 King Solomona ese danu terona badana be elefante edia doana dekena amo ia karaia, bona terona ena kahana be golo namona dekenai ia koua. 18 Inai terona ena vadavada moia audia ibounai 6, bona king ena aena atoa gauna danu, golo dekenai karaia gauna, be terona danu idia karaia tamona. Terona ena imana atoa gabudia ruaosi edia badibadinai be laiona, koroa gaudia, idia gini. 19 Laiona koroa gaudia ibounai 12 be unai vadavada moia audia 6 edia duduna ta ta dekenai idia haginia. Terona ta unai bamona be lasi momokani, basileia idauidau ibounai lalonai.

20 King Solomona ena inua kapusi ibounai be golo. Lebanona ena Uda Rumana lalonai noho mereki, sipunu gaudia ibounai be golo goeva momokani dekenai idia karaia. Solomona ena nega lalonai siliva be davana maragi gauna sibona. 21 Solomona be mai ena lagatoi momo, davara badana dekenai idia laolao gaudia. Idia be Hirama ena lagatoi danu idia heau lao. Lagani toi toi dekena amo idia giroa mai, golo, siliva, elefante edia doana, maniki badadia bona maniki maragidia idia mailaia.

22 King Solomona ese kohu momo dekenai bona aonega dekenai king ibounai ia hereaia momokani. 23 Tanobada ibounai edia king taudia ese Solomona ena aonega, Dirava ese ia henia gauna, idia tahua. Idia ura Solomona dekenai idia mai, iena hereva idia kamonai. 24 Idia ta ta idia mai neganai, edia harihari gaudia idia mailaia, siliva gaudia bona golo gaudia, bona dabua, bona tuari gaudia, aniani ena mamina hanamoa muramura, hosi bona doniki. Unai bamona gaudia be lagani ta ta ibounai idia mailaia.

25 Solomona ese danu kariota bona hosi guia taudia ia haboua. Iena hosi bona kariota rumadia ibounai be 4000, bona iena hosi guia taudia ibounai be 12,000. Idia be kariota edia hanua ta ta dekenai idia noho, bona haida be king danu Ierusalema dekenai idia noho. 26 Solomona ese king ibounai ia biagua, Euperate Sinavai dekena amo ia lao bona Pilistia taudia edia tano, bona ela bona Aigupito ena tano hetoana dekenai.

27 Solomona be king neganai ia ese siliva be gau anina lasi bamona ia halaoa Ierusalema dekenai, tano ena nadi bamona. Bona sida audia danu be momo herea, sikamoa fig audia bamona. 28 Solomona ena hosi be Aigupito dekena amo, bona tano ibounai dekena amo ia hoia.

Solomona ia mase

29 Solomona ena kara oredia, matamaia ela bona dokona, be peroveta tauna Natana ena sivarai, Ahaisa, Silono tauna ena peroveta hereva, bona peroveta tauna Ido ena mata hanai hereva Ieroboama Nebata totona, edia Sivarai Buka lalonai idia torea vadaeni. 30 Solomona be Israela ena kahana ibounai ia gunalaia lagani 40, Ierusalema dekenai. 31 Vadaeni Solomona ia mase bona Davida ena Hanua dekenai idia guria, bona iena natuna Rehoboama ese iena gabuna dekenai king dagi ia abia.

Copyright information for `HMO