2 Kings 11

Atalaia, Iuda ena kwini

Atalaia, king Ahasaia ena sinana, ese ia itaia, iena natuna ia mase. Vadaeni ia ese oda ia gwauraia, Ahasaia ena bese taudia ibounai idia alaia mase. To Ahasaia ena natuna tau, Ioasa, sibona ia heau mauri. Ioasa ena lalana Iehoseba, king Iorama ena natuna hahine, Ahasaia ena taihuna, ese Ahasaia ena natuna Ioasa ia abia, king ena natuna tau, do idia alaia taudia, edia huanai dekena amo. Iehoseba ese mero maragina, Ioasa, hunia dekenai ia hakaua lao, bona mai ena naria hahine danu, mahuta daiutu ta lalonai ia hunia. Unai kara dainai, Atalaia ena taudia ese Ioasa idia alaia lasi. Inai mero Ioasa be lagani 6 lalonai Iehoseba ese ia naria, bona mai ena naria hahine danu, Dubu Helaga ena daiutu ta lalonai, hunia dekenai idia noho. Unai be Atalaia ese Iuda tano ena kwini dagi ia dogoatao noho neganai.

To lagani namba 7 lalonai, hahelagaia tauna Iehoiada ese kwini ena ruma gimaia opesa taudia, bona kwini gimaia taudia danu, be Dubu Helaga dekenai ia boiridia hebou. Inai hebou dekenai idia ibounai ese gwauhamata metauna idia karaia, Iehoiada do ia karaia gauna, be do idia durua. Iehoiada ese king Ahasaia ena natuna, Ioasa, be idia dekenai ia hedinaraia. Bona Iehoiada ese danu inai oda ia gwauraia, ia gwau: “Umui ese orea toi do umui karaia, bona Sabati Dina dekenai, emui orea ginigunana ese king ena ruma do idia gimaia. Bona emui orea iharuana ese Suru magu iduara do idia gimaia, bona emui orea ihatoina ese magu iduara idia gimaia taudia edia murinai do idia gini hegaegae. Inai be king ena ruma do umui naria, bona do umui koua. Emui orea rua, Sabati Dina dekenai idia laga-ani noho orea ruaosi, ese Dubu Helaga dekenai do idia gini noho, king do idia gimaia. King Ioasa do umui gini hagegea noho, umui ta ta mai emui tuari kaia emui imana dekenai, bona daika ese umui kahirakahira idia mai, be do umui alaia mase. King ena lao gabudia ibounai dekenai ia do umui naria bona gimaia.”

Iehoiada ese Ioasa dekenai king dagi ia henia

Inai orea toi edia tuari biagudia ese hahelagaia tauna Iehoiada ena oda hereva idia kamonai henia namonamo. Idia ta ta ese, iena orea, iena orea, Sabati Dina dekenai idia gaukara noho, bona Sabati Dina dekenai idia laga-ani noho taudia, Iehoiada dekenai idia mailaia. 10 Vadaeni Iehoiada ese io bona kesi, gunaguna idia be king Davida ena, bona Dubu Helaga lalonai idia noho tuari gaudia, be ia abia, unai tuari biagudia dekenai ia henidia.

11 Vadaeni gima taudia be edia gabu ta ta dekenai idia gini, edia imadia dekenai be edia tuari kaia. Laini dekenai idia gini, Lohiabada ena Dubu Helaga ena vairana dekenai, diho kahanai ela bona mirigini kahanai, boubou patana badinai, king do idia hagegea, bona gimaia totona.

12 Gima taudia idia gini hegaegae, vadaeni Iehoiada ese Ioasa ia hakaua mai, edia vairana dekenai, bona kwara gauna, korona, be Ioasa ena kwarana dekenai ia atoa. Taravatu Buka ena kopi ta danu ia henia. Vadaeni Iehoiada ese Ioasa ena kwarana dekenai olive dehoro ia bubua, bona Iuda ena king ia halaoa. Unai neganai danu taunimanima ese edia imadia idia patapata, idia boiboi, idia gwau, “King be nega daudau do ia mauri noho!”

13 Kwini Atalaia ese gima taudia, bona taunimanima ibounai edia boiboi regena ia kamonai, vadaeni Dubu Helaga dekenai ia raka vareai. Taunimanima momo idia haboua vadaeni unuseni. 14 Atalaia ese king matamata Ioasa ia itaia, nadi du badana ena badinai ia gini, king matamata edia kara hegeregerena. Tuari biagudia bona kibi hiriria taudia danu king ena badibadinai idia gini noho, bona taunimanima ese mai moale danu idia boiboi, bona kibi idia hiriria noho. Vadaeni Atalaia ese mai gari bada danu iena dabua ia darea, ia boiboi bada, ia gwau, “Kwini hadikaia kara, kwini hadikaia kara!”

15 Iehoiada ia ura lasi Dubu lalonai Atalaia idia alaia mase. Vadaeni ia ese tuari biagudia ia oda henia, ia gwau, “Dubu ena murimurinai Atalaia do umui abia lao, bona bema tau ta ese Atalaia ia hamauria toho neganai, unai tau do umui alaia mase.”

16 Tuari biagudia ese Atalaia idia dogoatao, bona hosi edia raka vareai iduara dalana dekena amo king ena ruma dekenai idia hakaua lao. Unuseni idia ese Atalaia idia alaia mase.

Iehoiada ese dirava koikoi tomadiho henia kara ia koua

17 Hahelagaia tauna Iehoiada ese king Ioasa bona taunimanima dekenai ia hereva goada dainai, idia ese Lohiabada danu gwauhamata metauna idia karaia. Idia gwauhamata idia be Lohiabada ena bese taudia do idia lao momokani. Iehoiada ese danu king bona iena taunimanima edia huanai gwauhamata taravatuna ia haginia. 18 Vadaeni taunimanima be Bala ena dubu dekenai idia lao, idia veria diho, iena boubou patadia bona iena kaivakuku danu idia hamakohia, bona Matana, Bala ena hahelagaia tauna, be boubou patadia edia vairana dekenai idia alaia mase.

Unai neganai Iehoiada ese Dubu Helaga dekenai gima taudia ia atoa.
19 Vadaeni Iehoiada, bona tuari biagudia, bona king gimaia taudia, bona king ena ruma gimaia taudia ese Dubu Helaga dekena amo king idia hakaua lao, ela bona king ena ruma dekenai. Taunimanima ibounai danu be idia edia murinai idia raka. Ioasa be Gima Taudia Edia Magu Iduara dekena amo king ena ruma dekenai ia raka vareai, bona ia be king ena terona dekenai ia helai. 20 Unai dainai, taunimanima ibounai idia moale bada. Bona Atalaia be king ena ruma dekenai idia alaia mase dainai, hanua badana be mai ena maino namona.

21 Ioasa ese Iuda ena king dagi ia abia neganai, iena mauri lagani be 7 sibona.

Copyright information for `HMO