2 Kings 23

Iosaia ese idau dirava tomadiho henia kara ia koua

King Iosaia ese oda ia gwauraia, vadaeni Iuda bona Ierusalema dekenai idia noho tau badadia be ia dekenai idia hebou. Vadaeni king Iosaia ese idia ia hakaua lao Lohiabada ena Dubu Helaga dekenai. Peroveta taudia bona hahelagaia taudia danu ese king idia bamoa, Ierusalema dekenai idia noho taudia ibounai danu, kohu momo taudia bona ogogami. Vadaeni Iosaia ese Taravatu Buka, Lohiabada ena Dubu lalonai idia davaria gauna, ena hereva ibounai, be edia vairanai ia duahia hedinarai. Iosaia be du badana ena badibadinai ia gini, bona Lohiabada ena vairana dekenai ia gwauhamata, Lohiabada ena dala dekenai do ia raka, bona Lohiabada ena oda bona iena hadibaia hereva, bona iena Taravatu do ia badinaia, mai iena kudouna ibounai, bona mai ena laumana ibounai danu. Ia gwauhamata danu, taravatu hereva, unai Buka lalonai torea gaudia ibounai do ia karaia. Vadaeni unai taunimanima ibounai ese Iosaia danu unai bamona idia gwauhamata.

King Iosaia ese Hahelagaia Tauna Badana Hilekaia bona ia henunai hahelagaia taudia, bona dubu iduara naria taudia ia oda henia, idau dirava tomadiho totona gaudia do idia kokia Dubu Helaga dekena amo. Vadaeni Bala bona Asera bona hisiu tomadiho totona kohu ibounai idia abia lao murimurinai. Vadaeni king Iosaia ese unai tomadiho gaudia ibounai hanua ena murimurinai, Kiderona Koura dekenai ia gabua ore. Unai lahi ena kahu be Iosaia ese Betele dekenai ia abia lao. Dirava koikoi edia hahelagaia taudia, guna Iuda ena king ese idia abia hidi, Iuda hanuadia bona Ierusalema dekenai noho ataiai gabudia dekenai muramura mai bonana do idia gabua totona taudia, be Iosaia ese ia hadokoa. Ma Bala dekenai muramura mai bonana idia gabua, bona dina, bona hua, bona noho hebou hisiu, bona hisiu ibounai dekenai unai muramura idia gabua taudia danu, be Iosaia ese ia hadokoa. Iosaia danu ese Dubu Helaga dekena amo Asera ena au tubua ia kokia, Ierusalema hanua ena murimurinai ia abia lao, ela bona Kiderona Koura dekenai. Unuseni Kiderona Sinavai ena badibadinai, Iosaia ese unai Asera au tubua ia gabua, iena kahu ia botaia maragimaragi, pauda dekenai, bona unai pauda be taunimanima edia guria gabudia edia ataiai dekenai ia negea. Lebulebu bona kara bodaga idia karaia, dirava koikoi tomadiho totona ariara tatau bona ariara hahine edia noho rumadia Dubu Helaga lalonai danu, be Iosaia ese ia hadikaia ore. Unai rumadia dekenai hahine ese dabua idia karaia, taunimanima ese Asera idia tomadiho henia neganai idia karaia dabuadia. Hahelagaia taudia ibounai, Iuda hanua badadia idauidau dekenai idia noho, be Iosaia ese Ierusalema dekenai ia abia mai. Bona ataiai dekenai idia noho boubou karaia gabudia ibounai, Iudea dekenai, Geba hanua dekena amo ela bona Bere Sieba hanua dekenai be Iosaia ese ia hadikaia ore. Gabudia be unai, unai hahelagaia taudia ese guna, boubou gaudia idia gabua vadaeni. Ma Ierusalema ena magu iduara badana ena lauri kahana dekenai idia noho ataiai tomadiho koikoi gabudia, Iosua, hanua ena gavana gunana ese ia haginia gaudia, be Iosaia ese ia makohia ore. Unai Ierusalema dekenai ia mailaia hahelagaia taudia be Lohiabada ena boubou patana Ierusalema dekenai boubou karadia idia karaia diba lasi, to mai hatubua gauna lasi paraoa idia ania hebou diba, edia bamona hahelagaia taudia danu.

10 Iosaia ese danu dirava koikoi ladana Topete ena tomadiho gabuna, Hinoma Koura dekenai ia hadikaia ore. Unai dainai tau ta ese iena natuna mero o kekeni ia henia diba lasi, boubou totona, Moleka ena lahi lalonai. 11 Iosaia ese danu hosi edia laulau, guna Iuda ena king taudia ese idia hahelagaia, dina hanamoa totona, ia kokia momokani, Lohiabada ena Dubu Helaga ena raka vareai gabuna dekena amo. Unai hosi laulau gaudia be guna hesiai tauna badana ladana Natana Meleka ena daiutu ena badibadinai idia gini noho. Iosaia ese kariota, dina idia hanamoa totona gaudia, danu be ia gabua ore.

12 Bona Iosaia ese pata helagadia, Ahasa ena ataiai daiutu ena guhi latanai, Iuda ena king taudia ese idia karaia gaudia ia veria diho. Bona boubou patadia, Manase ese Lohiabada ena Dubu Helaga ena ariara ruaosi dekenai ia haginia gaudia, be Iosaia ese ia negea diho, ia hamakohia maragimaragi, bona edia kahu be Kiderona Sinavai dekenai ia negea.

13 King Iosaia ese danu ataiai gabudia Ierusalema ena dina daekau kahana dekenai ia hadikaia. Unai ataiai gabudia be Olive Ororo ena diho kahanai. Bona unai gabudia be king Solomona ese ia haginia, Asataroto, Sidono taudia edia dirava dikana, bona Kemoso, Moaba taudia edia dirava dikana, bona Milekoma, Amono taudia edia dirava dikana tomadiho henia totona. 14 Iosaia ese danu nadi du helagadia ia hamakohia, bona Asera ena au tubua ia utua maragimaragi, bona guna idia noho ena tano be mase taudia edia turia dekena amo ia hahonua.

15 Boubou patana ta, Betele dekenai Ieroboama Nebata ese ia haginia gauna, be Iosaia ese ia negea diho, edia nadi ia makohia maragimaragi, kahu sibona ia halaoa. Guna unai Ieroboama ese Israela ia hakaua kerere momokani. Iosaia ese danu Betele dekenai ia noho Asera ena kaivakuku ia gabua ore. 16 Vadaeni Iosaia ese ia giroa, iena matana ia negea, guria gabudia haida ia itaia ororo dekenai. Ia ese hesiai taudia ia siaia, idia ese mase taudia edia turia, guria gabuna dekenai idia kokia, vadaeni boubou patana dekenai unai turia idia gabua. Inai kara dekenai Iosaia ese unai boubou patana ia hamiroa, peroveta tauna gunana ese ia peroveta herevana hegeregerena. Unai peroveta hereva be king Ieroboama ena nega lalonai, Ieroboama be unai boubou patana ena badinai ia gini neganai. King Iosaia ese ma iena matana ia negea, unai kara guna ia perovetalaia tauna, ena guria gabuna ia itaia.

17 King Iosaia ese Betele taudia ia nanadaia, ia gwau, “Unai guria gabuna be daika ena?”

Betele taudia idia haere, idia gwau, “Unai be Dirava ena peroveta tauna ena guria gabuna. Ia be Iuda dekena amo ia mai, bona Betele boubou patana hadikaia karana, oi ese oi karaia vadaeni, be ia ese ia gwauraia guna.”

18 Iosaia ia gwau, “Unai guria gabuna be do umui kehoa lasi, unai peroveta tauna ena turia be unuseni do idia noho.”

Unai dainai iena turia, bona peroveta tauna ta, Samaria dekena amo ia mai tauna ena turia, be idia kokia lasi.

19 Samaria hanua edia ataiai gabudia helagadia ibounai danu, Israela ena king ese idia karaia, bona unai dainai Lohiabada idia habadua gaudia, be Iosaia ese ia kokia, Betele dekenai ia karaia hegeregerena. 20 Bona unai ataiai gabudia, dirava koikoi dekenai boubou idia karaia hahelagaia taudia, be Iosaia ese ia alaia mase. Edia boubou patadia edia latanai ibounai ia alaia, bona unai mase taudia edia turia be unai boubou patadia ibounai edia latanai ia gabua ore. Unai neganai Iosaia ese Ierusalema dekenai ia giroa lou.

Iosaia ese Pasova aria ia karaia

21 Vadaeni Iosaia ese iena taunimanima ibounai ia oda henia, ia gwau, “Lohiabada, emui Dirava ena Pasova aria do umui karaia, inai Taravatu Buka dekenai ia torea hegeregere.” 22 Badina be unai bamona Pasova be idia karaia lasi, Gunalaia Taudia ese Israela idia gunalaia edia dina ia mai bona hari. Israela ena king ta o Iuda ena king ta ese danu edia dina lalonai Pasova aria ta unai bamona idia karaia lasi. 23 To king Iosaia ena king lagani 18 lalonai, Pasova aria be Ierusalema dekenai idia karaia, Lohiabada hanamoa totona.

Lohiabada ese Iuda ia badu henia noho

24 Meamea taudia bona lauma tahua taudia bona laulau helagadia bona kaivakuku, bona kara dika herea gaudia ibounai Iuda dekenai bona Ierusalema dekenai idia itaia diba gaudia, be Iosaia ese ia kokia haorea. Inai bamona ia karaia, unai Taravatu Bukana, Hahelagaia Tauna Badana Hilekaia ese Dubu Helaga lalonai ia davaria Bukana ia torea gaudia do ia badinaia momokani totona. 25 Nega gunadia lalonai, king ta be lasi Iosaia hegeregere, Lohiabada ena hesiai gaukara ia karaia mai ena laumana ibounai, mai ena kudouna ibounai, bona mai ena goada ibounai danu, Mose ena taravatu ibounai hegeregere. Bona Iosaia ena dina murinai danu king ta lasi ia toreisi, Iosaia hegeregerena.

26 To Lohiabada ena badu mai siahu bada be do ia keru lasi. Ena badu be Iuda tano dekenai ia toreisi, king Manase ena kara dika rohoroho dainai, bona inai badu be do ia siahu noho. 27 Lohiabada ia gwau, “Lau ese Iuda taudia danu be lauegu vairana dekena amo do lau kokia lao, Israela taudia lau kokia lao hegeregere. Bona Ierusalema, lau abia hidi hanua, do lau negea, bona inai Dubu, lau herevalaia, lau gwau, ‘Lauegu Ladana be unuseni do ia noho,’ inai Dubu do lau negea diho.”

King Iosaia ia mase

28 King Iosaia ena kara ma haida, inai buka ese ia torea lasi gaudia, bona iena kara ibounai, be Iuda Ena King Taudia Edia Sivarai Buka lalonai idia torea vadaeni.

29 Iosaia ia king neganai Farao Neko, Aigupito ena king, mai ena tuari orea be Asuria king dekenai durua idia henia gwauraia, Euperate Sinavai dalana dekenai idia lao. King Iosaia ese Aigupito ena tuari taudia ia koua toho. Vadaeni Farao Neko ese Iosaia ia itaia neganai ia alaia mase, Megido dekenai. 30 Iena hesiai taudia ese kariota ta dekena amo Iosaia idia abia lao, Megido ela bona Ierusalema. Vadaeni iena guria gabuna korikori dekenai idia guria.

Vadaeni Iuda taudia ese Iehoahasa, Iosaia ena natuna idia abia, iena kwarana dekenai olive dehoro idia bubua, king idia halaoa, iena tamana ena gabu dekenai.

Iehoahasa, Iuda ena king

31 Iehoahasa ese Iuda ena king dagi ia hamatamaia neganai iena mauri lagani be 23, bona ia be hua toi sibona Ierusalema dekenai ia king. Iehoahasa ena sinana be Hamutala, Ieremia, Libina hanua tauna ena natuna.

32 Iena sene taudia edia kara bamona, Iehoahasa ese Lohiabada ena vairana dekenai kara dika ia karaia. 33 To Neko, Aigupito ena king ese king Iehoahasa ia abia mauri Ribila hanua, Hamata tano dekenai. Bona takisi moni siliva 3400 kilogaram, bona golo 34 kilogaram be Neko ese Iuda dekena amo ia abia. 34 King Neko ese Iosaia ena natuna tau Eliakimi dekenai Iuda ena king dagi ia henia, Iosaia ena gabu dekenai. Neko ese Eliakimi dekenai ladana matamata ia henia, Iehoiakimi. Neko ese Iehoahasa ia abia lao Aigupito dekenai, unuseni Iehoahasa ia mase.

Iehoiakimi, Iuda ena king

35 Iehoiakimi ese Iuda taudia dekena amo siliva bona golo ia abia, ta ta edia kohu ena bada hegeregerena, Farao Neko ena takisi moni do ia henia totona. 36 Iehoiakimi ese Iuda ena king dagi ia abia hamatamaia neganai iena mauri lagani be 25, bona lagani 11 lalonai Ierusalema dekenai ia king. Iena sinana be Sebida, Pedaia, Rumaha hanua tauna ena natuna. 37 Iena sene taudia edia kara bamona, Iehoiakimi ese Lohiabada ena vairana dekenai kara dika ia karaia.

Copyright information for `HMO