2 Kings 3

Iorama ese Israela ena king dagi ia abia

Iehosapata, Iuda ena king, ena lohia lagani namba 18 lalonai, Iorama, Ahaba ena natuna, be Israela ena king dagi ia abia, Samaria dekenai. Iorama ena lohia lagani be 12. Ia ese Lohiabada ena vairanai ia kara dika, to iena tamana bona sinana hegeregerena lasi, badina be Bala ena nadi badana, tomadiho henia gauna, iena tamana ese ia haginia gauna, be Iorama ese ia veria diho. To Ieroboama Nebata ena kara dika, unai dekena amo Israela taudia kerere dekenai ia hakaudia gaudia, be Iorama ese ia dogoatao noho, ia rakatania lasi.

Mesa, Moaba ena king ese mamoe momo ia ubua, bona lagani ta ta ibounai Mesa ese mamoe natudia 100,000, bona mamoe 100,000 edia huina Israela ena king dekenai ia henia. To Ahaba, Israela ena king ia mase neganai, Mesa ese Israela ena king dekenai ia dagedage.

Vadaeni maoromaoro king Iorama ese Samaria ia rakatania, bona iena tuari taudia ibounai ia haboua. Ia ese Iehosapata, Iuda ena king dekenai hereva ia siaia, ia gwau, “Moaba ena king ese lau ia dagedage henia, mani emu kara lau do oi durua diba, vadaeni ita ese ia do ita tuari henia?”

King Iehosapata ia haere, ia gwau, “Io, lau bona egu tuari taudia, bona egu hosi danu ese oi do ai durua.”
Ma ia gwau, “Edena dala dekena amo do ita lao?”

King Iorama ia haere, ia gwau, “Edoma ena tano kaukau dekena amo do ita lao, dala daudauna.”

Vadaeni Israela ena king Iorama, Iuda ena king, bona Edoma ena king idia toreisi, bona dina 7 lalonai idia raka lao, ela bona edia ranu ia ore. Tuari taudia totona, bona edia kohu huaia hosi totona, bona doniki totona danu, be ranu ia noho lasi.

10 King Iorama ia gwau, “Dika ita davaria inai, Lohiabada ese ita king toiosi ia haboua vadaeni, Moaba ena king ena siahu henunai ita do ia atoa totona!”

11 King Iehosapata ese idia ia nanadaia, ia gwau, “Peroveta tauna ta iniseni ia noho, a? Ia dekena amo Lohiabada do ita nanadaia, ani?”

Vadaeni king Iorama ena tuari biaguna ta ia haere, ia gwau, “Elisaia, Sapata ena natuna be iniseni. Guna ia ese Elia ena hesiai gaukara ia karaia.”

12 King Iehosapata ia gwau, “Elisaia be Lohiabada ena peroveta tauna korikori.” Vadaeni king toiosi be Elisaia dekenai idia lao.

13 Elisaia ese Israela ena king dekenai ia gwau, “Badina dahaka lau ese oi do lau durua? Namona be oiemu tamana bona sinana edia peroveta taudia dekenai do oi lao.”

Iorama ese ia haere, ia gwau, “Lasi! Lohiabada ese ai king taudia toiosi ia haboua vadaeni, Moaba ena king ena siahu henunai ai do ia atoa totona.”

14 Elisaia ia haere, ia gwau, “Ia mauri noho Lohiabada, iena hesiai kara lau karaia noho Dirava ena ladana dekenai lau gwau, King Iehosapata lau matauraia dainai, oi dekenai lau kamonai inai. Bema ia be lasi, lau ese oi do lau itaia lasi, bona oi do lau durua lasi. 15 Vadaeni, gita gadaralaia diba tauna ta do oi hakaua mai lau dekenai.”

Gita tauna ese miusiki ia gadaralaia neganai, Lohiabada ena siahu ese Elisaia ia abia,
16 bona Elisaia ia gwau, “Lohiabada ese inai bamona ia hereva, ia gwau: ‘Inai koura ena sinavai kaukauna lalonai lau ese ranu gabudia do lau karaia.’ ” 17 Ma Elisaia ia hereva, ia gwau, “Lohiabada ia gwau, lai o medu do umui itaia lasi, to inai sinavai be ranu dekenai do lau hahonua. Umui, emui boromakau, bona emui hosi bona doniki be ranu momo do idia inua.”

18 Ma Elisaia ia gwau, “To inai kara be auka lasi Lohiabada dekenai, do ia karaia haraga. Bona ia ese danu Moaba taudia dekena amo kwalimu umui dekenai do ia henia. 19 Umui ese edia hanua namodia ibounai mai edia magu danu do umui halusia. Umui ese danu edia au namodia ibounai do umui utua diho, bona edia ranu guri ibounai do umui koua. Edia uma gabu namodia ibounai dekenai, nadi momo do umui negea, unai tano do umui hadikaia.”

20 Daba rere neganai, boubou gaudia Lohiabada dekenai idia gabua ena nega dekenai, ranu be Edoma kahana dekena amo ia heau mai, ela bona unai tano ibounai be ranu ese ia hahonua.

21 Moaba taudia ibounai idia kamonai, unai king toiosi be idia tuari henia totona idia mai vadaeni. Unai dainai Moaba dekenai idia noho tatau ibounai, tuari gaudia idia gaukaralaia diba taudia ibounai, be Edoma tano hetoana dekenai idia haboua, tuari totona idia naria noho. 22 Idia be dabai idia toreisi, bona ranu ena kopina dekenai dina ia diaridiari noho, iena toana be kakakaka, rara bamona. 23 Vadaeni inai Moaba taudia idia gwau, “Inai be rara, momokani unai king toiosi be idia sibona ta ta dekenai idia tuari vadaeni, bona ala-ala bada ia vara vadaeni! Moaba taudia e, do ita lao, bona edia kamepa ena kohu ibounai do ita abia!”

24 To idia be Israela ena kamepa dekenai idia ginidae neganai, Israela taudia ese idia tuari henidia auka herea, bona Moaba taudia idia heau. Israela taudia ese Moaba taudia idia lulua lao noho, bona idia aladia noho, 25 bona Moaba hanuadia idia hadikaia ore. Bona Israela taudia ta ta ibounai ese nadi ta ta be Moaba uma gabudia edia latanai idia negea, ela bona unai uma ibounai be nadi ese idia koua. Ma Israela taudia ese Moaba ena ranu guri ibounai idia koua, bona au namodia idia utua diho. Ela bona Kiri Haresete, Moaba ena hanua badana sibona ia noho. Vadaeni varo dekena amo nadi idia negea Israela taudia ese unai hanua idia hagegea, bona idia tuari henia.

26 Moaba ena king ia diba, tuari be ia lusi vadaeni. Unai dainai ia ese tuari taudia 700 mai edia tuari kaia ia haboua, iena vairana dekenai do idia raka lao gwauraia, unai dala dekenai do ia heau mauri Suria ena king dekenai totona. To idia hegeregere lasi.

27 Vadaeni Moaba ena king ese iena natuna vara guna, iena gabu, king dagi do ia abia tauna, ia dogoatao, bona hanua ena magu ena latanai, Moaba ena dirava ena boubou gauna totona ia alaia mase. Vadaeni unai badu ena siahu herea, be Israela taudia edia latanai ia ginidae, bona idia gari bada dainai, idia ese unai hanua idia rakatania, edia tano korikori dekenai idia giroa lou.

Copyright information for `HMO