2 Kings 5

Namana ena lepera gorere be Elisaia ese ia hanamoa

Namana be Suria edia king ena tuari biaguna badana. King ese Namana ia matauraia bada, badina be Namana dainai Lohiabada ese kwalimu bada Suria dekenai ia henia. Namana be goada bona boga auka tauna, to ia be lepera gorere ia abia tauna.

Suria taudia ese idia edia tuari dekenai Israela kekeni maragina ta idia abia mauri. Unai kekeni ese Namana ena adavana ena hesiai gaukara ia karaia. Dina ta kekeni ese iena biaguna hahine ia hamaoroa, ia gwau, “Bema lauegu biaguna ese Samaria dekenai ia noho peroveta tauna dekenai ia lao neganai, iena lepera gorere do ia ore.” Unai dainai Namana be iena biaguna dekenai ia lao, bona Israela kekeni ena hereva ia hadibaia. Suria ena king ia gwau, “Namo, oi lao, bona inai egu revareva be Israela ena king dekenai do oi henia.”

Unai dainai Namana ia lao, siliva moni 30,000 bona golo moni 6000, bona dabua namodia 10 ia abia lao.
Israela ena king dekenai ia abia lao revareva be inai bamona ia torea: “Inai revareva oi davaria neganai, lau ura oi diba lauegu hesiai tauna Namana be inai. Oi dekenai lau siaia inai, iena lepera gorere do oi hanamoa totona.”

Israela ena king ese inai revareva ia duahia neganai, mai gari danu iena dabua ia darea, ia gwau, “Lau be Dirava, a? Taunimanima lau hamasea bona lau hamauria diba, a? Suria ena king be edena bamona ia laloa lau ese inai tau lau hanamoa diba? Lau laloa ia ura tuari ta lau dekenai ia hamatamaia gwauraia.”

Elisaia, Dirava ena tau ia kamonai Israela ena king ese iena dabua ia darea, vadaeni ia ese hereva ia siaia lao king dekenai, ia gwau, “Badina dahaka oiemu dabua oi darea? Unai lepera tauna lau dekenai do oi siaia, vadaeni do ia diba, peroveta tauna ta Israela dekenai ia noho.”

Unai dainai Namana be mai ena hosi bona mai ena kariota danu ia lao, Elisaia ena ruma iduara ena vairana dekenai ia gini. 10 Elisaia ese hesiai tauna ta Namana dekenai ia siaia, ia gwau, “Oi lao, Ioridane Sinavai lalonai do oi digu nega 7, vadaeni oiemu kopina be do ia namo lou, bona do oi goeva.”

11 To Namana be ia badu, ia raka siri, ia gwau, “Lau laloa Elisaia be lau dekenai do ia mai, do ia gini, bona Lohiabada, iena Dirava ena ladana dekenai do ia guriguri, bona iena imana dekenai lauegu hisihisi gabuna do ia dahua. Unai dekena amo lauegu lepera gorere do ia ore, lau laloa. 12 Damaseko sinavai Abana bona Parapara, ese Israela sinavai ibounai idia hereaia momokani, ani? Unai lauegu tano ena sinavai lalonai do lau digu lasi, a? Vadaeni unai neganai do lau goeva, a?” Vadaeni ia raka siri, mai ena badu danu ia raka lao.

13 To iena hesiai taudia be ia kahirakahira idia raka, idia gwau, “Lohia e, peroveta tauna ese bema kara aukana oi dekenai ia gwauraia neganai, oi be do oi karaia, ani? Unai dainai inai oi dekenai ia gwauraia gauna, ‘Oi digu, bona do oi goeva’, be do oi karaia namo.”

14 Vadaeni Namana ese ia diho lao, bona Ioridane Sinavai lalonai nega 7 iena tauanina ia atoa diho, Elisaia ese ia hamaoroa hegeregerena. Vadaeni iena kopina be ia namo lou,

15 Namana be Elisaia dekenai ia giroa lou, mai iena orea taudia ibounai danu. Elisaia ena vairanai Namana ia gini, ia gwau, “Harihari lau diba tanobada ibounai lalonai Dirava ta be lasi, to Israela ena Dirava sibona. Unai dainai mani emu kara, harihari gauna lau dekena amo do oi abia.”

16 To Elisaia ia gwau, “Mauri Lohiabada, iena hesiai lau karaia Diravana ena ladana dekenai lau gwauhamata inai, gau ta do lau abia lasi.” Namana ese Elisaia ia noia lou, iena harihari gauna do ia abia, to Elisaia ese ia abia lasi.

17 Vadaeni Namana ia gwau, “Bema oi abia lasi, lau be oi dekenai lau noinoi, mani emu kara, tano sisina lau dekenai do oi henia, doniki rua idia huaia diba hegeregere. Badina harihari ia lao, lau ese boubou karadia do lau karaia neganai, dirava ta dekenai do lau henia lasi, to Lohiabada sibona dekenai do lau henia. 18 Inai kara tamona dekenai lau ura Lohiabada ese lau do ia bogahisihisi henia. Lauegu king danu Rimono, Suria ena dirava tomadiho henia totona iena dubu ai raka vareai lao neganai, Lohiabada ese lau do ia bogahisihisi henia. Lau ese Rimono ena vairanai king danu lau tui diho neganai, lau noinoi Lohiabada ese inai lauegu dika do ia gwauatao.”

19 Elisaia ese ia hamaoroa, ia gwau, “Mai maino danu do oi lao.”

To Namana be do ia daudau momokani lasi neganai,
20 Gehasi, Elisaia ena hesiai tauna be sibona dekenai ia gwau, “Ia! Lauegu biaguna ese Namana, Suria tauna ia bogahisihisi henia, bona iena moni davana ta ia abia lasi! Lohiabada ia mauri noho momokani hegeregerena, lau ese Namana ena murinai do lau heau lao, gau ta ia dekena amo do lau abia!”

21 Unai dainai Gehasi be Namana ena murinai ia heau. Namana ese tau ta ia itaia, iena murinai ia mai noho, vadaeni iena kariota dekena amo ia diho, ia hedavari totona. Ia gwau, “Oi edena bamona? Namo, o?”

22 Gehasi ia gwau, “Namo. Lauegu biaguna ese lau ia siaia, ia gwau, ‘Peroveta eregabe taudia rua be harihari sibona Eparaima ena ororo dekena amo idia ginidae, bona oi dekenai ia noinoi, ia gwau, Mani emu kara, siliva moni 3000, bona dabua namodia rua do oi henidia.’ ”

23 Namana ia haere, ia gwau, “Mani emu kara siliva moni 6000 do oi abia.” Ia noia dainai, Gehasi ese ia abia dae. Vadaeni Namana ese siliva be puse rua lalonai ia udaia, iena hesiai taudia rua dekenai ia henia, dabua namo herea rua danu. Iena hesiai taudia be kohu idia huaia, Gehasi ena vairana dekenai idia raka lao. 24 Idia be ororo dekenai idia ginidae, Elisaia ena noho gabuna, vadaeni Gehasi ese kohu be hesiai taudia dekena amo ia abia, iena ruma dekenai ia atoa. Unai neganai Gehasi ese Namana ena hesiai taudia ia siaia lou.

25 Gehasi be ia raka vareai, iena biaguna ena vairanai ia gini. Elisaia ese ia nanadaia, ia gwau, “Gehasi e, edeseni oi lao?”

Ia gwau, “Lohia e, lau be gabu ta dekenai lau lao lasi.”

26 To Elisaia ese Gehasi ia gwau henia, ia gwau, “Lauegu lauma be oi dekenai ia noho lasi, a? Unai tau be iena kariota dekena amo ia diho, oi do ia hedavari totona, lauegu lauma ese ia itaia! Inai be kohu abia negana lasi! Inai be moni, bona dabua, olive bona vain umadia, o mamoe, or boromakau, o hesiai taudia abia negana lasi!

27 “Unai dainai Namana ena lepera gorere be oi dekenai do ia kamokau, bona oiemu natuna bona tubudia danu dekenai do ia kamokau, ela bona hanaihanai.” Unai neganai, Gehasi be Elisaia ena ruma ia rakatania, mai lepera gorere danu, iena kopina be kurokuro momokani, sinou bamona.

Copyright information for `HMO