2 Kings 6

Ira be ranu dekenai ia hure

Peroveta orea taudia, Elisaia ese ia naria taudia ese Elisaia idia hamaoroa, idia gwau, “Oiemu ruma, ai noho gabuna, be maragi herea. Mani emu kara, Ioridane Sinavai do ai lao, ai ta ta ese au ta ta do ai abia, vadaeni aiemai noho gabuna ta unuseni do ai karaia.”

Elisaia ia haere, ia gwau, “Vadaeni, umui lao.”

Idia ta ia gwau, “Mani emu kara, oi danu be ai danu do ita lao.”

Elisaia ia haere, ia gwau, “Vadaeni, ita lao.”
Ia be idia danu ia lao.

Ioridane Sinavai dekenai idia ginidae, vadaeni idia ese au haida idia utua diho.
Vadaeni tau ta ese au ta ia utua neganai, iena ira kwarana be sinavai ranu dekenai ia moru. Vadaeni ia boiboi bada, ia gwau, “Lohia e, madi lau be dika, unai ira be lau abiatorehai.”

Elisaia ia nanadaia, ia gwau, “Edeseni ia moru?”

Tau ese ranu lalonai ia moru gabuna be ia hedinaraia, vadaeni Elisaia ese au ta ia utua, unai gabu dekenai ia negea diho. Unai neganai, unai auri ira kwarana be ia hure daekau.
Elisaia ia gwau, “Oi ese sinavai dekena amo do oi abia isi.” Vadaeni ia ese iena imana ia atoa diho lao, ira kwarana ia abia.

Elisaia ese Suria taudia dekena amo ia kwalimu

Nega ta, Suria ena king ese Israela ia tuari henia neganai, iena tuari biaguna taudia danu idia herevahereva, vadaeni gabu ta ia gwauraia, unuseni do idia kamepa.

Dirava ena tau Elisaia ese Israela ena king dekenai hereva ia siaia, ia sisiba henia, ia gwau, “Unai gabu kahirakahira do umui lao lasi, badina Suria taudia ese unuseni umui do idia tuari henia.” 10 Unai dainai Israela ena king ese unai gabu idia noho taudia ia sisiba henia, vadaeni idia naria namonamo dainai, dika ta idia abia lasi. Inai bamona ia vara nega momo.

11 Suria ena king be unai kara dainai iena lalona ia hekwarahi bada. Vadaeni ia ese iena hesiai taudia ia boiria, idia ia gwau henia, ia gwau, “Iseda huanai be daika ese Israela ena king ia durua noho?”

12 Idia ta ia haere, ia gwau, “Lauegu lohia bona king e, ai ta lasi, to Elisaia, peroveta tauna Israela dekenai ia noho. Ia ese oiemu mahuta patana dekenai oi gwauraia herevana be Israela ena king ia hamaoroa noho.”

13 Suria ena king ia gwau, “Oi lao, iena noho gabuna do oi davaria, vadaeni tau haida do lau siaia, do idia dogoatao.”

Tau haida ese king idia hamaoroa, idia gwau, “Elisaia be Dotana dekenai.”

14 Vadaeni king ese tuari taudia momo, hosi bona kariota momo ia siaia lao. Idia be hanuaboi lalonai idia lao, Dotana hanua idia koua hagegea.

15 Elisaia ena hesiai tauna be daba maragi neganai ia toreisi, ruma dekena amo ia raka, tuari orea ta, mai hosi bona kariota ia itaia, idia ese hanua idia koua hagegea. Hesiai tauna ese Elisaia ia hamaoroa, ia gwau, “Lohia e, madi ita be dika! Edena bamona do ita karaia?”

16 Elisaia ia gwau, “Oi gari lasi, badina be ita idia durua taudia be momo, to unai orea idia durua taudia be momo lasi.”

17 Vadaeni Elisaia ia guriguri, ia gwau, “Lohiabada e, oi dekenai lau noinoi, iena matana do oi kehoa, ia itaia diba totona.” Unai dainai Lohiabada ese unai hesiai tauna ena matana ia kehoa, ia itaia, ororo be lahi kariota dekenai idia honu, idia ese Elisaia ia noho gabuna idia hagegea noho.

18 Vadaeni Suria taudia idia heau diho, Elisaia do idia abia totona. Unai neganai Elisaia ese Lohiabada ia noia, ia gwau, “Lau noinoi, inai Suria orea edia matana do oi hakepulua.” Unai dainai Lohiabada ese tuari orea edia matana ia koua, Elisaia ena noinoi hegeregere.

19 Elisaia ese unai Suria tuari taudia ia hereva henia, ia gwau, “Umui ura raka lao dalana be inai dala lasi, bona umui ura davaria hanua be inai hanua lasi. Lauegu murinai do umui raka, lau ese umui do lau hakaua, umui tahua noho tauna dekenai.” Vadaeni Elisaia ese idia ia hakaua lao, ela bona Samaria.

20 Samaria dekenai idia raka vareai, vadaeni maoromaoro Elisaia ia gwau, “Lohiabada e, edia matana do oi kehoa, do idia itaia.” Unai dainai Lohiabada ese unai Suria taudia edia matana ia kehoa, vadaeni idia itaia, idia be Samaria hanua ena lalonai.

21 Israela ena king ese idia ia itaia neganai, ia ese Elisaia ia nanadaia, ia gwau, “Lohia e, lau ese idia do lau alaia mase, ani?”

22 Elisaia ese ia haere henia, ia gwau, “Lasi, idia do oi alaia lasi. Tuari dekenai oi abia mauri taudia be oi ese oi alaia mase, a? Lasi, to aniani bona ranu idia dekenai oi henia, do idia aniani bona ranu do idia inua, vadaeni edia king dekenai do idia giroa lou.”

23 Unai dainai Israela ena king ese aria badana ia abia hegaegae, vadaeni idia aniani bona inua danu. Unai murinai ia siaidia lao, edia king dekenai idia giroa lou. Vadaeni unai nega lalonai, Suria taudia ese edia tuari Israela tano dekenai idia hadokoa.

Suria taudia ese Samaria idia koua hagegea

24 To gabeai Benehadada, Suria ena king ese iena tuari taudia ibounai ia haboua, Samaria hanua dekenai idia lao, idia koua hagegea. 25 Samaria hanua lalonai be hitolo bada herea ia vara, idia koua hagegea dainai. Hitolo dainai doniki ena kwarana ta idia hoia, davana be siliva moni 80, bona pune ena kukuri ena metau 200 garam ena davana be siliva moni 5.

26 Nega ta Israela ena king be hanua ena magu latanai ia raka lao neganai, hahine ta ese ia dekenai ia boiboi, ia gwau, “Lauegu lohia bona king, mani oi durua lau.”

27 King ia gwau, “Bema Lohiabada ese oi ia durua lasi, lau ese edena bamona oi lau durua diba? Lau be mai egu uiti o uaina, a?” 28 King ese hahine ia nanadaia, ia gwau, “Oiemu laloa hekwarahi be dahaka?”

Hahine be ia haere, ia gwau, “Inai hahine ta be lau dekenai ia hereva, ia gwau, ‘Oiemu natuna be hari dina do ita ania, vadaeni kerukeru lauegu natuna be do ita ania.’
29 Unai dainai ai ese lauegu natuna ai nadua, ai ania. Kerukeru lau ese lau hamaoroa, lau gwau, ‘Oiemu natuna ma do ita ania,’ to ia ese iena natuna ia hunia.”

30 King ese hahine ena hereva ia kamonai neganai iena dabua ia darea. Bona magu kahirakahira idia noho taunimanima ese idia itaia, iena dabua henunai be puse dabua ia karaia. 31 Vadaeni ia gwau, “Hari dina dekenai, bema Elisaia Sapata ena kwarana idia utua oho lasi neganai, Dirava ese lau ia alaia namo!” 32 Vadaeni king ese hesiai tauna ta ia siaia, Elisaia do ia abia totona.

Elisaia be iena ruma dekenai ia helai noho, bona tau badadia haida be ia danu idia helai. King ena hesiai tauna do ia ginidae lasi neganai, Elisaia ese tau badadia ia hamaoroa, ia gwau, “Unai ala-ala tauna ese iena hesiai tauna ta ia siaia vadaeni, lauegu kwarana do ia utua oho totona. Hesiai tauna ia ginidae neganai, iduara do umui koua auka, do ia vareai lasi.” King be iena murinai ia raka mai noho.

33 Elisaia be do ia hereva noho neganai, king be ia dekenai ia ginidae, ia gwau, “Inai hitolo bada be Lohiabada dekena amo. Lohiabada ena durua do lau naria noho ena anina be dahaka?”

Copyright information for `HMO