2 Samuel 16

Davida bona Siba

Davida ese ororo ataiai sisina ma ia raka hanaia, vadaeni ia be Siba, Mepiboseta ena hesiai tauna danu ia hedavari. Siba ese doniki rua ia hakaua, edia maduna be beredi 200, vain huahua kaukaudia kumia gaudia 200, au huahua idauidau 100, bona uaina kopina ta.

King Davida ese Siba ia nanadaia, ia gwau, “Badina dahaka inai aniani oi mailaia?”

Siba ia haere, ia gwau, “Doniki be oiemu famili taudia do idia guia totona, beredi bona au huahua be oiemu orea taudia do idia ania totona, bona uaina be taunimanima noho lasi tano dekenai idia manori neganai do idia inua totona.”

King Davida ia gwau, “Mepiboseta, oiemu biaguna Saulo ena tubuna be edeseni?”

Siba ia haere, ia gwau, “Mepiboseta be Ierusalema dekenai ia noho. Ia laloa Israela taudia ese iena tubuna Saulo ena basileia be do idia henia lou ia dekenai.”

King Davida ese Siba ia hamaoroa, ia gwau, “Oi kamonai, Mepiboseta ena gau ibounai harihari be oiemu.”

Siba ia gwau, “Lau ese oi lau tomadiho henia, lauegu lohia bona king, lau dekenai do oi laloa namo hanaihanai.”

Davida bona Simei

King Davida be Bahurimi dekenai ia ginidae, vadaeni Saulo ena varavara ta, Simei be unuseni. Ia be Davida dekenai ia raka mai. Ia raka noho neganai, ia ese Davida ia hereva dika henia. Simei ese nadi dekena amo Davida ia hodoa, bona ia ese king Davida ena hesiai taudia danu ia hodoa. Hanua taudia ibounai bona Davida ena tuari taudia ese Davida idia hagegea, to Simei be unai bamona ia karaia noho. Bona Simei ese Davida ia gwau henia noho, ia gwau, “Rara habubua tauna e, ala-ala tauna dikana, oi siri, oi siri! Oi ese Saulo ena basileia oi abia neganai, Saulo ena varavara momo oi alaia mase. Inai dika dainai, Lohiabada ese oi ia panisia noho. Lohiabada ese Basileia oiemu natuna Abesaloma dekenai ia henia vadaeni. Kamonai, oiemu dika ese oi sibona ia hadikaia inai, badina be oi be rara habubua tauna.”

Vadaeni Abisai Seruia ese king Davida ia hereva henia, ia gwau, “Badina dahaka inai sisia masena ese lauegu lohia bona king ia hereva dika henia noho? Mani do lau lao, iena kwarana do lau utua oho.”

10 To king Davida ia gwau, “Lasi, inai be lauegu kerere totona, oi be lasi. Bema lau dekenai ia hereva dika henia, Lohiabada ese unai bamona ia hamaoroa dainai, daika ese iena kara ia koua diba?”

11 Bona Davida ese Abisai bona iena hesiai taudia ibounai ia hamaoroa, ia gwau, “Umui kamonai, lauegu natuna korikori ese lauegu mauri ia utua gwauraia noho. Vadaeni inai Beniamina tauna ese lau ia hadikaia gwauraia be umui hoa, a? Lohiabada ese ia hamaoroa, do ia hereva dika, unai dainai do ita koua lasi. 12 Sedira Lohiabada ese lauegu hisihisi do ia itaia, bona ia ese inai hereva dika, hari dina lau abia gauna, ena davana lau dekenai do ia henia.”

13 Vadaeni Davida mai ena orea taudia danu dala dekenai amo idia raka, to Simei be ororo kahana dekena amo ia raka lao, Davida dekenai ia hereva dika bona nadi bona kahu ia negea. 14 King mai ena taunimanima ibounai danu be Ioridane Sinavai dekenai idia ginidae, idia be manori. Unuseni Davida ia laga-ani.

Abesaloma be Ierusalema dekenai

15 Abesaloma bona Israela taudia ibounai be Ierusalema dekenai idia ginidae. Ahitopela danu be Abesaloma danu. 16 Vadaeni Husai, Araki tauna, Davida ena turana, be Abesaloma dekenai ia lao. Vadaeni Husai ese Abesaloma ia hamaoroa, ia gwau, “King ena mauri do ia daudau! Oiemu mauri be daudau!”

17 Abesaloma ese Husai ia nanadaia, ia gwau, “Oiemu turana Davida be inai bamona oi lalokau henia, a? Badina dahaka ia danu oi lao lasi, a?”

18 Husai ese Abesaloma dekenai ia haere, ia gwau, “Lasi, Lohiabada ese ia abia hidi tauna, bona inai taunimanima bona Israela taudia ibounai ese idia abia hidi tauna be lau ese danu lau abia dae, bona ia dekenai do lau noho. 19 Bona inai danu, daika ena hesiai gaukara do lau karaia? Iena natuna, ani? Oiemu tamana ena hesiai gaukara lau karaia hegeregerena, oiemu hesiai gaukara danu do lau karaia.”

20 Vadaeni Abesaloma ese Ahitopela ia hamaoroa, ia gwau, “Oiemu laloa do oi gwauraia, edena bamona do ita karaia?”

21 Ahitopela ese Abesaloma dekenai ia haere, ia gwau, “Oiemu tamana ena adavana, king ruma naria totona Davida ese ia rakatania hahine taudia, do oi sihari henidia. Vadaeni Israela taudia ibounai do idia kamonai, oi ese oiemu tamana oi habadua momokani, bona ia ese oi dekenai ia dagedage henia. Unai neganai oiemu murinai idia raka taudia ibounai ese laloa goada do idia abia.” 22 Unai dainai idia ese palai ruma ta idia haginia, ruma ena guhi latanai, Abesaloma ena. Vadaeni Abesaloma ese Davida ena adavana, hesiai hahine taudia, ia sihari henidia, Israela taudia ibounai edia vairanai.

23 Ahitopela ena sisiba bona iena laloa unai dinadia neganai be Dirava ena hereva bamona. Unai dainai Davida bona Abesaloma danu ese Ahitopela ena laloa ibounai idia abia dae, Dirava ena hereva do idia abia dae bamona.

Copyright information for `HMO