2 Samuel 23

Davida ena hereva dokodia

Davida, Iese ena natuna, be Dirava ese ia hanamoa, vadaeni dagi badana ia henia. Io, Iakobo ena Dirava ese Davida ia abia hidi, bona king ia halaoa. Bona Davida ese ane namodia Israela totona ia karaia. Davida ena hereva dokodia be inai:

“Lohiabada ena Lauma ese lau dekena amo ia hereva.
Iena hereva be lauegu malana dekenai.
Israela ena Dirava be ia hereva vadaeni.
Israela ia gimaia Diravana ese lau dekenai ia hereva,
ia gwau:
‘Taunimanima ia biagua namonamo king tauna,
bema ia ese taunimanima ia biagua mai maoromaoro danu,
Dirava ena hereva hegeregere neganai,
ia be idia dekenai ia diaridiari noho,
daba ia rere bamona,
o daba ori be lasi neganai,
dina ia tara bamona.
Ia be idia edia latanai ia namo, medu bamona,
medu ese rei ia hatubua bamona.’

“Momokani, Dirava ese lauegu tubuna taudia,
be do ia hanamoa unai bamona, ani?
Badina be noho hanaihanai gwauhamata taravatuna,
be lau dekenai ia henia vadaeni.
Inai gwauhamata taravatuna be do ia makohia diba lasi.
Inai gwauhamata be do ia utua lasi.
Inai be lauegu ura,
bona ia vara neganai, be kwalimu do lau abia momokani.
Bona Dirava ese inai kara do ia havaraia.
To Dirava idia matauraia lasi taudia,
be ginigini idia negea gaudia bamona,
iseda imana dekenai ita dogoatao diba lasi gaudia.
To bema tau ta ia ura idia ia dogoatao neganai,
ia be auri o io ena auauna do ia gaukaralaia,
bona lahi ese idia do ia gabua ore momokani.”

Davida ena goada taudia

Davida ena goada herea taudia edia ladana be inai: Ioseba Basebeta, Takemono tauna. Ia be “Tuari Lohia Taudia Toi” edia orea ena tau ginigunana. Ia ese tuari ta lalonai iena io dekena amo tau ibounai 800 ia alaia mase.

Inai “Tuari Lohia Toi” orea ena tau iharuana be Eleasara. Ia be Dodo Ahohi ena natuna. Pilistia taudia be tuari totona idia haboua, bona Israela taudia be gari dainai idia giroa lou, to Eleasara be Davida danu ia noho. 10 Eleasara be unai gabu dekenai ia gini, ia ese Pilistia taudia ia alaia mase noho, ela bona iena imana ese iena tuari kaia dekenai ia dogoatao auka dainai, iena imana dekenai ia kamokau momokani, ia kokia diba lasi.

Unai dina dekenai Lohiabada ese kwalimu bada herea ia karaia. Bona tuari ia ore neganai, Israela taudia be Eleasara ia tuari gabuna dekenai idia lao, bona mase taudia dekena amo tuari dabua gaudia idia gogoa sibona.

11 Inai “Tuari Lohia Toi” orea ena tau ihatoina be Sama Age, Harara tauna. Pilistia taudia be Lehi dekenai idia haboua, bini idia vara uma gabuna kahirakahira. Israela taudia be Pilistia taudia dekena amo idia heau. 12 To Sama be uma gabuna ena huanai ia gini, bona ia ese Pilistia taudia ia alaia mase. Unai kara dainai, unai dina dekenai, Lohiabada ese kwalimu badana ia karaia.

13 Davida ena tuari taudia edia orea ta, ena ladana idia gwauraia be, “Tuari Taudia Goadadia 30”. Inai tau 30 edia huanai dekena amo tuari taudia toi be uma anina haboua neganai, Adulama kohua dekenai idia lao, badina Davida be unuseni ia noho. Unai neganai danu Pilistia taudia edia tuari orea ta be Repaima Koura dekenai idia kamepa. 14 Unai neganai Davida be unai gabu aukana ena hunia gabunai ia noho, to Pilistia tuari taudia be Betelehema hanua dekenai idia noho.

15 Vadaeni Davida ese Betelehema ena ranu namo herea ia laloa, bona ia gwau, “Lau madi o, bema tau ta ese Betelehema ena magu iduara ena badibadinai ia noho guri dekena amo ranu sisina lau dekenai do ia henia, lau be do lau inua.”

16 Vadaeni inai goada herea taudia toi ese inai hereva idia kamonai, bona idia ese Pilistia taudia idia tuari henia, bona edia kamepa lalonai idia raka hanaia, unai guri dekena amo ranu idia abia, Davida dekenai idia mailaia. To Davida ia ura lasi unai ranu do ia inua. Ia inua lasi, to ia ese unai ranu ia bubua ore, Lohiabada dekenai ia henia, boubou gauna totona.

17 Bona Davida ia hereva, ia gwau, “Lohiabada e, lau ese inai ranu lau inua diba lasi. Bema lau inua, unai be unai tau goadadia edia rarana do lau inua bamona, badina be unai ranu abia totona edia mauri idia negea bamona.” Vadaeni Davida ese unai ranu ia inua lasi momokani.

Inai kara be unai goada herea taudia toi ese idia karaia.

18 Abisai Seruia, Ioaba ena tadina, ese unai “Tuari Taudia Goadadia 30” ia biagua noho, bona ia ese nega ta tau ibounai 300 be sibona ena io dekena amo ia alaia mase. Bona Abisai ena sivarai be bada, unai tau 30 edia sivarai hegeregerena. 19 Inai “Tuari Taudia Goadadia 30” edia huanai Abisai sibona ena sivarai be bada, bona ia be edia biaguna ia lao. To ia be unai “Tuari Lohia Toi” danu ia hegeregere lasi.

20 Benaia Iehoiada be boga auka tauna ta, Kabesela hanua dekena amo. Ia ese kara badadia momo ia karaia. Ia ese Ariele ena natuna ruaosi Moaba dekena amo ia alaia mase, bona dina ta, sinou ia diho neganai, Benaia ese guri lalonai laiona ta ia alaia mase.

21 Benaia ese danu, Aigupito tauna, tauanina bada tauna ia alaia mase. Unai Aigupito tauna ena imana dekenai be io ia noho, to Benaia ese au ta sibona ia abia, Aigupito tauna dekenai ia lao, io be iena imana dekena amo ia kokia, bona sibona ena io dekena amo ia gwadaia mase. 22 Inai karadia be Benaia Iehoiada ese ia karaia, bona ia be unai “Tuari Taudia Goadadia 30” edia orea tauna ta. 23 Benaia be “Tuari Taudia Goadadia 30” edia huanai tau badana ta, to iena sivarai be unai “Tuari Lohia Toi” edia sivarai hegeregerena lasi. Vadaeni Davida ese, ia idia gimaia orea ena biaguna, be Benaia ia halaoa.

24 Ioaba ena tadina Asahele be unai “Tuari Taudia Goadadia 30” orea ena tauna ta. Inai orea ena taudia ma haida be inai:

Elehanana Dodo, Betelehema tauna.
25 Sama, Haroda tauna, Elika, Haroda tauna.
26 Helese, Pelete tauna, Ira Ikese, Tekoa tauna.
27 Abiesere, Anatoto tauna, Mebunai, Husata tauna.
28 Salamona, Ahohi tauna, Maharai, Netopa tauna.
29 Helebe Banaha, Netopa tauna, Itai Ribai, Gibea tauna, Beniamina iduhu tauna ta.
30 Benaia, Piratono tauna, Hidai, Gasa Koura dekena amo.
31 Abialabono, Araba tauna, Asamavete, Bahurimi tauna.
32 Eliaba, Salabono tauna, ia be Iasene ena natuna, bona Ionatana.
33 Sama, Harara tauna, Ahiama Sarara, Harara tauna.
34 Elipelete Ahasabai, Maka tauna, Eliama Ahitopela, Gilo tauna.
35 Hesero, Karamele tauna, Parai, Araba tauna.
36 Igala Natana, Soba tauna, Bani, Gado tauna.
37 Sekele, Amono tauna, Naharai, Beroto tauna. Ia be Ioaba Seruia ena kesi huaia tauna.
38 Ira, Itiri tauna, Gareba, Itiri tauna.
39 Bona Uria, Hiti tauna. Inai tuari taudia goadadia ibounai be 37.
Copyright information for `HMO