Daniel 12

Dokona negana

Ma dabua aukana ia karaia tauna ia gwau, “Unai neganai Mikaela do ia toreisi. Ia be lohia aneru badana, oiemu bese taudia ia gimaia tauna. Unai neganai nega dika bada herea do ia vara. Matamana negana ia mai bona hari ia lao bona unai nega, be nega dika ta unai bamona do ia vara lasi. Bona unai neganai, oiemu bese taudia ese mauri do idia davaria, Dirava ena buka lalonai edia ladana idia torea vadaeni taudia ibounai. Tano kahuna lalonai idia mahuta noho taudia momo do idia toreisi, bona haida be mauri hanaihanai do idia abia, to haida be noho hanaihanai hemaraina do idia davaria. Vadaeni Dirava ena aonega taudia be do idia diaridiari namo herea, dina bamona. Dala maoromaoro be taunimanima momo dekenai idia hadibaia taudia be do idia hururu mai diari namona danu, hisiu bamona, ela bona hanaihanai.

“To oi Daniela, inai peroveta herevana do oi hunia noho, bona inai buka do oi koua momokani, do ia noho ela bona dokona negana ia ginidae. Unai neganai taunimanima momo do idia heau lao, heau mai, bona aonega do ia bada herea.”

Vadaeni lau, Daniela, lau itaia tau rua idia gini noho, ta be sinavai inai kahana ia gini, ma ta be sinavai unai kahana ia gini. Unai tau ruaosi ese dabua aukana ia karaia tauna idia itaia, sinavai ranu ena ataiai ia gini noho. Idia ta ese unai tau ia nanadaia, ia gwau, “Ela bona edena neganai inai hoa bona gari gaudia do idia doko?”

Dabua aukana ia karaia tauna be iena imana ruaosi ia abia isi momokani, guba dekenai ia duduia bamona, bona Noho Hanaihanai Dirava ena ladana dekenai ia gwauhamata. Iena hereva lau kamonai, ia gwau, “Inai gari bona hoa karadia be do idia vara noho ela bona lagani 3 1/2 idia ore. Dirava ena helaga taudia edia siahu idia hadikaia karana do ia ore neganai, inai gau ibounai do idia vara haorea.”

Ia gwauraia herevana lau kamonai, to unai hereva ena anina be lau diba lasi. Unai dainai lau nanadaia, “Lauegu lohia e, inai gaudia dekena amo be dahaka do ia vara?”

Unai tau ia haere, ia gwau, “Daniela, vadaeni, oi lao, badina inai hereva ena anina be do hunia bamona ia lao, ela bona dokona negana ia ginidae. 10 Taunimanima momo ese tohoa dekena amo goeva do idia davaria, bona do idia kurokuro. Dika taudia be do idia kara dika noho, idia be diba do idia davaria lasi. To mai edia aonega taudia be diba do idia davaria.

11 “Dina ibounai karaia boubou gauna do idia hadokoa, ela bona Hadikaia Dika Rohoroho Gauna do idia haginia dina dekenai, be dina 1290 do idia ore. 12 Do idia naria noho namonamo, ia lao bona dina 1335 idia ore taudia be moale bona namo do idia davaria.

13 “To oi, Daniela, oi haheauka noho ela bona oiemu mauri dokona. Do oi laga-ani, to nega dokona dekenai be do oi toreisi, bona oiemu gaukara davana namona do oi abia.”

Copyright information for `HMO