Deuteronomy 1

Mose ese Sinai idia rakatania ena sivarai ia harorolaia

Inai buka lalonai Mose ese Israela taudia ibounai ia haroro henidia. Ia haroro gabuna be taunimanima noho lasi tano, Ioridane Sinavai ena dina daekau kahana dekenai. Unai gabu be Araba, Supu kahirakahira. Kahana ta dekenai be Parana, ma kahana ta dekenai be Topele, Labana, Haseroto bona Disahaba. Sinai Ororo dekena amo bema tau ta ia raka lao ela bona Kadesi Baranea, raka loaloa dinadia be 11 bamona, bema Edoma ena ororo dalana dekena amo ia lao.

To Israela taudia Aigupito idia rakatania murinai, lagani 40 idia lao ore vadaeni. Bona unai lagani 40 ena hua 11 ena dina ginigunana neganai, Mose ese Israela taudia dekenai ia haroro, Lohiabada ese ia henia oda ibounai idia dekenai ia hadibaia. Unai be Sihona, Amoro ena king, Hesebona dekenai ia noho tauna, bona Oga, Basana ena king, Asataroto dekenai bona Ederei dekenai ia noho tauna Lohiabada ese ia halusia murinai.

Israela taudia be Moaba tano dekenai, Ioridane Sinavai dina daekau kahanai neganai, Mose ese Dirava ena taravatu ia hadibaia hamatamaia.

Mose ia gwau, “Lohiabada, iseda Dirava, Sinai Ororo dekenai ita dekenai ia hamaoroa, ia gwau: Umui be nega daudau inai ororo dekenai umui noho kava. Harihari umui toreisi, umui laolao, Amoro taudia edia ororo kahadia dekenai umui lao, bona Amoro ia hagegea tanona ibounai. Ioridane Sinavai tanona ena tano palaka, ororo gabudia bona henuna gabudia, diho kahana ela bona kone kahana dekenai do umui lao. Kanana tanona dekenai do umui lao, bona Lebanona tanona do umui hanaia lao ela bona Euperate Sinavai. Unai tano ibounai be umui dekenai lau henia vadaeni. Umui lao, unai tano do umui abia, badina lau Lohiabada ese emui sene taudia Aberahamo, Isako bona Iakobo dekenai lau gwauhamata henidia, unai tano do idia abia, edia tubudia danu.”

Mose ese gunalaia taudia ia abia hidi

Mose ese Israela taudia ia hamaoroa, ia gwau, “Ita be Sinai Ororo do noho neganai, lau ese umui lau hamaoroa, lau gwau: Umui lau hakaua noho ena gaukara be metau herea. Lau sibona lau karaia diba lasi. 10 Lohiabada, emui Dirava ese umui ia hanamoa dainai umui be momo herea, emui bese taudia be guba ena hisiu edia momo bamona.

11 “Lauegu guriguri be inai: Lohiabada, emui sene taudia edia Dirava ese nega 1000 dekena amo umui emui bese do ia habadaia, bona umui do ia hanamoa noho, ia ese umui dekenai ia gwauhamata hegeregerena.

12 “To lau sibona ese edena bamona umui do lau naria noho? Emui hekwarahi bona emui hepapahuahu be edena bamona do lau hamaoromaoroa? 13 Namona be ladana namo taudia haida iduhu ta ta dekena amo do umui abia hidi, aonega bona diba momo taudia, bona lau ese umui emui gunalaia taudia idia do lau halaoa.

14 “Vadaeni umui ese lau dekenai umui haere, umui gwau, ‘Mose e, oiemu hereva be namo, unai bamona do oi karaia.’

15 “Unai dainai lau ese emui iduhu edia lohia taudia lau abia, mai edia aonega bona mai edia diba taudia, bona umui emui gunalaia taudia idia lau halaoa. Idia haida ese taunimanima 1000 idia gunalaia, haida ese 100 idia gunalaia, haida ese 50, ma haida ese 10, bona iduhu naria taudia danu lau ese lau abia hidi.

16 “Unai neganai danu emui kota biagudia lau hamaoroa, lau gwau, ‘Umui emui varavara edia hepapahuahu umui tahua neganai, mai laloa maoromaoro bona momokani danu do umui kota henia. Bema emui tadikakana bona idau tauna edia hepapahuahu umui tahua neganai, maka tamona dekenai do umui kota henia.

17 “ ‘Do umui kota henidia neganai, emui kota hereva do umui hagagevaia lasi, to dagi bada tauna bona dagi maragi tauna ruaosi be do idia hegeregere sibona emui vairana dekenai. Tau ta do umui gari henia lasi, badina be Kota Biaguna korikori be Dirava sibona. Bema hepapahuahu ta be umui dekenai ia auka, o bema kota ta totona umui daradara neganai, lau dekenai do umui mailaia, bona lau ese do lau tahua.’ 18 Unai neganai danu, do umui karaia karadia ibounai umui dekenai do lau hadibaia.”

Hasinadoa taudia Mose ese ia abia hidi, Kadesi Baranea dekena amo ia siaidia

19 Ma Mose ia gwau, “Vadaeni, Lohiabada, iseda Dirava ita ia oda hegeregerena, Sinai Ororo dekena amo ita raka mai, bona taunimanima idia noho lasi tano dikana bona mai garina danu ita hanaia, ela bona Amoro taudia edia tano, ororo kahana dekenai ita ginidae, gabu ena ladana Kadesi Baranea. 20 Vadaeni lau ese umui lau hamaoroa, lau gwau, ‘Umui be Amoro taudia edia ororo tano umui ginidae vadaeni, Lohiabada ese umui ia henia noho tano be inai. 21 Umui itaia, Lohiabada, emui Dirava, ese umui ia henia tano be unai. Do umui toreisi, unai tano do umui abia, badina Lohiabada, emui sene taudia edia Dirava ese inai bamona umui ia oda henia vadaeni. Do umui gari lasi, do umui daradara lasi.’

22 “Unai neganai umui ibounai be lau dekenai umui mai, umui gwau, ‘Hasinadoa taudia do ita siaia guna, idia ese tano be do idia itaia, bona sivarai do idia mailaia, edena dala dekenai do ita raka, bona edena hanua do ita davaria.’

23 “Emui hereva lau abia dae, bona lau ese tatau 12 emui huanai dekena amo lau abia hidi, iduhu ta ta dekena amo tatau ta ta lau abia.

24 “Vadaeni idia be ororo dekena amo idia raka lao, ela bona Esakola Koura dekenai idia ginidae, unuseni hasinadoa gaukara idia karaia. 25 Unai tano ena au huahua haida edia imana dekenai idia abia, bona idia giroa mai, sivarai ita dekenai idia mailaia, idia gwau, ‘Lohiabada iseda Dirava ese ita dekenai ia henia noho tano be namo herea.’

Israela taudia ese Lohiabada ena oda hereva idia negea

26 “To umui ura lasi umui toreisi, bona umui ese Lohiabada emui Dirava ena hereva umui utua. 27 Emui palai rumadia lalonai umui maumau noho, umui gwau, ‘Lohiabada ese ita ia badu henia noho. Ia ese Aigupito dekena amo ita ia hakaua mai, Amoro taudia edia imana dekenai ita do ia henia, idia ese ita do idia alaia totona. 28 Edeseni do ita lao? Ita be ita gari noho. Ita siaia hasinadoa taudia ese ita idia hamaoroa unai tano idia noho taudia be bada herea bona lata herea, to ita be maragi bona kwadogi. Hasinadoa taudia danu idia gwau unai tano ena hanua be idia bada, edia magu danu be idia lata, edia ataiai be guba dekenai idia daekau. Ma iseda hasinadoa taudia ese Anakima tau badadia unai tano dekenai idia itaia!’

29 “To lau ese lau hereva, lau gwau, ‘Unai taudia dekenai do umui gari lasi. 30 Lohiabada, emui Dirava, umui emui vairana dekenai ia raka noho Diravana ese umui dainai do ia tuari, Aigupito dekenai ia karaia hegeregerena. 31 Tano kaukau lalonai danu oi itaia vadaeni, Lohiabada, emui Dirava ese mai mauri danu umui ia hakaua mai inai gabu dekenai, tau ta ese iena natuna ia huaia bamona.’

32 “To umui ese Lohiabada, emui Dirava, umui abidadama henia lasi. 33 Lohiabada ese nega ibounai umui ia gunalaia, emui kamepa gabudia ia tahua, emui dala danu ia hedinaraia, lahi dekena amo hanuaboi neganai, bona ori dekena amo dina dekenai, to umui abidadama henia lasi.

34 “Lohiabada ese emui hereva ia kamonai, vadaeni ia badu, bona gwauhamata metauna ia gwauraia, ia gwau, 35 ‘Momokani inai uru ena tau dikadia ta ese inai tano namona, lau ese emui sene taudia dekenai lau gwauhamata do lau henidia tano, do ia itaia lasi. 36 To Kaleba Iepune sibona ese do ia itaia, bona iena aena dekenai ia moia tanona lau ese do lau henia, iena natuna do lau henidia danu, badina be ia ese Lohiabada ia abidadama henia mai ena kudouna ibounai danu.’ ”

37 Ma Mose ia gwau, “Umui Israela taudia dainai Lohiabada ese lau dekenai danu ia badu, bona ia gwau, ‘Mose e, oi danu be unai tano do oi raka vareai lasi. 38 To Iosua Nunu, oiemu hesiai tauna, be unai tano do ia raka vareai. Do oi hamaoroa, do ia goada, badina be ia ese Israela taudia unai tano dekenai do ia hakaua vareai.’

39 “Unai neganai Lohiabada ese ita ibounai ia hamaoroa, ia gwau, ‘Emui natudia, tuari taudia haida ese do idia abia mauri umui gwau, bona emui natuna maragidia, kara namo bona kara dika do idia diba lasi, idia be do idia raka vareai. Unai tano do lau henidia, edia tano. 40 To umui be do umui giroa lou, tano kaukau dekenai ma do umui raka loaloa, Davara Kakakaka ena kahana dekenai.’

41 “Vadaeni umui ese lau Mose dekenai umui haere, umui gwau, ‘Ai be ai kara dika vadaeni Lohiabada dekenai. Ai be do ai lao, do ai tuari, Lohiabada ese ia oda henia hegeregerena.’

“Vadaeni emui tuari gaudia umui abia hegaegae, umui laloa ororo kahana dekenai do umui tuari haraga diba.
42 To Lohiabada ese lau dekenai ia hereva, ia gwau, ‘Idia do oi hamaoroa, inai bamona: Tuari dekenai do umui lao lasi, badina be lau Lohiabada be umui dekenai lau noho lasi. Do umui lao lasi, umui idia tuari henia taudia ese umui do idia halusia garina.’

43 “Lohiabada ena sisiba be umui dekenai lau hamaoroa, to umui kamonai lasi. Lohiabada ena hereva umui negea, bona umui hekokoroku, vadaeni ororo dekenai umui daekau.

44 “Vadaeni Amoro taudia be unai ororo dekena amo idia diho mai, umui idia lulua, nanigo ese umui bema idia lulua bamona. Vadaeni idia ese Seiri dekenai umui idia halusia, bona umui idia lulua lao ela bona Horoma.

45 “Vadaeni umui giroa mai, bona Lohiabada ena vairana dekenai umui taitai, to Lohiabada ese emui taitai ia kamonai lasi, bona emui hereva ia abia dae lasi.

46 “Unai dainai umui be nega daudau Kadesi dekenai umui noho.”

Copyright information for `HMO