Deuteronomy 12

Tomadiho gabuna be tamona

Ma Mose ia haroro, ia gwau, “Taravatu bona oda hereva be inai, bona Lohiabada, emui sene taudia edia Dirava umui dekenai ia henia tano dekenai inai Taravatu do umui badinaia namonamo. Oibe, tanobada dekenai emui mauri noho dinadia ibounai lalonai inai Taravatu do umui badinaia. Edia gabu umui abia besedia edia dirava idia tomadiho henia gabudia ibounai do umui hadikaia ore, ororo badadia dekenai, ororo maragidia dekenai, bona kasiri audia edia henunai. Edia boubou patadia do umui veria diho, edia nadi dirava laulau gaudia do umui makohia, edia hahine dirava, Asera ena au helagadia do umui gabua ore, edia kaivakuku ibounai do umui hamakohia ore, vadaeni taunimanima ese unai koikoi diravadia dekenai do idia tomadiho lou lasi, unai gabudia dekenai.

“Lohiabada emui Dirava do umui tomadiho henia, to unai idau taudia ese edia dirava idia tomadiho henia dalana bamona lasi. Lohiabada, emui Dirava, ese gabu ta do ia abia hidi, emui iduhu ibounai edia huanai dekena amo, bona unai gabu dekenai Dirava ena Ladana do ia noho. Unai gabu dekenai do umui lao, tomadiho henia totona. Unai gabu dekenai do umui lao, emui boubou, gabua gaudia, bona emui boubou gaudia idauidau, bona emui kohu haria kahana 10 dekena amo kahana ta Lohiabada henia gaudia, harihari gaudia idaudia, emui gwauhamata gaudia, bona emui henia kava monina, ma boromakau bona mamoe edia vara guna natudia, inai ibounai do umui abia lao. Unai gabu dekenai danu Lohiabada, emui Dirava, ena vairana dekenai do umui mai, mai emui famili danu do umui aniani, bona do umui moale hebou, emui gaukara ibounai lalonai, badina be Lohiabada, emui Dirava ese umui ia hanamoa vadaeni.

“Harihari iniseni ita karaia noho kara be unai gabu dekenai do ita karaia lasi. Iniseni be ita ta ta ita ura dalana dekenai sibona ita tomadiho noho, badina be emui laga-ani gabuna, bona emui tano korikori, Lohiabada emui Dirava ese umui do ia henia gabuna dekenai umui do ginidae lasi dainai. 10 To Ioridane Sinavai unai kahanai do umui hanaia, Lohiabada, emui Dirava, ese umui dekenai do ia henia tano, emui tano korikori dekenai do umui noho. Bona Lohiabada ese umui idia dagedage henia taudia dekena amo umui do ia hamauria, ela bona mai maino danu do umui noho. 11 Unai neganai Lohiabada ese gabu ta do ia abia hidi, iena Ladana do ia noho totona. Unai gabu dekenai Lohiabada do umui tomadiho henia, bona unuseni be umui dekenai lau oda gaudia ibounai do umui mailaia, emui gabua bouboudia, emui boubou idauidau, bona emui kohu haria kahana 10 dekena amo kahana ta Lohiabada henia gaudia, harihari gaudia idaudia, bona emui gwauhamata gaudia, Lohiabada ena. 12 Unai gabu dekenai umui be Lohiabada emui Dirava ena vairana dekenai do umui moale hebou, umui bona emui natudia memero bona emui natudia kekeni, bona emui hesiai taudia, tatau bona hahine, bona Levi taudia, emui hanua dekenai idia noho danu. Badina do umui laloa noho, Levi taudia be tano ta idia biagua diba lasi. 13 Do umui naria namonamo, boubou umui gabua neganai, gabu kavakava dekenai do umui karaia lasi. 14 To Lohiabada ese umui emui iduhu edia huanai do ia abia hidi gabuna dekenai sibona, unai gabu dekenai emui gabua bouboudia do umui henia, bona unuseni lau oda karadia ibounai do umui karaia.

15 “To umui emui hanua idauidau ibounai lalonai, mauri gaudia haida, uda nani bona dia bamona gaudia, umui alaia diba, bona edia vamu umui ania diba, emui ura hegeregerena. Oibe, Lohiabada, emui Dirava ese unai bamona umui dekenai ia henia vamu ibounai umui ania diba. Goeva bona goeva lasi taudia danu idia ania diba. 16 To vamu mai rarana danu umui ania diba lasi, edia rara be tano dekenai do umui bubua, ranu bamona. 17 Inai gaudia be emui noho gabudia lalonai umui ania diba lasi momokani: Lohiabada dekenai umui henia gaudia ibounai, hegeregere emui uiti, o emui uaina, o emui olive dehoro, umui haria kahana 10 ena kahana ta gaudia, o emui boromakau o emui mamoe natuna vara guna, o emui gwauhamata gaudia, o emui harihari gaudia, o lalo namo dainai, Lohiabada dekenai umui henia gaudia. 18 To inai gaudia umui ania diba, Lohiabada, emui Dirava, ena vairanai, Lohiabada emui Dirava ese ia abia hidi gabuna dekenai. Oibe, oi bona oiemu natuna, bona oiemu hesiai taudia, bona Levi taudia oiemu hanua dekenai idia noho ese Lohiabada ena gabu dekenai unai gaudia umui ania diba. Bona Lohiabada, emui Dirava ena vairanai, emui gaukara ibounai dainai do umui moale. 19 Do umui naria namonamo, Levi taudia do umui laloaboio lasi, emui tano dekenai umui noho dinadia ibounai.

20 “Lohiabada, emui Dirava ese emui tano do ia habadaia, umui dekenai ia gwauhamata bamona. Unai neganai vamu umui ania diba nega ibounai, emui ura hegeregerena. 21 Bema Lohiabada ia abia hidi tomadiho gabuna be daudau, emui boromakau o emui mamoe, Lohiabada ese umui dekenai ia henia gaudia umui alaia diba, umui lau hamaoroa bamona. Bona emui hanua dekenai unai vamu umui ania diba, emui ura hegeregerena. 22 Unai vamu do umui ania, uda nani o dia do umui ania hegeregerena. Goeva bona goeva lasi taudia idia ania diba. 23 To do umui naria namonamo, mai rarana danu do umui ania lasi, badina mauri be rara ena lalona dekenai ia noho, bona mauri be vamu danu do umui ania lasi. 24 Do umui ania lasi, to tano dekenai do umui bubua, ranu bamona. 25 Do umui ania lasi, vadaeni do umui namo, umui bona emui natudia bona tubudia ibounai, Lohiabada ena vairana dekenai umui be maoromaoro dainai.

26 “To umui emui gau helagadia bona emui gwauhamata gaudia do umui abia lao, Lohiabada ese ia abia hidi gabuna dekenai. 27 Unai gabu dekenai emui gabua bouboudia edia vamu, bona edia rara, Lohiabada emui Dirava ena boubou patana dekenai do umui hahelagaia. Unai neganai emui boubou gaudia edia rara be Lohiabada emui Dirava ena boubou patana dekenai do umui bubua, to iena vamu do umui ania. 28 Do umui naria namonamo, inai lau ese umui lau hamaoroa hereva ibounai do umui badinaia momokani. Unai neganai do umui be namo, umui bona emui natudia bona tubudia, ela bona hanaihanai, badina be Lohiabada ena vairana dekenai umui be maoromaoro dainai.

Dirava koikoidia do umui tomadiho henidia lasi

29 “Lohiabada, emui Dirava, ese edia gabudia do umui abia besedia do ia hadikaia ore. Vadaeni umui ese edia tano do umui abia, bona unai gabudia dekenai do umui noho. 30 Unai neganai do umui naria namonamo, edia hanua be Lohiabada ese ia hadikaia murinai, edia dala dekenai do umui raka garina. Bona edia dirava do umui herevalaia garina, do umui gwau, ‘Inai bese be edia dirava edena bamona idia tomadiho henia? Lau danu unai bamona do lau tomadiho.’ Unai bamona do umui laloa lasi, do umui dika garina. 31 Lohiabada emui Dirava do umui tomadiho henia neganai, be unai taudia ese edia dirava idia tomadiho henia dalana bamona do umui karaia lasi. Badina be idia ese lebulebu karadia ibounai, Lohiabada ese ia badu henidia karadia idia karaia noho, edia dirava hanamoa totona. Oibe, edia natudia, memero bona kekeni be lahi dekenai idia gabua, edia dirava hanamoa totona.

32 “Lauegu oda hereva ibounai do umui badinaia namonamo. Idia dekenai hereva ta ma do umui atoa lasi, bona idia dekena amo hereva ta do umui kokia lasi.

Copyright information for `HMO