Ecclesiastes 4

Taunimanima hadikaia kara, hekwarahi, bona turana karaia lasi kara

Ma egu matana dekena amo, tanobada lalonai kota maoromaoro lasi kara lau itaia. Haida ese idia dagedage henidia taudia idia tai noho, bona tau ta ese ia durudia lasi. Io, tau ta ese unai hisihisi taudia ia durudia lasi, badina be unai dagedage taudia be mai edia siahu danu. Vadaeni lau laloa, idia mase guna taudia edia noho be namo, idia edia noho ese do mauri noho taudia edia noho ia hereaia noho. To idia ruaosi, mase vadaeni, bona do mauri noho taudia edia noho idia hereaia noho taudia be idia do vara lasi taudia, ani? Badina be idia ese tanobada dekenai idia karaia noho kara dika idia itaia noho lasi.

Bona lau itaia, taunimanima ese hekwarahi bada idia karaia noho ena badina be inai: Idia ese edia badibadinai noho taudia idia mama henidia dainai. To inai danu be anina lasi, lai bema idia lulua kava hegeregerena.

Kavakava tauna ese ia gaukara lasi, bona iena aniani be hegeregere lasi dainai, ia manoka lao, bona ia mase. To sedira aniani sisina sibona mai laga-ani danu ena namo ese hekwarahi bada, bona lai lulua kava kara ena namo ia hereaia noho.

Bona anina lasi kara ma ta lau itaia, gauna be inai: Tau ta be mai ena turana ta lasi, natuna ta lasi, tadikakana danu lasi. To ia ese iena hekwarahi ia hadokoa lasi, bona iena kohu ena bada be hegeregere lasi ia dekenai. Daika totona inai hekwarahi mai moale lasi ia karaia noho? Inai danu be anina lasi, bona mai ena lalohisihisi danu.

Tau rua ese tau tamona idia hereaia noho, badina rua edia gaukara davana be namo. 10 Badina bema ta ia moru neganai, iena turana ese do ia abia isi. To bema tau ta be sibona ia noho neganai ia moru, madi ia dika, badina ia do ia durua tauna ta be lasi. 11 Inai danu, tau rua idia hekure hebou neganai edia tauanidia do idia siahu. To tau tamona sibona be keru neganai edena bamona do ia siahu diba?

12 Tau tamona be tau ta ese do ia halusia diba, to tau rua ese unai heatu tauna idia koua diba. Varo toi dekena amo idia hatua varona be do idia makohia haraga lasi.

13 Eregabe tauna ogogamina, to mai ena aonega danu, be namo, to king kavakava ta, ia buruka, to sisiba ia kamonai henia lasi, be dika. 14 Unai eregabe tauna be sedira dibura ruma dekena amo ia mai, to ia kwalimu diba. Ia be sedira ogogami dekenai ia vara, to iena aonega dainai, ia ese king dagi ia abia diba. 15 Tanobada dekenai noho taunimanima ibounai edia huanai, lau itaia unai eregabe tauna ese unai king dagi ia abia, bona taunimanima ese iena murinai idia raka, bona idia durua danu. 16 Ia ese taunimanima momo, duahia diba lasi, ia biagua noho.

To gabeai idia vara taudia ese unai king do idia ura henia lasi. Inai kara danu be anina lasi, lai bema idia lulua kava karana bamona.

Copyright information for `HMO