Esther 3

Hamana ese dala ia tahua Iuda taudia do ia hadikaia ore

Inai kara murinai, king Ahasuero ese Hamana Hamedata, Agaga tauna ia hanamoa, bona dagi badana ia henia. Iena dagi ese king ena lohia taudia ibounai edia dagi ia hanaia. King ese iena hesiai taudia ibounai ia oda henia Hamana do idia matauraia, bona iena vairanai do idia tui diho. Idia ibounai ese unai bamona idia karaia, to Morodekai sibona ese Hamana dekenai ia tui diho lasi.

Vadaeni king ena hesiai taudia oredia ese Morodekai idia nanadaia, idia gwau, “Badina dahaka king ena oda oi kamonai henia lasi?” Dina momo idia ese unai bamona idia hereva henia, to Morodekai ia kamonai henidia lasi, ia gwau, “Lau be Iuda tauna, bona Hamana ena vairana dekenai lau tui diho diba lasi.”

Vadaeni idia ese unai kara Hamana dekenai idia hamaoroa, do idia itaia, Morodekai ena hereva do ia kwalimu o lasi. Badina be ia gwau ia be Iuda tauna.

Hamana ese ia itaia, Morodekai ese ia tui diho lasi, bona iena kwarana ia atoa diho lasi iena vairanai, vadaeni ia badu momokani. To ia laloa Morodekai sibona do ia alaia lasi, badina ia kamonai Morodekai be Iuda tauna neganai, ia ese dala ia tahua Ahasuero ena basileia ibounai dekenai idia noho Iuda bese taudia ibounai be do ia alaia mase momokani.

King Ahasuero ena lohia lagani namba 12, hua ginigunana, hua ladana be Nisana, lalonai, Hamana ia oda henia, vadaeni iena vairana dekenai laki gadara ta, ladana Puru idia karaia. Inai bamona idia karaia, Hamana ese Iuda taudia do ia alaia mase ena dina namona bona hua namona, be do ia diba totona. Vadaeni unai laki dekena amo idia davaria dina namona be hua namba 12, ena ladana be Adara, ena dina namba 13.

Vadaeni Hamana ese king Ahasuero ia hereva henia, ia gwau, “Bese ta be oiemu basileia kahana ibounai dekenai idia noho. Edia noho be idau, bona iseda noho be idau. Edia taravatu be idau, bese oredia edia taravatu bamona lasi, bona idia ese king ena taravatu idia kamonai henia lasi. Unai dainai oi ese idia do oi alaia mase be namo. King e, bema oi ura neganai, oda ta do oi torea hedinarai, inai bese taudia do idia alaia ore totona. Bema oda inai bamona oi gwauraia neganai, lau ese lau gwauhamata inai, siliva ena metau 340,000 kilogaram be king ena kohu haboua rumadia lalonai do lau atoa, inai bese do idia haorea taudia edia gaukara davana.”

10 Inai hereva ia kamonai neganai king ese iena imana kwakikwakina rini ia kokia, Hamana Hamedata, Agaga tauna, Iuda taudia ia ura hadikaia tauna dekenai ia henia. Inai rini be king ena dagi toana gauna momokani, bona inai rini ia dogoatao noho tauna ese oda bona taravatu ibounai karaia siahuna ia abia momokani. 11 Bona king ese Hamana ia hamaoroa, ia gwau, “Unai bese taudia bona edia moni be oiemu, oiemu ura hegeregerena idia dekenai do oi karaia.”

12 Vadaeni hua ginigunana ena dina namba 13 dekenai Hamana ese king ena toretore taudia ia boiria hebou, bona oda hereva ena pepa ta, Hamana ese ia gwauraia oda ibounai hegeregerena, idia torea. Inai pepa be gado idauidau dekenai, bona basileia ibounai edia toretore daladia idauidau dekenai idia torea, bona lohia taudia, gavana taudia bona king ena hesiai taudia ibounai dekenai idia siaia lao. King Ahasuero ena ladana idia torea, bona king ena rini dekena amo king ena toana be pepa dekenai idia karaia. 13 Inai revareva ena pepa be heau loaloa taudia edia imadia dekena amo idia siaidia lao. Inai revareva pepa ibounai edia torea gauna be inai: “Dina tamona dekenai, hua namba 12, hua ladana Adara, ena dina namba 13, Iuda taudia ibounai, buruka bona buruka lasi, tau bona hahine, mai edia natudia ibounai danu be do idia alaia mase, ta do idia bogahisihisi henia lasi. Iuda bese taudia do idia haorea momokani, bona edia kohu bona moni do idia abia. 14 Inai revareva ena anina be lohia taudia ibounai ese edia taunimanima dekenai do idia duahia hedinarai, taunimanima bese ibounai do idia diba, bona unai dina totona do idia noho hegaegae totona.”

15 Hereva gwauraia taudia be idia heau lao, king ena oda hegeregerena, bona iena oda be hanua badana Susa dekenai danu idia gwauraia hedinarai.

King bona Hamana ese idia helai diho, uaina idia inua, to Susa hanua taudia be idia daradara mai gari danu.

Copyright information for `HMO