Exodus 10

Hisihisi henia namba 8, kwadi dekena amo

Vadaeni Lohiabada ese Mose dekenai ia hamaoroa, ia gwau, “Farao dekenai do oi raka vareai, badina be iena lalona bona iena hesiai taudia edia lalona danu lau ha-aukaia vadaeni. Inai bamona lau karaia badina be, idia huana dekenai lauegu siahu do lau hedinaraia totona. Vadaeni umui emui natudia bona emui tubudia dohore umui hadibaia diba, dahaka hoa kara badadia lau karaia Aigupito dekenai, bona edena bamona Aigupito taudia lau hakavakavadia lauegu toa karadia dekena amo, vadaeni umui ibounai do umui diba lau inai Lohiabada.”

Vadaeni Mose bona Arona be Farao dekenai idia raka vareai, idia hereva ia dekenai, idia gwau, “Lohiabada, ai Heberu taudia aiemai Dirava, be inai bamona ia hereva, ‘Lauegu vairana dekenai do oi hekokoroku noho ia lao bona edena negai? Lauegu orea taudia oiemu imana dekena amo oi negea, dohore idia tomadiho lau dekenai. To bema lasi, bema oi dogoatao idia, lau ese kerukeru kwadi do lau siaia oiemu tano dekenai. Idia ese tano ena kopina do idia koua momokani, tano be do oi itaia diba lasi. Vadaeni, emui aniani sisina do ia noho, medu, aisi nadi bamona ese ia hadikaia lasi gauna be, idia ese do idia ania ore, bona au ibounai be do idia ania ore. Oiemu ruma danu, bona oiemu hesiai taudia ibounai edia ruma, bona Aigupito taudia ibounai edia ruma, be kwadi dekenai do idia honu momokani, umui emui tamadia bona tubudia unai bamona idia itaia lasi, idia vara dinana ia mai bona harihari.’ ” Vadaeni Mose ese Farao ena vairana dekena amo ia raka siri.

Vadaeni Farao dekenai, iena hesiai taudia ese idia hereva, idia gwau, “Inai tau ese dika momo ita dekenai do ia henia noho ia lao bona edena negai? Inai taudia oiemu imana dekena amo oi negea, do idia lao, Lohiabada, idia edia Dirava dekenai do idia tomadiho lao, ia namo. Aigupito ia dika momokani vadaeni, oi diba lasi, a?”

Vadaeni idia ese Mose bona Arona ma idia hakaua vareai lou Farao dekenai. Ia hereva idia dekenai, ia gwau, “Umui lao, Lohiabada umui emui Dirava dekenai do umui tomadiho, to umui danu do idia lao taudia be daika?”

Mose ia gwau, “Aiemai memero bona aiemai buruka taudia, aiemai natudia tatau, bona aiemai natudia hahine, aiemai mamoe bona aiemai boromakau, ibounai do ai abia lao, badina be guriguri aria ta do ai karaia, Lohiabada ena.”

10 Farao ese mai badu danu ia hereva idia dekenai, ia gwau, “Be, Dirava ena ladana dekenai, umui emui hahine bona edia natudia do lau negea lasi umui danu. Lau diba umui be kerere ta do umui ura karaia lau dekenai. 11 Unai bamona lasi! Umui tatau sibona do umui lao, Lohiabada dekenai do umui tomadiho, badina umui emui ura be unai.” Vadaeni Farao ese iena vairana dekena amo ia luludia.

12 Vadaeni Lohiabada ese Mose dekenai ia hamaoroa, ia gwau, “Oiemu imana oi abia isi Aigupito tano ena ataiai, kwadi do idia mai totona. Tubu noho gaudia, bona ava ibounai, bona medu, aisi nadi bamona ese ia hadikaia lasi gaudia ibounai do idia ania ore.” 13 Vadaeni Mose ese iena itotohi ia abia isi Aigupito tano ena ataiai. Unai neganai Lohiabada ese lai ta ia siaia dina ia daekau kahana dekena amo, unai tano dekenai lai ia toa, unai dina tamona, bona unai hanuaboi ena hora ibounai. Bona daba ia rere neganai, inai lai ese kwadi ia mailaia. 14 Vadaeni kwadi ese Aigupito tano ibounai idia koua, ia lao bona Aigupito tano ena kahana ibounai dekenai. Idia be dika momokani. Kwadi idia momo herea, unai bamona be nega ta ia hedinarai lasi, bona dohore ia hedinarai lou lasi. 15 Tano ena kopina ibounai idia ese idia koua momokani, tano ia korema vadaeni. Ava ibounai bona au ena huahua ibounai idia ania ore, medu, aisi nadi bamona ia hadikaia lasi gaudia ibounai idia ania ore. Ia tubu noho gauna ta, au o tano ena avana, idia noho lasi, Aigupito tano ibounai dekenai.

16 Vadaeni Farao ese Mose bona Arona dekenai ia boiboi haragaharaga, ia hamaorodia, ia gwau, “Lau ese Lohiabada, umui emui Dirava ena vairana dekenai, bona umui emui vairana dekenai, kerere momo lau karaia vadaeni. 17 Inai dainai, lau noinoi umui dekenai, inai nega tamona sibona lauegu dika do umui laloaboio, Lohiabada umui emui Dirava dekenai do umui noinoi, ia ese unai dika gauna lau dekena amo do ia kokia.” 18 Vadaeni Mose be Farao ena vairana dekena amo ia raka siri, Lohiabada dekenai ia noinoi. 19 Vadaeni Lohiabada ese lai badana ta, dina ia diho kahana dekena amo ia siaia, unai lai ese kwadi ia abia isi. Davara Kakakaka lalonai ia abidia lao, Aigupito tano ibounai dekenai kwadi ta ia noho lasi. 20 To Lohiabada ese Farao ena lalona ma ia ha-aukaia, vadaeni Israela taudia iena imana dekena amo ia negea lasi.

Hisihisi henia namba 9, dibura masemase

21 Vadaeni Lohiabada ese Mose dekenai ma ia hamaoroa, ia gwau, “Oiemu imana guba dekenai do oi duduia, vadaeni Aigupito taudia edia tano ibounai dibura ese do ia koua, bona idia ese dibura ena mamina do idia abia.” 22 Vadaeni Mose ese guba dekenai iena imana ia duduia, vadaeni Aigupito tano ibounai ia dibura masemase, ia lao dina toi idia ore vadaeni. 23 Aigupito taudia be ta ta dekenai idia itaia lasi, bona idia edia ruma idia rakatania lasi, dina toi edia lalonai. To Israela taudia ibounai edia noho gabudia ibounai be diari.

24 Vadaeni Farao ese Mose ia boiria, ia gwau, “Vadaeni umui lao, Lohiabada dekenai do umui tomadiho, umui emui natudia do umui abidia lao, to umui emui mamoe bona nani bona boromakau ibounai iniseni do umui rakatania.”

25 To Mose ia gwau, “Lasi. Aiemai boubou gaudia, bona lahi ese do ia araia ore gaudia be ai dekenai do oi henia, Lohiabada aiemai Dirava ena boubou do ai karaia. 26 Aiemai boromakau ibounai do ai abia lao, ta do ia noho lasi, badina be unai dekena amo Lohiabada aiemai Dirava ena boubou do ai karaia. Ai diba lasi dahaka gau dahaka gau dekena amo Lohiabada ena boubou do ai karaia, ia lao bona boubou karaia ena gabu dekenai dohore ai ginidae.”

27 To Lohiabada ese Farao ena lalona ma ia ha-aukaia, vadaeni iena imana dekena amo ia negea lasi idia. 28 Vadaeni Farao ese Mose ia hamaoroa, ia gwau, “Oi siri, oi naria namonamo danu, lauegu vairana dohore oi itaia lou lasi, badina be oi itaia dinana dekenai, do oi mase.”

29 Vadaeni Mose ia gwau, “Oiemu hereva hegeregere, oiemu vairana dohore lau itaia lou lasi.”

Copyright information for `HMO