Exodus 23

Kara maoromaoro bona kara namona

“Sivarai momokani lasi do umui gwauraia lasi. Hereva koikoi dekena amo kara dika tauna do oi durua lasi. Bema taunimanima momo idia kerere, edia laloa do umui abia dae lasi. Kota lalonai taunimanima momo hamoalea totona hereva koikoi do umui gwauraia lasi. Badina be unai dekena amo kara maoromaoro do umui hadikaia garina. Kota lalonai tau ta ia ogogami dainai, iena kerere davana do umui hamaragia lasi.

“Bema oi dekenai ia badu tauna ena boromakau o doniki ia boio, vadaeni oi davaria neganai, ia dekenai do oi hakaua lou. Bema oi dekenai ia badu tauna ena doniki be ia moru diho kohu metau ia huaia dainai, do oi durua. Oi rakatania kava be ia dika.

“Bema umui emui ogogami tauna ta ia kota neganai, dala maoromaoro dekenai do umui kota henia. Ia be ogogami dainai iena kota do umui ha-aukaia kava lasi, to iena mauri do umui laloa, taunimanima ibounai edia mauri umui laloa hegeregerena. Tau ta do umui samania koikoi lasi. Kerere lasi tauna ta do umui hamasea lasi. Badina be inai bamona ia karaia tauna be iena kerere davana do lau henia. Kara kerere do umui karaia totona umui dekenai moni idia henia gwauraia neganai, do umui abia dae lasi. Badina be inai bamona moni ese taunimanima edia matana ia kepulua, vadaeni kara maoromaoro do idia laloa lasi. Bona inai dekena amo, kara maoromaoro idia karaia taudia do umui hadikaia.

“Bema idau tauna umui emui huana dekenai ia noho, do umui hisihisi henia lasi. Umui be idau tauna ena mamina umui abia, badina be guna Aigupito dekenai umui noho, idau taudia bamona.

Lagani namba 7 bona dina namba 7

10 “Lagani 6 uma gaudia do umui hadoa emui tano lalonai, bona anina do umui haboua. 11 To lagani namba 7 lalonai, be tano do umui gaukaralaia lasi, ia noho kava, bona ia dekenai ia tubu anina do umui haboua lasi. Umui dekenai idia noho ogogami taudia ese unai anina do idia ania, bona orena be dagedage gaudia do idia ania diba. Inai bamona kara danu do umui karaia emui vain uma gabudia dekenai bona emui olive hatubua gabudia dekenai danu.

12 “Dina 6 do umui gaukara, to dina namba 7 ena lalonai do umui gaukara lasi. Inai dekena amo emui boromakau bona emui doniki danu do idia laga-ani, bona emui hesiai taudia davana lasi, bona emui huana dekenai noho idau tauna be idia laga-ani dainai, edia goada do idia abia lou.

13 “Lau Lohiabada egu hereva ibounai umui kamonai namonamo. Idau dirava ta dekenai umui guriguri henia lasi. Edia ladana danu do umui gwauraia lasi.

Aria badadia toi

14 “Lagani ta lalonai, nega toi aria do umui karaia, lau totona. 15 Hatubua Lasi Paraoa ena aria do umui karaia, bona dina 7 lalonai do umui ania, gunaguna umui dekenai lau oda hegeregerena. Inai aria do umui karaia ena nega korikori dekenai, hua ladana Abiba lalonai. Badina be unai hua lalonai Aigupito tano umui rakatania. Lauegu vairana dekenai tau ta be imana kavakava do ia mai lasi.

16 “Uma ena anina, hegeregere koni haboua negana, ena aria danu do umui karaia, umui haboua hamatamaia neganai. Lagani dokona dekenai danu aria ta do umui karaia, au huahua ena anina umui haboua neganai. Inai huahua be do umui haboua vain uma gabudia, bona olive hatubua gabudia dekenai. 17 Lagani ta ena lalonai, emui tatau ibounai be lauegu vairana dekenai do idia hedinarai nega toi. Lau be Lohiabada, emui Dirava.

18 “Boubou gauna hegeregere boromakau ta lau dekenai umui henia neganai, mai hatubua gauna paraoa ia danu nega tamona do umui atoa lasi. Boromakau ena digarana be do ia noho lasi ia lao bona dabai.

19 “Emui uma dekenai hadoa gaudia edia anina ginigunana umui utua neganai, be namo hereadia do umui mailaia Lohiabada emui Dirava ena dubu dekenai.

“Nani ena natuna be iena sinana ena rata lalonai do umui nadua lasi.

Gwauhamata bona hadibaia herevana

20 “Umui itaia, aneru ta emui vairana dekenai lau siaia noho. Ia ese dala dekenai do ia naria namonamo umui, ia lao bona lau abia hegaegae gabuna dekenai umui do ia hakaua vareai. 21 Ia dekenai do umui kamonai namonamo, iena gadona do umui kamonai henia, bona iena hereva do umui utua lasi. Badina be ia ese emui kara dika do ia gwauatao lasi, ia ese lauegu siahu ia abia dainai. 22 To bema iena gadona umui kamonai henia, bona lauegu hereva ibounai do umui karaia, vadaeni umui dekenai idia dagedage henia taudia be lau ese do lau dagedage henia, bona umui dekenai tuari henia taudia, be lau ese danu do lau tuari henidia.

23 “Lauegu aneru be emui vairana dekenai do ia lao, Amoro taudia bona Hiti taudia bona Kanana taudia bona Hivi taudia bona Iebusu taudia edia tano dekenai umui do ia hakaua. Vadaeni inai taunimanima do lau hadikadia ore. 24 Unai neganai idia edia dirava dekenai do umui tomadiho lasi, bona edia hesiai gaukara do umui karaia lasi, bona edia kara do umui karaia lasi, to idia do umui halusia momokani, bona edia kaivakuku ibounai do umui makohia ore. 25 Lau Lohiabada, emui Dirava, do umui tomadiho henia, vadaeni aniani bona ranu hegeregere do lau henia umui dekenai, bona emui gorere ibounai do lau abia siri. 26 Emui tano dekenai hahine ta do ia mara dika lasi, bona hahine ibounai ese natuna do idia abia. Emui mauri dinadia be do idia momo.

27 “Umui dekenai idia dagedage henia taudia be do lau hagaridia, bona umui dekenai idia tuari henia taudia dekenai daradara do lau havaraia, vadaeni idia ibounai umui dekena amo do idia heau. 28 Umui emui vairana dekenai nanigo do lau siaia, idia ese Hivi taudia bona Kanana taudia bona Hiti taudia do idia lulua emui vairana dekenai. 29 Lagani tamona lalonai do lau luludia lao lasi, badina be lau ura lasi tano ena dagedage gaudia do idia momo herea, vadaeni emui noho do idia hadikaia. 30 Metairametaira do lau luludia, ia lao bona natuna momo ma do umui abia, vadaeni umui be momo herea. Unai neganai tano ibounai be do umui abia. 31 Emui tano ena hetoa gabudia do lau karaia, idia be Davara Kakakaka dekena amo ia lao bona Pilistia taudia edia davara, bona taunimanima idia noho lasi gabuna dekena amo ia lao bona Euperate Sinavai. Inai gabu dekenai idia noho taunimanima danu do umui tuari, bona do umui kwalimu, umui ese idia do umui lulua murimuri gabudia dekenai. 32 Idia danu do umui laloa tamona lasi, bona edia dirava danu do umui laloa tamona lasi.

33 “Idia be emui tano dekenai do idia noho lasi, idia ese umui do idia hakaua kerere, vadaeni do umui kara dika lauegu vairana dekenai garina. Bema umui ese edia dirava dekenai umui tomadiho, umui be dika momokani do umui davaria.”

Copyright information for `HMO