Exodus 32

Israela taudia ese kaivakuku idia karaia

Israela taudia idia itaia, Mose be ororo dekenai ia noho daudau herea, bona ia giroa mai haraga lasi. Vadaeni Arona dekenai idia haboua, idia hamaoroa, idia gwau, “Mose, Aigupito dekena amo ai ia hakaua tauna dekenai, be dahaka ia vara ai diba lasi. Unai dainai kaivakuku do oi karaia, ia ese ai do ia hakaua totona.”

Vadaeni Arona ese idia ia hamaoroa, ia gwau, “Taiana dekenai umui atoa golo herahera gaudia, emui adavana, emui natudia, memero bona kekeni idia karaia gaudia do umui kokia, lau dekenai do umui henia.” Vadaeni taunimanima ibounai ese edia golo herahera gaudia edia taiana dekena amo idia kokia, Arona dekena idia henia. Arona ese unai golo gaudia ia abia, bona ibounai ia havevea hebou. Vadaeni iena imana dekenai unai golo ia koroa, bona boromakau tau ena laulauna ia karaia. Vadaeni unai taunimanima idia gwau, “Israela taudia e, iseda dirava be inai, Aigupito dekena amo ita ia hakaua vadaeni!”

Arona ese unai golo boromakau tau ena vairanai boubou patana ta ia haginia. Vadaeni hereva ia gwauraia, ia gwau, “Kerukeru be aria ta do ita karaia, Lohiabada do ita hanamoa totona.” Unai dainai, daba maragi neganai, boubou gaudia, hegeregere boromakau bona mamoe gaudia idia henia, haida be idia gabua ore boubou gaudia, haida be idia ania hebou boubou gaudia. Vadaeni idia helai helai diho, idia aniani, bona uaina idia inua. Vadaeni idia toreisi, idia gadara mai lebulebu danu.

Lohiabada ese Mose ia hereva henia, ia gwau, “Oi diho lao haraga, badina be oiemu bese taudia, Aigupito dekena amo oi hakaudia taudia, be idia kara dika vadaeni. Lau oda henidia dalana be idia rakatania haraga vadaeni. Idia be boromakau tau ena laulauna idia karaia vadaeni, golo idia havevea gauna, bona idia tomadiho henia, bona ia dekenai boubou gaudia idia henia vadaeni. Bona idia hereva noho, idia gwau, ‘Israela taudia e, inai be iseda dirava, Aigupito dekena amo ita ia hakaua vadaeni.’ ” Ma Lohiabada ese Mose ia hereva henia, ia gwau, “Lau diba inai orea be kudouna auka bona kamonai lasi taudia. 10 Vadaeni oi siri, badina lauegu badu ia siahu momokani idia dainai, bona idia do lao hadikaia ore momokani. Unai murinai oi bona oiemu bese taudia be bese badana ta do lau halaoa.”

11 To Mose ese Lohiabada, iena Dirava, ia noia, ia gwau, “Lohiabada e, dahaka dainai oiemu badu ia siahu dikadika oiemu bese taudia dekenai? Aigupito dekena amo unai taudia oi hakaudia, mai oiemu siahu badana, bona mai oiemu goada badana, ani? 12 Dahaka namo do oi abia bema Aigupito taudia ese inai bamona do idia hereva, ‘Lohiabada ese dala dikana dekena amo iena bese taudia Aigupito dekena amo ia hakaudia. Ororo dekenai ia ese ia aladia, bona ia ura be idia do ia hadikaia ore momokani?’ Oiemu badu mani oi rakatania, bona oiemu orea taudia hadikaia ore laloa dekena amo mani do oi giroa.

13 “Oiemu hesiai taudia Aberahamo bona Isako bona Iakobo mani oi laloa, oi sibona mai gwauhamata metauna oi hamaorodia, oi gwau, ‘Umui emui tubudia do lau hanamodia, vadaeni do idia momo herea, guba ena hisiu be momo herea bamona. Bona unai tano ibounai, lau gwauhamata henia do lau henidia tano, be umui emui tubudia dekenai do lau henia. Unai tano be idia edia tano ela bona hanaihanai.’ ” 14 Vadaeni Lohiabada ese iena bese taudia aladia ore laloa dekena amo ia giroa.

15 Mose be ororo ena ataiai dekena amo ia diho lao. Bona taravatu nadi ruaosi iena imana dekenai ia abidia lao. Unai nadi palaka ruaosi be kahana ruaosi dekenai, vairana kahanai, bona murina kahanai, taravatu edia revareva idia torea vadaeni. 16 Unai nadi be Dirava sibona ese ia karadia, bona unai revareva be Dirava sibona ese ia torea gaudia.

17 Iosua ese regena bada ia kamonai, Israela taudia idia boiboi momo regena. Vadaeni ia ese Mose ia hamaoroa, ia gwau, “Tuari ena regena be kamepa dekenai lau kamonai.”

18 Mose ia gwau, “Lasi, lau kamonai noho gauna be kwalimu dainai idia moale regena lasi, bona idia lusi dainai idia tai regena lasi, to ane idia abia noho.”

19 Kamepa kahirakahira ia raka neganai, Mose ese boromakau tau ena laulau ia itaia, bona taunimanima idia mavaru noho ia itaia. Vadaeni Mose ia badu dikadika, ia ese taravatu nadi ruaosi iena imana dekena amo ia negea diho, bona ororo badina dekenai idia makohia maragimaragi. 20 Mose ese unai boromakau tau ena laulau, idia ese idia karaia gauna ia abia, lahi dekenai ia gabua, ia havevea, bona pauda bamona ia makohia maragimaragi. Vadaeni ranu lalonai ia udaia, ia mikisi, bona ia ese Israela taudia ia oda henidia, vadaeni idia inua.

21 Bona Mose ese Arona ia gwau henia, ia gwau, “Inai taunimanima ese oi dekenai dahaka idia karaia, oi ese inai bamona kara dika bada herea dekenai oi hakaudia?” 22 Arona ia haere, ia gwau, “Lohia e, mani oi badu lasi lau dekenai, oi diba inai taunimanima be kara dika idia ura dikadika. 23 Lau dekenai idia hamaoroa, idia gwau, ‘Kaivakuku do oi karaia, ai do ia hakaua totona, badina be unai Mose, Aigupito dekena amo ai ia hakaua tauna dekenai dahaka ia vara ai diba lasi.’ 24 Vadaeni lau gwau, ‘Mai edia golo herahera taudia ese golo do idia kokia, lau dekenai do idia henia.’ Vadaeni golo idia henia murinai, lau ese lahi dekenai lau negea, bona unai boromakau tau be lahi dekena amo ia mai.”

25 Mose ese taunimanima ia itaia, Arona ese ia koudia lasi dainai, lebulebu karadia idia karaia, vadaeni idau bese taudia, idia tuari henidia taudia, ese edia hemarai sivaraina do idia kamonai. 26 Unai dainai Mose be kamepa ena ikoukou dekenai ia gini, ia boiboi, ia gwau, “Lohiabada ena kahana taudia be lau dekenai do umui haboua mai.” Vadaeni Levi ena natuna taudia ibounai be Mose dekenai idia haboua. 27 Vadaeni Mose ese ia hamaorodia, ia gwau, “Lohiabada, Israela taudia edia Dirava ena oda be inai: Umui ta ta ibounai emui tuari kaia do umui abia, kamepa do umui raka hanaia, emui tadikakadia, emui turadia, bona emui badibadinai taudia do umui alaia mase.” 28 Vadaeni Levi ena natuna taudia ese Mose ena oda hereva idia kamonai henia. Bona unai dina dekenai taunimanima 3000 bamona idia alaia mase. 29 Mose ese Levi taudia ia hamaoroa, ia gwau, “Hari dina umui ese sibona umui hahelagaia vadaeni, umui be Lohiabada ena hesiai taudia. Badina be umui ta ta ese sibona ena natuna, bona sibona ena tadikakana ia alaia vadaeni. Unai dainai Lohiabada ese hanamoa umui dekenai ia henia vadaeni.”

30 Kerukeru, Mose ese Israela taudia ia hamaoroa, ia gwau, “Umui emui kara dika be bada herea. To harihari lau be ororo do lau daekau, Lohiabada dekenai do lau lao, emui dika gwauatao dalana do lau tahua.” 31 Vadaeni Mose ese Lohiabada dekenai ia giroa lou, ia gwau, “Inai taunimanima ese kara dika badana ta idia karaia vadaeni, dirava ta golo dekena amo idia karaia vadaeni. 32 Mani emu kara edia kara dika do oi gwauatao. To bema lasi, lauegu ladana, oi ese oi torea bukana dekena amo do oi kokia.”

33 To Lohiabada ese Mose ia haere henia, ia gwau, “Lau dekenai idia kara dika taudia, edia ladana sibona lauegu buka dekena amo do lau kokia. 34 To harihari oi lao, taunimanima do oi hakaua, oi dekenai lau hamaorolaia tanona dekenai do oi hakaudia vareai. Momokani lauegu aneru ese umui do ia gunalaia. To nega be do ia ginidae, lau ese inai taunimanima dekenai edia kara dika davana do lau henia.”

35 Vadaeni Lohiabada ese Israela taudia gorere ta dekena amo ia hisihisi henidia, badina be boromakau tau, Arona ese ia karaia gauna, be idia tomadiho henia dainai.

Copyright information for `HMO