Ezekiel 18

Dirava ese taunimanima ibounai ta ta edia kara ia itaia noho

Lohiabada ese lau dekenai ia hereva, ia gwau, “Inai hereva gunana ta Israela tano dekenai idia gwauraia lou, gwauraia lou, be dahaka? Idia gwau,

‘Tamana taudia ese vain huahua,
kasiri gaudia idia ania vadaeni,
bona edia natudia ese unai huahua edia mamina dikana idia abia.’ ”
Lohiabada Dirava ia gwau, “Lau be lau mauri noho Diravana, bona lau hereva momokani umui dekenai, inai hereva gunana do umui gwauraia lou lasi Israela dekenai. Kamonai! Taunimanima ibounai ta ta be lauegu, tamana taudia ibounai edia mauri, natuna ibounai edia mauri danu be lauegu sibona. Unai dainai bema tau ta ia kara dika neganai, unai tau sibona be do ia mase.

“Sedira tau namona ta, iena kara be maoromaoro momokani ia noho. Inai tau ese Israela taudia edia dirava koikoidia ia tomadiho henidia lasi. Ia ese kaivakuku dekenai idia henia boubou totona aniani ia ania lasi. Ia ese ia badibadinai ia noho tauna ena adavana ia sihari henia lasi, bona ia ese mai ena hua gorere hahine ta ia sihari henia lasi. Ia ese tau ta ia koia lasi, bona tau ta ena kohu ia henaoa lasi. Bema tau ta ese ia dekena amo ia abiatorehai neganai, ia ese unai abiatorehai ena toana gauna ia henia lou. Ia ese hitolo taudia dekenai aniani ia henia, bona dabua lasi taudia dekenai dabua ia henia. Bema tau ta ese ia dekena amo ia abiatorehai bona ia henia lou, vadaeni inai tau namona ese atoa kau moni ia abia lasi. Bema ia ese kota ia naria neganai, iena kota be mai maoromaoro bona momokani danu. Ia ese kara dika dekena amo ia raka siri noho. Inai tau namona ese lauegu taravatu ia badinaia noho, bona lauegu oda ia kamonai henia noho. Oibe, ia be maoromaoro momokani dainai mauri do ia davaria. Lau, Lohiabada Dirava, lau hereva inai.

10 “Vadaeni, sedira unai tau namona be mai ena natuna mero, bona ia bada neganai taunimanima edia kohu ia henaoa, bona taunimanima ia alaia, ma kara dikadia, 11 iena tamana ese ia karaia lasi gaudia ia karaia. Momokani inai mero be do ia mase. Ia ese dirava koikoi dekenai idia henia aniani gaudia ia ania, bona tau haida edia adavana ia sihari henidia noho. 12 Ia ese ogogami taudia ia hisihisi henia, bona kohu ia henaoa noho. Bona bema tau ta ese ia dekena amo ia abiatorehai neganai ia ese abiatorehai ena toana ia henia lou lasi. Ma inai tau namona ena natuna ese dirava koikoi ia tomadiho henidia noho, bona edia dubu dekenai kara dikadia badadia ia karaia. 13 Bona bema ia dekena amo ia abiatorehai tauna ese iena abiatorehai ia henia lou neganai, unai tau namona ena natuna dikana ese atoa kau moni danu ia abia.

“Inai bamona ia karaia noho tauna be do ia mauri, a? Lasi momokani. Ia ese unai kara dikadia ibounai ia karaia vadaeni, unai dainai ia be do ia mase. Bona iena mase be sibona ena kerere dainai.

14 “To sedira inai tau iharuana be mai ena natuna mero, bona ia bada neganai, ia ese iena tamana ena kara dika ia itaia. Ia itaia, to ia ese iena tamana ena kara bamona ia karaia lasi. Ia be do ia mase lasi. 15 Badina inai tau ese dirava koikoi, Israela taudia edia, ia tomadiho henidia lasi. Boubou gaudia, dirava koikoi dekenai idia henia aniani gaudia, be ia ese ia ania lasi. Ia ese tau ta ena adavana ia sihari henia lasi. 16 Ia ese tau ta dekenai ia dagedage lasi, bona tau ta dekena amo ia henaoa lasi. Bema tau ta ese abiatorehai toana gauna ia henia neganai, ia ese ia henia lou. Ia ese hitolo taudia dekenai aniani ia henia, bona dabua lasi taudia dekenai dabua ia henia. 17 Ia ese kara dika dekena amo ia raka siri momokani, bona atoa kau moni ia abia lasi, abiatorehai dekena amo. Ia ese lauegu taravatu ia badinaia noho, bona lauegu oda ia kamonai henia noho.

“Ia be iena tamana ena kara dika dainai do ia mase, a? Lasi momokani. Ia be do ia mauri.

18 “To momokani, iena tamana ese ia koikoi, ia henaoa, bona nega ibounai taunimanima ibounai dekenai ia kara dika. Unai dainai ia mase, bona iena mase be sibona ia karaia kara dikadia dainai.

19 “To sedira umui henanadai, umui gwau, ‘Badina dahaka do ia hisihisi lasi iena tamana ena kara dika dainai?’ Vadaeni umui emui henanadai lau haere henia inai: Bema unai natuna ese kara maoromaoro ia karaia neganai, bona lauegu taravatu ibounai ia badinaia neganai, ia be do ia mauri momokani.

20 “Kara dika ia karaia tauna, ia sibona be do ia mase. Natuna be do ia hisihisi lasi iena tamana ena kara dika dainai. Bona tamana be do ia hisihisi lasi iena natuna ena kara dika dainai. Kara maoromaoro tauna ese iena kara maoromaoro dainai davana namona do ia abia. Bona kara dika tauna ese iena kara dika dainai davana dikana do ia davaria.

21 “To bema tau dikana ese iena kara dika do ia rakatania, bona lauegu taravatu ibounai ia badinaia, bona kara maoromaoro sibona do ia karaia, unai tau be do ia mase lasi. Ia be do ia mauri momokani. 22 Iena kara dika ibounai be do lau gwauatao, bona do ia mauri, badina be kara maoromaoro ia karaia. 23 Lau Lohiabada Dirava, lau ura umui lau nanadaia, umui laloa lau be lau moale bema tau dikana ta ia mase, a? Lasi momokani. To lau be do lau moale, bema tau ta ese iena kara dika do ia rakatania, bona mauri ia davaria.

24 “To bema kara maoromaoro tauna ta ese iena kara maoromaoro ia rakatania, bona kara dikadia momokani idauidau, tau dikadia idia karaia noho gaudia, ia karaia neganai, ia be do ia mauri noho, a? Lasi. Iena kara namodia ibounai be Kota Badana lalonai do idia laloaboio momokani, bona iena koikoi kara bona iena kara dika dainai ia be do ia mase.

25 “To sedira, do umui gwau, ‘Lohiabada ese ia karaia gauna be maoro lasi.’ Vadaeni umui Israela taudia e, lauegu hereva do umui kamonai: Umui laloa lauegu kara be maoro lasi, a? Umui lau hamaoroa inai: Umui emui kara ena dala be maoro lasi.

26 “Bema kara maoromaoro tauna ta ese iena kara maoromaoro ia rakatania, bona kara dika ia karaia neganai, ia be do ia mase. Kara dika ia karaia dainai ia be do ia mase.

27 “To bema kara dika tauna ese iena kara dika ia rakatania, vadaeni kara maoromaoro bona kara namodia ia karaia neganai, ia be do ia mauri. 28 Ia ese iena kara dikadia ibounai do ia laloa, bona idia dekena amo do ia raka siri. Unai dainai ia be do ia mase lasi, to do ia mauri momokani. 29 To umui Israela taudia ese inai bamona umui hereva noho, umui gwau, ‘Lohiabada ese ia karaia noho gauna be maoro lasi.’ Umui laloa lauegu dala be maoro lasi, a? Umui lau hamaoroa inai: Umui emui dala be maoro lasi.

30 “Bona hari lau Lohiabada Dirava ese umui Israela taudia lau hamaoroa inai: Lau ese umui ta ta ibounai do lau kota henia. Umui emui kara dika do umui rakatania, emui kara dika ese umui do idia hadikaia ore garina.

31 “Emui kara dika do umui hadokoa momokani, vadaeni laloa matamata, bona lauma matamata do umui abia. Umui mase ena anina be dahaka? Israela besena e, egu hereva do umui kamonai.

32 “Badina be lau ese tau ta ena mase lau moalelaia lasi. Unai dainai umui emui lalona do umui giroa, vadaeni do umui mauri. Lau, Lohiabada Dirava lau hereva inai.”

Copyright information for `HMO