Ezekiel 32

Lalohisihisi ane Farao totona

Aiemai hesiai mai guia danu negana, ena lagani namba 12, hua namba 12, ena dina ginigunana dekenai Lohiabada ese lau dekenai ia hereva, ia gwau, “Tanobada tauna e, Farao, Aigupito ena king dainai lalohisihisi ane ta do oi abia, bona ia dekenai egu hereva do oi hamaoroa, do oi gwau,

“ ‘Oi ese oi laloa oi be laiona ta,
bese idauidau edia huanai,
to oi be davara ena huala ta bamona.
Oiemu sinavai edia lalonai,
oiemu udubaubauna dekenai ranu oi doria noho,
bona oiemu aena dekena amo,
ranu oi hamarerea noho,
vadaeni kopukopu ese ranu ia hamiroa noho.’ ”

Lohiabada Dirava ese inai bamona ia hereva noho, ia gwau:
“Bese idauidau taudia momo idia haboua neganai,
lau ese egu reke be oiemu latanai do lau negea,
vadaeni unai besedia ese,
reke lalonai oi do idia veria daekau mai.
Lau ese tano kavakava dekenai oi do lau negea lao,
bona ataiai manudia bona tano dekenai boroma idauidau,
idia ibounai oi dekenai do lau mailaia.
Idia ese oiemu tauanina do idia ania.
Oiemu hidiona be ororo kahana ibounai dekenai do lau negea lao,
bona oiemu tauanina dekena amo,
koura do lau hahonua.
Oiemu rarana be do lau habubua lao,
unai rara ese ororo do ia koua,
bona sinavai ibounai do ia hahonua.
Lau ese oi do lau hadikaia ore neganai,
guba be do lau koua,
bona hisiu edia diari be do lau habodoa, do idia dibura.
Dina be ori dekena amo do lau koua,
bona hua be do ia diari lasi.
Guba ena diari ibounai do lau habodoa oiemu ataiai,
bona oiemu tano be dibura momokani,
dekena amo do lau koua.
Lau Lohiabada Dirava ese lau hereva noho inai.

“Aigupito taudia e, bese idauidau edia huanai, umui diba lasi tanodia lalonai, mai guia danu umui do lau siaia lao neganai, bese momo taudia do idia laloa hekwarahi. 10 Bese momo, be umui dekenai lau karaia gaudia dekenai do idia gari, mai hoa bada danu. Lau ese egu tuari kaia do lau davea neganai, king taudia be mai gari danu do idia heudeheude. Oiemu moru dinana dekenai, unai taudia ibounai do idia heudeheude, idia ta ta ese edia mauri do idia laloa momo, unai bamona karadia idia dekenai do idia vara garina.”

11 Lohiabada Dirava ese Aigupito ena king dekenai ma ia hereva, ia gwau: “Babulonia ena king ena tuari kaia be oiemu latanai do ia ginidae. 12 Umui do lau durua lasi, vadaeni goada herea taudia ese umui do idia tuari henia. Inai taudia be bese idauidau ibounai edia huanai, dagedage besena taudia momokani. Idia ese Aigupito ena hekokoroku do idia hamakohia ore, bona Aigupito ena taudia ibounai do idia alaia mase. Emui taunimanima, bona umui hekokorokulaia gaudia ibounai, be unai bese ese do idia hadikaia ore.

13 “Lau ese Aigupito ena ubua gaudia ibounai,
be do lau hadikaia ore,
ranu gabudia ibounai edia badibadinai.
Taunimanima edia aedia ese,
unai ranu gabudia do idia moia lou lasi,
bona ubua gaudia ese edia aedia dekena amo,
ranu do idia hamiroa lou lasi.
14 Unai neganai ranu gabudia do lau hagoevaia,
bona emui sinavai ranu be do idia heau namonamo,
olive dehoro bamona.
Lau Lohiabada Dirava lau hereva noho inai.
15 Aigupito be anina lasi tano do lau halaoa,
bona iena tano ena anina ibounai do lau abia lao.
Bona Aigupito dekenai noho taudia ibounai,
be do lau alaia mase neganai,
idia be do idia diba lau be Lohiabada.

16 “Unai lalohisihisi ane do idia abia Aigupito totona. Bese idauidau edia hahine taudia ese Aigupito totona bona Aigupito taudia ibounai totona do idia taitai neganai, unai ane do idia abia. Lau inai, Lohiabada Dirava lau hereva vadaeni.”

Mase taudia idia noho gabuna

17 Aiemai hesiai mai guia danu negana, ena lagani namba 12, hua ginigunana ena dina namba 15 dekenai, Lohiabada ese lau dekenai ia hereva, ia gwau, 18 “Tanobada tauna e, Aigupito taudia ibounai, taunimanima momo herea totona do oi tai, bona idia do oi siaia diho, idia bona bese goadadia edia hahine taudia danu, mase gabuna dekenai do idia diho, guri dobuna dekenai idia diho vadaeni taudia danu do idia noho. 19 Idia dekenai do oi gwau:

“ ‘Umui laloa emui hairai ese,
haida edia hairai ia hereaia, a?
Do umui diho lao,
Dirava idia diba lasi taudia danu do umui hekure hebou.’
20 “Aigupito taudia, be tuari dekenai idia mase vadaeni taudia danu do idia moru. Tuari kaia ia hegaegae noho, bona ia ese idia ibounai do ia alaia mase. 21 Tuari mai goadadia taudia, guna Aigupito idia durua taudia, ese mase gabuna, hel lalonai, Aigupito edia mase matamata taudia do idia abidia dae. Do idia gwau, ‘Inai Dirava diba lasi taudia, tuari dekenai idia mase, be inai mase gabuna dekenai idia mai vadaeni, bona iniseni do idia hekure noho!’

22 “Asuria be unuseni, mai iena tuari orea ibounai danu. Iena tuari taudia edia guria gabudia ese Asuria ena hekure gabuna idia hagegea noho. Idia ibounai be tuari lalonai idia mase taudia. 23 Edia guria gabudia be guri dobu masemase dekenai idia noho, bona idia ese Asuria ena guria gabuna idia hagegea noho. Inai taudia ibounai, guna idia ese taunimanima ibounai idia hagaria bada, to idia be tuari kaia dekenai idia mase.

24 “Elama danu be unuseni, bona iena orea badana taudia ibounai ese iena guria gabuna idia hagegea noho. Idia ibounai be tuari kaia dekenai idia mase, bona idia ese kopina utua kara ena taravatu idia abia lasi. Guna idia ese taunimanima ibounai idia hagaria bada, to harihari guri dekenai idia diho taudia danu idia hemarai hebou noho. 25 Elama totona hekure gabuna idia karaia, idia aladia mase taudia edia huanai. Elama ena tuari taudia edia guria gabudia ese Elama ena guria gabuna idia hagegea noho. Idia ibounai be kopina utua kara ena taravatu idia abia lasi, bona tuari lalonai idia mase taudia sibona. Idia be guna idia do mauri neganai, taunimanima edia huanai gari bada idia havaraia, to hari idia be mase taudia, mai edia hemarai bada, tuari dekenai idia mase taudia danu idia hekure hebou noho.

26 “Meseka bona Tubala danu be unuseni. Edia guria gabudia be edia orea taudia ibounai edia guria gabudia ese idia hagegea noho. Unai taudia ibounai be kopina utua kara idia abia lasi taudia, bona tuari kaia dekena amo idia mase, badina idia ese tanobada idia noho neganai, taunimanima idia hagaria bada herea. 27 Idia ese edia sene taudia goadadia hegeregerena, mai mataurai bada danu guria gabunai idia diho, a? Lasi momokani. Badina unai sene taudia be mai edia tuari gaudia danu mase gabuna dekenai idia diho. Edia tuari kaia be edia kwaradia henunai idia atoa, bona edia kesi be edia turiadia edia latanai idia atoa. Gunaguna tanobada dekenai idia mauri noho neganai, idia ese gari bada taunimanima dekenai idia havaraia.

28 “Farao, Aigupito ena king e, umui Aigupito taudia be kopina utua kara idia abia lasi taudia danu do umui hekure. Unai tuari dekenai idia mase taudia edia tauanidia ese umui emui tauanidia do idia koua momokani.

29 “Edoma danu be unuseni, mai ena king bona ena lohia taudia ibounai. Guna idia be tuari taudia mai goadadia, to hari idia be mase gabuna, hel dekenai idia hekure noho. Kopina utua kara idia abia lasi, bona tuari dekenai mase taudia danu mase gabuna lalonai idia hekure noho.

30 “Mirigini kahana lohia taudia ibounai danu be unuseni, bona Sidono taudia ibounai danu. Idia edia goada bona siahu ese guna tanobada taudia dekenai gari bada idia havaraia, to hari be mai hemarai danu guri lalonai idia diho, tuari dekenai idia mase taudia danu. Unuseni idia hekure noho, to kopina utua kara idia abia lasi. Guri dobu masemase dekenai idia diho taudia danu idia hemarai hebou noho.”

31 Lohiabada Dirava ese inai bamona ia hereva noho, ia gwau: “Farao bona iena tuari taudia be unai guri dekenai idia vareai, bona idia ese unai tuari dekenai mase taudia idia itaia neganai, edia lalodia ese goada sisina do idia davaria.

32 “Momokani Farao be tanobada dekenai ia noho neganai, ia dekena amo taunimanima momo lau hagaria bada, to ia bona iena tuari orea be do idia mase. Bona unai murinai tuari dekenai idia mase taudia danu guri lalonai do idia hekure hebou. Io, kopina utua kara idia abia lasi taudia danu do idia hekure hebou. Lau inai, Lohiabada Dirava lau hereva vadaeni.”

Copyright information for `HMO