Ezra 10

Idau bese hahine idia negea

Esera be Dubu Helaga ena vairanai ia guriguri, bona mai tai danu inai kara dika ia gwauraia hedinarai neganai, Israela taudia momo herea, tau, hahine bona natudia danu be ia dekenai idia hebou. Idia tai dikadika noho. Vadaeni Sekanaia, Iehiele ena natuna, Elama iduhu tauna, ese Esera ia hamaoroa, ia gwau, “Iseda gwauhamata iseda Dirava dekenai ita hamakohia vadaeni, inai tano ena idau bese hahine ita adavaia vadaeni. Momokani inai dika ita karaia, to inai dika ita hanamoa lou diba. Israela be mai ena namo lou dalana. Namona be ita ese iseda Dirava dekenai do ita gwauhamata, inai hahine ibounai, mai edia natudia danu do ita negea, bona siaia lao. Ai ese oi, bona Dirava ena oda idia gari henia taudia, emui sisiba hereva do ai kamonai henia. Ai ese Dirava ena Taravatu do ai karaia. Esera e, oi toreisi, badina inai be oiemu gaukara, bona ai ese oi do ai durua momokani. Do oi goada, bona do oi karaia.”

Vadaeni Esera ia toreisi, ia ese hahelagaia taudia bona Levi taudia edia gunalaia taudia, bona Israela taudia ibounai ia oda henia, Sekanaia ia gwauraia karana karaia totona do idia gwauhamata. Bona idia ese unai bamona idia gwauhamata.

Unai neganai Esera be Dirava ena Dubu Helaga ena vairana dekena amo ia raka lao, Iehohanana Eliasibi ena daiutu dekenai ia lao. Unuseni hanuaboi ta ia noho, bona hesiai mai guia danu idia giroa mai Iuda taudia edia dika dainai ia tai. Ia ese aniani ia ania lasi, bona ranu sisina danu ia inua lasi.

Vadaeni oda hereva badana, be Iuda bona Ierusalema edia kahana ibounai dekenai idia siaia lao, Babulonia ena hesiai mai guia danu dekena amo idia giroa mai taudia ibounai Ierusalema dekenai do idia haboua mai. Bona dina toi lalonai, tau ta bema ia mai lasi neganai, tau badadia bona lohia taudia ese iena kohu do idia kokia, bona ia be Babulonia ena hesiai mai guia danu dekena amo idia giroa mai taudia edia hebou dekena amo do idia atoa siri.

Unai dina toi lalonai, bona hua namba 9 ena dina namba 20 dekenai, Iuda bona Beniamina taudia ibounai be Ierusalema dekenai, Dubu Helaga vairanai ariara dekenai idia helai. Medu bada ia diho noho, bona keru dainai, bona hebou ena anina metau dainai, idia hebou taudia idia heudeheude noho.

10 Hahelagaia tauna Esera ia toreisi, idia dekenai ia hereva, ia gwau, “Umui be umui kerere vadaeni, idau bese edia hahine taudia umui adavaia vadaeni dainai, Israela ena kerere umui habadaia vadaeni. 11 Unai dainai, emui kerere be Lohiabada, emui sene taudia edia Dirava, ena vairanai do umui gwauraia hedinarai, bona iena ura do umui karaia. Inai tano idia noho idau bese taudia dekena amo do umui raka siri, bona bema idau bese hahine umui adavaia vadaeni, umui ese idia do umui atoa siri.”

12 Vadaeni hebou taudia ibounai idia haere, idia hereva mai boiboi danu, idia gwau, “Ai ese oiemu hereva hegeregerena do ai karaia momokani.” 13 Bona ma idia gwau, “To taunimanima be momo herea, bona medu bada ia diho noho. Ai be murimuri dekenai do ai gini diba lasi. Bona inai gaukara be dina tamona o dina rua gauna lasi, badina ai be kerere bada inai kara dekenai. 14 Namona be, aiemai lohia taudia be Ierusalema dekenai do idia noho, bona inai hebou ena gaukara ibounai do idia karaia. Hanua ta ta ibounai dekenai, idau bese hahine idia adavaia taudia ta ta be, edia nega, edia nega dekenai inai lohia taudia edia vairana dekenai do idia mai, edia hanua tau badadia, bona hanua kota biagudia idia danu. Inai bamona do idia karaia, ela bona iseda Dirava ena badu mai siahu danu, inai kara dainai, be ita dekena amo do ia ore.” 15 Ionatana Asahele, bona, Iahaseia Tikeva, bona Mesulama, bona Levi tauna Sebetai, sibodia ese inai hereva idia ura lasi.

16 Vadaeni hesiai mai guia danu dekena amo idia giroa mai taudia ese inai dala idia abia dae. Hahelagaia tauna Esera ese tau haida, iduhu kwarana taudia, ia abia hidi, bona ia ese edia ladadia buka dekenai ia torea. Hua namba 10 ena dina ginigunana dekenai, inai lohia taudia ese edia hebou idia hamatamaia, unai kara do idia tahua totona. 17 Hua toi idia gaukara, ela bona hua ginigunana ena dina ginigunana dekenai, idau bese hahine idia adavaia vadaeni taudia ibounai idia tahua haorea vadaeni.

Idau bese hahine idia adavaia taudia

18 Idau bese hahine idia adavaia vadaeni taudia edia ladadia bona edia iduhu be inai:

Hahelagaia taudia:
Iosua Iosadaka bona iena tadikakana edia natudia:

Maseaia, Eliesere, Iaribi, bona Gedalaia.

19 Idia be idia gwauhamata, edia adavadia do idia negea. Bona edia kara dika boubouna be mamoe tau ta, edia kara dika kokia totona.
20 Imere iduhu dekena amo:
Hanani bona Sebadaia.

21 Harimi iduhu dekena amo:
Maseaia, Elia, Semaia, Iehiele, bona Usaia.

22 Pasahuru iduhu dekena amo:
Elioenai, Maseaia, Isamaela, Netanele, Iosabada, bona Elasa.

23 Levi taudia:
Iosabada, Simei, Kelaia (ena ladana ta be Kelita), Petahaia, Iuda, bona Eliesere.

24 Ane abia taudia:
Eliasibi.

Dubu Helaga gimaia taudia:
Salumu, Teleme bona Uri.

25 Israela besena taudia ma haida:

Paroso iduhu dekena amo:
Ramaia, Isia, Malekaia, Miamini, Eleasara, Hasabaia, Benaia.

26 Elama iduhu dekena amo:
Matanaia, Sekaraia, Iehiele, Abidi, Ieremoto bona Elia.

27 Satu iduhu dekena amo:
Elioenai, Eliasibi, Matanaia, Ieremoto, Sabada, bona Asisa.

28 Bebai iduhu dekena amo:
Iehohanana, Hananaia, Sabai, bona Atalai.

29 Bani iduhu dekena amo:
Mesulama, Maluku, Adaia, Iasubu, Seala, bona Ieremoto.

30 Pahata Moaba ena iduhu dekena amo:
Adina, Kelala, Benaia, Maseaia, Matanaia, Besalele, Binui, bona Manase.

31 Harimi ena iduhu dekena amo:
Eliesere, Isihaia, Malekaia, Semaia, Simeona,

32 Beniamina, Maluku, Semaraia.
33 Hasumu ena iduhu dekena amo:
Matenai, Matata, Sabada, Elipelete, Ieremai, Manase, bona Simei.

34 Bani ena iduhu dekena amo:
Madai, Amarama, Uele,

35 Benaia, Bedeia, Keluhi, 36 Vanaia, Meremoto, Eliasibi, 37 Matanaia, Matenai, bona Iasu.
38 Binui ena iduhu dekena amo:
Simei,

39 Selemaia, Natana, Adaia. 40 Makenadebai, Sasai, Sarai, 41 Asarele, Selemaia, Semaraia, 42 Salumu, Amaraia bona Iosepa.
43 Nebo ena iduhu dekena amo:
Ieiele, Matitaia, Sabada, Sebina, Iadai, Ioela bona Benaia.

44 Inai taudia ibounai ese idau bese hahine idia adavaia, vadaeni idia ese edia hahine idia negea, bona idia, mai edia natudia danu idia siaia lao.

Copyright information for `HMO