Ezra 5

Tatenai ese revareva Dariuse dekenai ia siaia

Unai neganai peroveta taudia rua, Hagai bona Sekaraia, Ido ena natuna, ese Israela ena Dirava ena ladanai, Iuda bona Ierusalema dekenai noho Iuda taudia idia haroro henia. Vadaeni Serubabele Sealetiele bona Iosua Iosadaka ese unai peroveta taudia edia hereva idia kamonai neganai, idia toreisi, Dirava ena Dubu Helaga Ierusalema dekenai idia haginia lou hamatamaia. Bona unai peroveta taudia ruaosi ese idia durudia.

To unai neganai, Tatenai, Euperate Sinavai ena dina diho kahana basileia ena lohia tauna badana, bona Setara Bosenai, bona edia hesiai taudia, be idia dekenai idia lao, idia gwau, “Daika ese umui ia oda henia, inai Dubu do umui haginia lou, bona inai magu umui hanamoa noho?” Ma idia dekenai idia nanadaia, idia gwau, “Inai Dubu idia haginia noho taudia edia ladadia be daika?”

To Iuda ena lohia taudia be edia Dirava ese idia ia naria noho, vadaeni Parasa lohia taudia ese edia gaukara idia hadokoa lasi. Badina idia gwau revareva ta Dariuse dekenai do idia siaia guna, iena oda do idia diba totona.

Tatenai, Euperate Sinavai ena dina diho kahana tano ena lohia tauna badana, bona Setara Bosenai, bona edia bamona taudia, bona edia lohia taudia haida ese king Dariuse dekenai revareva ta idia siaia. Edia revareva ena anina be inai:

“Inai revareva be king Dariuse ena. King e, maino do oi abia.

“King e, namona be oi diba ai be Iuda basileia dekenai ai lao, Dirava badana ena Dubu dekenai, bona inai Dubu be Iuda lohia taudia ese idia haginia lou noho.
“Nadi badadia, bona au, haba lalonai atoa gaudia, dekena amo idia haginia noho. Inai gaukara be mai goada danu idia karaia noho, bona edia gaukara ena anina ia vara noho.

“Vadaeni ai ese unai Iuda lohia taudia ai nanadaia, ai gwau, ‘Daika ese umui ia oda henia, inai Dubu bona magu umui haginia lou totona?’

10 “Ma ai nanadaidia, edia ladadia be daika, unai gaukara edia gunalaia taudia be oi dekenai do ai hamaoroa totona.

11 “Idia ese ai dekenai idia haere, idia gwau, ‘Ai be guba bona tanobada ena Dirava ena hesiai taudia, bona lagani momo idia lao vadaeni, Israela ena king badana ta ese inai Dubu Helaga ia haginia bona ia haorea. 12 To aiemai sene taudia ese Guba ena Dirava idia habadua dainai ia ese Nebukanesa, Babulonia ena king, Kaledea tauna, ena siahu henunai ia atodia. Unai king ese inai Dubu ia hadikaia ore, bona aiemai bese taudia be Babulonia kahana dekenai ia abidia lao.

13 “ ‘To Sairasi, Babulonia ena king ena lohia lagani ginigunana lalonai, Sairasi ese oda ia gwauraia, inai Dirava ena Dubu do ai haginia lou totona. 14 Bona golo bona siliva gaudia, unai Dirava ena Dubu ena kohu, Nebukanesa ese Ierusalema Dubu dekena amo ia abia, bona Babulonia dubu lalonai ia atoa gaudia, be king Sairasi ese Babulonia dubu dekena amo ia abia, tau ta ladana Sesebasara dekenai ia henia. Sairasi ese Sesebasara be Iuda ena lohia tauna badana ia halaoa.

15 “ ‘Sairasi ese Sesebasara ia hamaoroa, ia gwau: Inai gaudia do oi abia, bona Ierusalema ena Dubu Helaga lalonai do oi atoa. Bona Dirava ena Dubu Helaga be ena gabu korikori dekenai ma do oi haginia lou.

16 “ ‘Vadaeni inai Sesebasara be ia mai, bona Dirava ena dubu Ierusalema dekenai ena badina nadidia ia haginia. Bona unai negana ia mai bona hari, ai ese Dubu haginia totona ai gaukara vadaeni, to do ia ore lasi.’

17 “Unai dainai, king e, bema oi ura neganai, king ena sivarai buka idia haboua ruma Babulonia lalonai mani do idia tahua, do idia diba king Sairasi ese momokani ia oda, inai Dirava ena Dubu Ierusalema dekenai do idia haginia lou o lasi. Unai murinai, mani emu kara oiemu ura inai Dubu totona do oi hadibaia ai dekenai.”
Copyright information for `HMO