Ezra 6

King Sairasi ena oda gunana idia davaria

Vadaeni king Dariuse ese oda ia gwauraia, unai oda gunana, king Sairasi ia torea oda, be Babulonia dekenai do idia tahua. To Ekebatana, Media basileia ena hanua badana lalonai pepa ta idia davaria. Unai pepa ena latanai torea hereva be inai:

“King Sairasi ese iena king dagi ia hamatamaia lagani ginigunana lalonai, oda ia gwauraia, Dubu Helaga be Ierusalema dekenai do idia haginia lou, boubou, bona Lohiabada dekenai henia gaudia, do idia gabua ena gabu totona. Dubu Helaga ena ataiai latana be 27 mita, ma iena lababana danu be 27 mita. Dubu ena haba be nadi metaudia laini toi, bona edia latanai au badadia laini tamona do idia atoa. Ma idia edia latanai nadi ma haida laini toi, bona au ma laini tamona do idia atoa. Inai bamona do idia karaia, ela bona haba ena ataiai maka idia abia. Haginia gaukara ena davana, be Parasa king ese iena moni dekena amo do ia henia. Inai danu, Dirava ena Dubu Helaga ena golo bona siliva gaudia, king Nebukanesa ese Ierusalema dekena amo ia abia, bona Babulonia dekenai ia abia mai gaudia, be do idia henia lou. Ierusalema ena Dubu Helaga matamata dekenai, edia gabu ta ta dekenai unai golo bona siliva gaudia ma do idia atoa lou.”

King Dariuse ese oda ia gwauraia, Dubu Helaga haginia gaukara do idia karaia noho

Vadaeni king Dariuse ese Parasa taudia edia revareva davana ia siaia, ia gwau,

“Tatenai, Euperate Sinavai ena dina diho kahanai ena gavana, bona Setara Bosenai, mai emui tau badadia danu Euperate ena dina diho kahana dekenai umui noho taudia e, umui kamonai:

“Inai Dirava ena Dubu Helaga gaukara be do idia karaia noho. Iuda lohia taudia bona tau badadia ese Dirava ena Dubu be iena gabu korikori dekenai do idia haginia. Inai danu, lau ese umui lau oda henia, edia Dubu haginia totona Iuda taudia do umui durua. Dubu haginia gaukara ena davana be dina ta ta ibounai do umui henia, vadaeni gaukara do ia metaira lasi. Inai moni be emui Euperate Sinavai kahana taudia dekena amo takisi dekenai do umui gogoa. Dina ta ta ibounai, dina ta do umui misi lasi, Ierusalema ena hahelagaia taudia edia ura gaudia do umui henia, hegeregere boromakau natuna tau, o mamoe, o mamoe natuna, Guba dekenai ia noho Dirava dekenai do idia boubou henia totona. Uiti, damena, uaina bona olive dehoro danu do umui henia. 10 Inai gaudia do umui henia, idia ese Guba dekenai noho Dirava do idia boubou henia totona, bona lau, bona lauegu natuna hanamoa totona, Dirava dekenai do idia guriguri. 11 Bona ma lau oda inai: Tau ta ese inai oda bema ia kamonai henia lasi neganai, egu hesiai taudia ese au ta iena ruma dekena amo do idia kokia, iena duduna ta do idia segea, bona unai au dekena amo unai tau do idia gwadaia mase. Ma unai tau ena ruma be momoru negea gabuna do idia halaoa. 12 Inai hereva do ia haidaua, o Dubu Helaga ia hadikaia king ta, o bese ta, be Dirava ese do ia halusia momokani. Badina be Dirava ese Ierusalema hanua ia abia hidi, iena Dubu Helaga haginia gabuna totona. Lau Dariuse ese egu oda lau gwauraia inai. Do umui karaia namonamo.”

Dubu Helaga idia hahelagaia

13 Vadaeni Tatenai, gavana tauna, Setara Bosenai bona edia tau badadia danu ese king Dariuse ena oda idia karaia namonamo. 14 Iuda tau badadia ese Dubu Helaga idia haginia, bona peroveta taudia Hagai bona Sekaraia ese edia lalodia idia hagoadaia dainai, edia gaukara idia karaia namonamo. Dubu haginia gaukara be idia karaia haorea, Israela ena Dirava ena oda, bona king Sairasi, bona king Dariuse, bona king Aratasaseta, Parasa taudia edia king, edia oda dainai.

15 Hua ena ladana Adara ena dina ihatoina, king Dariuse ena king lagani namba 6 lalonai, be unai Dubu Helaga idia karaia haorea.

16 Vadaeni Israela taudia, hahelagaia taudia, Levi taudia, bona Babulonia ena abia mauri dekena amo idia giroa lou taudia ese Dirava ena Dubu Helaga idia hahelagaia, mai edia moale bada danu. 17 Inai Dubu hahelagaia totona, boromakau tau 100, mamoe 200, bona mamoe natuna 400 idia henia, boubou gaudia totona, bona nanigosi 12 idia henia, edia kara dika totona, unai 12 be Israela ena iduhu 12 hegeregerena. 18 Bona hahelagaia taudia, edia orea ta ta dekenai, bona Levi taudia danu, be edia gaukara ta ta totona idia abia hidi, Dubu Helaga ena gaukara idauidau do idia karaia, Ierusalema dekenai. Inai gaukara ta ta idia henia, Mose ena Buka lalonai ia torea hegeregerena.

Pasova Aria idia karaia

19 Babulonia ena abia mauri dekena amo idia giroa mai taudia ese Pasova Aria idia karaia lagani iharuana lalonai, hua ginigunana bona dina namba 14 dekenai. 20 Hahelagaia taudia bona Levi taudia ese sibodia idia hagoevaia hebou, idia ibounai idia goeva momokani. Unai dainai Levi taudia ese Pasova totona mamoe idia alaia mase, Babulonia ena abia mauri dekena amo idia lou mai taudia ibounai totona, bona idia sibona totona, bona edia bamona hahelagaia taudia totona.

21 Israela taudia, Babulonia ena abia mauri dekena amo, Iuda dekenai idia giroa mai taudia ese Pasova idia ania. Ma idau bese taudia haida, Iuda dekenai idia noho, danu ese Pasova idia ania, badina idia ese edia tano ena kara mirodia idia rakatania vadaeni, Lohiabada, Israela ena Dirava do idia tomadiho henia totona. 22 Dina 7 lalonai idia ese mai hatubua gauna lasi paraoa idia ania, mai moale danu, badina be Lohiabada ese ia hamoaledia. Idia moale danu, badina be Lohiabada ese Asuria ena king, Parasa tauna, ena lalona ia ania, vadaeni ia ese Dirava, Israela ena Dirava, ena Dubu Helaga haginia lou gaukara dekenai ia durua.

Copyright information for `HMO