Genesis 15

Dirava ena gwauhamata taravatuna Aberamo dekenai

Inai murinai, Lohiabada ena hereva Aberamo ia kamonai, mata hanai lalonai. Lohiabada ia gwau,

“Aberamo e, oi gari lasi.
Lau be oiemu kesi.
Oi dekenai hanamoa do lau habadaia.”
To Aberamo ia gwau, “Egu Lohiabada Dirava e, lau be natuna lasi. Edena bamona lau dekenai hanamoa do oi habadaia? Lauegu kohu do ia abia tauna be tamona, Eliesere, Damaseko tauna. Oi be natuna ta lau dekenai oi henia lasi, bona egu hesiai tauna ese lauegu kohu do ia abia.”

Vadaeni, Lohiabada ena hereva Aberamo ese ia kamonai lou. Lohiabada ia gwau, “Inai hesiai tauna be oiemu kohu do ia abia lasi, oiemu natuna korikori ese oiemu kohu do ia abia.” Lohiabada ese ia hakaua murimuri dekenai, ia gwau, “Guba oi itaia, hisiu oi duahia diba o lasi? Oiemu tubuna edia momo be dohore unai bamona.”

Vadaeni, Aberamo ese Lohiabada dekenai ia abidadama henia, unai dainai Lohiabada ia gwauraia, Aberamo be maoro.

Lohiabada ma ia dekenai ia hereva lou, ia gwau, “Lau Lohiabada ese Uru, Kaledea ena hanua dekena amo oi lau hakaua vadaeni, inai tano oi dekenai do lau henia, oiemu tano korikori totona.”

To Aberamo ia gwau, “Lohiabada Dirava e, edena bamona do lau diba inai be lauegu tano korikori?”

Lohiabada ia gwau, “Boromakau hahine ta, lagani toi gauna, bona nani ta, lagani toi gauna, bona mamoe tau, lagani toi gauna, bona manu ena ladana kerea ta, bona pune manu natuna ta, oi mailaia lau dekenai.”

10 Aberamo ese inai ibounai ia abia mai, ia utudia parara, kahana rua idia lao, bona kahana rua rua dekenai ia haboua, to manu ia utudia lasi. 11 Galo manudia idia diho vamu dekenai, to Aberamo ese ia luludia.

12 Dina ia diho neganai, Aberamo ia mahuta mase, bona gari bada ese ia abia. 13 Lohiabada ese ia dekenai ia hereva, ia gwau, “Momokani, oiemu tubuna be idau tano dekenai dohore idia noho, idau taudia bamona. Unuseni hesiai gaukara davana lasi do idia karaia, bona hisihisi do idia abia lagani 400 dekenai. 14 To idia dekenai hesiai gaukara do idia henia besena be do lau panisia, bona unai tano oiemu bese taudia ese do idia rakatania neganai, kohu momo do idia abia lao. 15 To oiemu mauri lagani be do momo herea, bona mai maino danu do oi mase, bona oi buruka momokani neganai, do idia guria oi. 16 Oiemu tubuna be inai tano dekenai do idia giroa mai lasi, ia lao bona uru 4 do idia ore vadaeni. Badina be inai Amoro taudia do lau luludia diba lasi, ia lao bona edia dika be bada, davana do lau henia dikana hegeregerena.”

17 Dina ia diho, bona dibura ia mai neganai, lahi gauna mai ena kwalahu, bona kede idia hedinarai. Idia be vamu gaudia huanai idia lao. 18 Unai dina dekenai Lohiabada ese Aberamo dekenai ia gwauhamata, bona gwauhamata taravatuna ia karaia, ia gwau, “Lau ese oiemu tubuna taudia dekenai inai tano ibounai do lau henia: Aigupito ena sinavai dekena amo ia lao bona sinavai badana ladana Euperate. 19 Kene taudia edia tano, Kenise taudia edia tano, Kadamono taudia edia tano. 20 Hiti taudia edia tano, Perisi taudia edia tano, Repaima taudia edia tano, 21 Amoro taudia edia tano, Kanana taudia edia tano, Girigasa taudia edia tano, bona Iebusu taudia edia tano.”

Copyright information for `HMO