Genesis 25

Aberahamo ese iena bese haida ma ia havaraia

Aberahamo ese hahine ta ma ia adavaia, iena ladana be Ketura. Edia natudia iena bogana dekena amo idia vara edia ladana be inai: Simurana bona Iokosana bona Medana bona Midiana bona Isabaka bona Sua. Iokosana ese Sieba bona Dedana ia havaraia. Dedana ese Asurima bona Letusima bona Leumima edia bese ia havaraia. Midiana ese Epa bona Epere bona Hanoka bona Abida bona Eledaha ia havaraia. Inai ibounai be Ketura ena bese.

Aberahamo ese iena kohu ibounai Isako dekenai ia rakatania. To ia do mase lasi neganai, iena adavana haida edia natudia dekenai ia ese harihari gaudia ia henia, vadaeni dina ia daekau kahana dekenai ia siaidia lao, Isako danu idia noho hebou lasi.

Aberahamo ia mase, bona idia guria

Aberahamo ena mauri lagani ibounai be 175. Vadaeni ia mase, ia buruka momokani neganai, bona iena varavara mase taudia danu ia haboua. Iena natuna ruaosi Isako bona Isamaela ese ia idia abia, Makapela ena nadi matuna dekenai idia guria, unai nadi matuna be Mamare ena dina daekau kahana dekenai, Eparona Sohara, Hiti tauna ena tano dekenai. 10 Unai tano be Aberahamo ese Hiti taudia dekena amo ia abia. Unuseni Isako bona Isamaela ese Aberahamo idia guria, iena adavana Sara danu. 11 Aberahamo ia mase murinai, Dirava ese iena natuna Isako ia hanamoa. Isako be “Lau ia itaia Mauri Tauna ena ranu guri” ena gabu kahirakahira ia noho.

Isamaela ena natuna bona ena tubuna

12 Isamaela ena natuna bona iena tubuna be inai: Ia be Aberahamo ena natuna, Sara ena hesiai hahine Hagara ena bogana dekena amo ia vara. Hagara be Aigupito hahine. 13 Isamaela ena natuna bona iena tubuna edia ladana be inai: Iena natuna ia vara guna be Nebaioto, iena murinai idia vara taudia be Kedara bona Adabela bona Mibisama. 14 Bona Misima bona Duma bona Masa, 15 bona Hadada bona Tema bona Ieturu bona Napisi bona Kedema. 16 Isamaela ena natuna be unai, edia ladana unai, edia hanua bona edia kamepa dekenai be unai edia ladana idia atoa, idia ibounai 12 be hanua ta ta ena lohia taudia idia halaoa. 17 Isamaela ena mauri lagani be 137. Ia mase, iena varavara taudia dekenai ia danu idia haboua. 18 Isamaela ena bese edia tano be Havila ia lao bona Suru, Aigupito ena dina ia daekau kahana dekenai, Asuria dekenai ia lao dala badinai. Idia be edia varavara taudia Aberahamo ena natuna dekena amo idia noho siri.

Esau bona Iakobo idia vara

19 Aberahamo ena natuna Isako ena sivarai be inai: 20 Isako ena mauri lagani be 40 neganai, ia ese Rebeka ia adavaia. Rebeka be Betuela, Aramea tauna ta ena natuna, bona Labana, Aramea tauna ta ena taihuna. Betuela be Mesopotamia tano dekena amo.

21 Isako ese Lohiabada ia noinoi henia, iena adavana dainai, badina ia be natuna lasi. Lohiabada ese iena noinoi ia kamonai, vadaeni Rebeka ia rogorogo. 22 Natuna be mero rua iena bogana lalonai, bona idia edia marere be heatu bamona dainai, Rebeka ia gwau, “Inai bamona idia karaia be, edena bamona do lau mauri noho?” Unai dainai Lohiabada dekenai ia noinoi. 23 Lohiabada ia haere, ia gwau,

“Bese rua be oiemu bogana lalonai,
bese rua be oi dekena amo do idia vara.
Ta ese ma ta do ia hamorua.
Vara guna tauna ese,
vara gabeai tauna ena hesiai tauna,
do ia lao.”
24 Iena natuna havaraia nega be kahirakahira neganai, iena bogana lalonai be memero rua idia noho. 25 Guna ia vara mero be kakakaka. Iena ladana idia atoa Esau, badina be iena tauanina ibounai be dabua mai huihui bamona. 26 Gabeai iena tadina ia vara, bona iena imana dekena amo Esau ena aena ia dogoatao. Iena ladana idia atoa Iakobo, ena anina be “gabu abia tauna.” Idia ruaosi idia vara neganai, Isako ena mauri lagani be 60.

Esau ese iena vara guna ena hanamoa ia negea

27 Memero ruaosi idia tubu ia lao bona idia bada. Esau be labana ia diba momo tauna, bona uda dekenai loaloa tauna, to Iakobo ena kara be manada, bona ia be ruma dekenai noho tauna. 28 Isako ese Esau ia lalokau henia, badina be labana dekenai ia alaia vamu ia ura ania, to Rebeka ese Iakobo ia lalokau henia.

29 Dina ta Iakobo ese aniani ia nadua noho, vadaeni Esau be gunika dekena amo ia mai. 30 Ia be hitolo bada herea dainai, Esau ese Iakobo dekenai ia noinoi, ia gwau, “Unai aniani kakakaka oi henia, lau ania, badina lau be hitolo mase.” (Unai dainai iena ladana ta idia atoa Edoma, ena anina be, kakakaka.)

31 To Iakobo ia haere, ia gwau, “Bema oiemu vara guna ena hanamoa oi henia lau dekenai, aniani do lau henia oi.”

32 Esau ia gwau, “Be, lau kahirakahira lau mase, lauegu vara guna ena hanamoa be edena bamona do ia hanamoa lau?”

33 Iakobo ia gwau, “Oi gwauhamata guna, oiemu vara guna ena hanamoa do oi henia lau dekenai.” Vadaeni Esau ese ia gwauhamata, iena vara guna ena hanamoa be Iakobo dekenai do ia henia, aniani ena davana.

34 Bona Iakobo ese paraoa bona vasiahu ia henia. Vadaeni ia aniani, ia inuinu, gabeai ia toreisi, ia rakatania. Esau ese iena vara guna ena hanamoa, be unai bamona dala dekenai ia negea.

Copyright information for `HMO