Genesis 39

Iosepa bona Potifara ena adavana

Iosepa be Aigupito dekenai idia abia lao. Unuseni Aigupito ena lohia tauna ta, ena ladana Potifara ese Iosepa ia hoia Isamaela taudia dekena amo. Potifara be king Farao ena ruma gimaia taudia edia kapena.

Lohiabada ese Iosepa ia naria noho, unai dainai Iosepa dekenai idia vara gaudia ibounai be namo. Ia ese iena biaguna Aigupito tauna ena ruma dekenai ia noho. Vadaeni iena biaguna ese ia itaia, Lohiabada ese durua ia henia noho Iosepa dekenai, bona iena kara ibounai dekenai anina danu ia havaraia. Potifara ese iena hesiai gaukara ibounai danu ia itaia, ia namo herea. Vadaeni ia ese Iosepa iena ruma naria tauna ia halaoa, iena kohu ibounai naria totona. Vadaeni ruma bona kohu ibounai naria tauna ia halaoa ena dina dekena amo, Lohiabada ese unai Aigupito tauna ia hanamoa Iosepa dainai. Lohiabada ena hanamoa be iena ruma latanai, bona iena uma latanai ia noho. Potifara ese iena kohu ibounai Iosepa ena imana dekenai ia atodia, gau ta dekenai ia laloa lasi, iena aniani iena vairana dekenai idia atoa, unai sibona mo.

Iosepa ena tauanina ia goada, bona iena vairana ena toana, be mero namo herea momokani.
Nega ta iena biaguna ena adavana ese ia ura henia dikadika, vadaeni ia hamaoroa, ia gwau, “Ita mahuta gabu tamona dekenai.”

To Iosepa be ia ura lasi, ia haere henia, ia gwau, “Oi itaia vadaeni, egu biaguna be egu gaukara inai ruma dekenai ia naria noho lasi, iena kohu ibounai lauegu imana dekenai ia atoa vadaeni. Tau ta ese lau ia hereaia lasi inai ruma dekenai, lau dekenai gau ta ia dogoatao lasi, oi sibona mo ia dogoatao, badina oi be iena adavana. Inai kerere badana do lau karaia, bona Dirava ena vairana dekenai inai bamona do lau kara dika be edena bamona?” 10 To hahine be dina ta ta dekena amo Iosepa ena lalona ia ania, gabu tamona dekenai idia mahuta totona, to Iosepa be ia kamonai henia lasi.

11 To dina ta hahine ia raka vareai ruma lalona dekenai, ruma lalonai be tau ta ia noho lasi. 12 Vadaeni hahine ese Iosepa ena dabua dekenai ia dogoatao, ia veria, ia gwau, “Oi mai, gabu tamona dekenai ita mahuta.” To Iosepa ese dabua ia rakatania hahine ena imana dekenai, ruma dekena amo ia heau murimuri dekenai.

13 Hahine ese ia itaia be Iosepa ena dabua ia rakatania iena imana dekenai, vadaeni ia heau ruma murimuri dekenai. 14 Ia ese ruma taudia ia boiridia, ia hamaorodia, ia gwau, “Umui itaia, lauegu adavana ese inai Heberu tauna ia abia dae vadaeni, ita dekenai kavakava henia totona. Ia raka vareai lau dekenai, ia ura ai mahuta gabu tamona dekenai, vadaeni lau boiboi bada herea. 15 Lauegu boiboi ia kamonai neganai, iena dabua be lauegu imana dekenai ia rakatania, ia heau murimuri dekenai.”

16 Hahine ese inai dabua ia dogoatao noho, ela bona Iosepa ena biaguna ia mai. 17 Vadaeni inai sivarai ia hamaoroa, ia gwau, “Inai Heberu tauna oi abia dae iseda ruma dekenai iseda gaukara ibounai durua henia totona, to ia raka vareai, lau dekenai kavakava henia gwauraia. 18 Vadaeni lau boiboi bada herea neganai, iena dabua ia rakatania lau dekenai, ia heau murimuri dekenai.”

19 Iosepa ena biaguna tauna ese iena adavana ena hereva ia kamonai, “Unai Heberu hesiai tauna be inai bamona lau dekenai ia karaia.” Vadaeni ia badu dikadika. 20 Unai neganai Iosepa ena biaguna ese Iosepa ia dogoatao, dibura ruma dekenai ia koua, king ena dibura taudia idia koua gabuna dekenai. Vadaeni unuseni ia noho.

21 Lohiabada ese Iosepa dekenai ia itaia noho, ia bogahisihisi henia, unai dainai dibura ruma naria tauna be Iosepa dekenai ia moale. 22 Vadaeni dibura ruma naria tauna ese dibura taudia ibounai Iosepa ena henuna dekenai ia atodia, dibura gaukara ibounai Iosepa ese ia naria. 23 Dibura ruma naria tauna be gau ta ia laloa lasi, Iosepa ena gaukara dekenai. Badina be Lohiabada ese Iosepa ia itaia noho, bona iena gaukara ibounai dekenai anina ia havaraia.

Copyright information for `HMO