Hosea 6

Taunimanima ese edia lalona idia giroa momokani lasi

Taunimanima idia gwau, “Umui mai, Lohiabada dekenai do ita giroa lou be namo, ani? Ia ese ita ia hadikaia, to ia ese ita do ia hanamoa lou momokani. Ia ese ita ia haberoa vadaeni, to iseda bero be do ia kumia momokani, ani? Dina rua murinai ia ese ita do ia hamatamataia, bona dina ihatoina dekenai, iena vairana dekenai do ita noho namonamo. Namona be Lohiabada do ita diba totona dalana do ita tahua namonamo. Ia be ita dekenai do ia mai momokani, daba rere ia mai momokani bamona. Ia be ita dekenai do ia mai momokani, lahara ena medu ese tano ia hapariparia noho momokani bamona.”

Lohiabada ese taunimanima ia haere henidia

To Lohiabada ia gwau: “Israela bona Iuda e, umui dekenai dahaka do lau karaia? Umui emui lalokau lau dekenai ia noho daudau lasi, daba ena ori ia ore haraga bamona. Emui lalokau ia ore haraga, hanuaboi ena paripari, rei dekenai, be dina ese ia hakaukaua haraga bamona. Unai dainai lau ese egu peroveta taudia umui dekenai lau siaia. Edia hereva dekena amo umui lau kota henia, bona umui lau hadikaia haraga, kevaru bamona. Lau ura umui ese do umui karaia gauna be inai: Lau ura bada umui ese lau do umui lalokau henia nega ibounai, to lau ura lasi boromakau edia boubou do umui karaia. Lauegu ura bada gauna be inai: Lauegu bese be lau do idia diba momokani, to idia ese boubou gaudia idia gabua, be lau ura sisina sibona.”

Ma Lohiabada ia gwau,
“To Adamu ese ia karaia bamona,
idia ese egu gwauhamata taravatuna idia utua.
Lau dekenai idia kara koikoi unai.
Gileada be kara dika taudia edia hanua,
edia aedia atoa gabudia be mai edia rara danu.
Henaoa gwauraia taudia ese,
hunia dekenai dala badinai idia naria noho,
idia raka mai taudia hadikaia bona edia kohu dadia totona.
Inai bamona danu,
hahelagaia taudia ese idia haboua tamona noho,
bona Sekema dala dekenai idia ese taunimanima idia alaia mase noho.
Io, kara dika bada herea idia karaia noho.
10 Israela lalonai gau dika rohorohona ta lau itaia vadaeni.
Egu bese Eparaima taudia ese,
kaivakuku dekenai idia tomadiho henia noho dainai,
idia ese Israela idia hamiroa vadaeni.

11 “Iuda taudia e, umui danu totona dina ta lau gwauraia vadaeni,
unai dina dekenai,
emui dika davana do lau henia.”
Copyright information for `HMO