Hosea 7

Israela ena gabu, Eparaima bona Samaria, edia kara dika bona dagedage

Lohiabada ia gwau,
“Egu bese taudia edia noho namo,
be do lau havaraia lou gwauraia neganai,
Israela do lau hamauria lou gwauraia neganai,
Eparaima ena kara dika ia hedinaraia noho,
bona Samaria ena dika danu.
Badina idia be idia kara koikoi noho.
Henaoa taudia ese edia ruma idia hamakohia noho,
bona dadidadi taudia ese edia ariara dekenai,
taunimanima edia gau idia dadia noho.
To idia laloa lasi,
lau ese edia kara dikadia ibounai lau laloatao noho.
Badina be edia kara dikadia ese,
idia koudia hagegea noho,
vadaeni edia dika idia hedinaraia noho momokani lau dekenai.”

Idia ese edia king idia alaia mase

Ma Lohiabada ia gwau,
“Edia kara dika dekena amo,
idia ese king idia hamoalea noho,
bona edia kara koikoi dekena amo king idia koia noho.
Idia ibounai ese kara koikoi idia karaia,
heudahanai taudia idia karaia bamona.
Idia edia badu be amu ena lahi siahuna bamona.
Paraoa ia gabua tauna ese,
unai lahi be hanuaboi neganai,
ia ese ia hasiahua lasi,
gida sibona idia noho, siahu bada lasi.
To dabai, paraoa be do ia gabua neganai,
ia ese lahi ena siahu do ia habadaia lou.
King ena aria dinana dekenai,
idia ese king bona iena lohia taudia,
dekenai uaina idia henia, idia kekero.
Uaina ena siahu dainai king ia kavakava.
Idia ese king idia kirikirilaia,
bona ia idia hevaseha henia taudia danu,
king ese uaina ia inua hebou.
Io, inai Israela taudia edia palani dikadia dekena amo,
idia be siahu bada, amu ena lahi bamona.
Hanuaboi ena nega ibounai lalonai,
edia badu be gida bamona,
to daba neganai unai badu ia toreisi,
hururu bada ia toreisi haraga bamona.
Edia badu ena siahu dekena amo,
idia ese edia lohia taudia idia alaia mase.
Idia ese edia king taudia,
ta ta ibounai idia alaia mase,
bona edia king ta ese lau dekenai,
durua totona idia noia lasi.”

Israela ese bese dikadia danu ia turana karaia

Lohiabada ia gwau,
“Israela taudia be keke palaka ta,
gabua neganai idia giroa lasi bamona.
Israela taudia ese bese idauidau danu idia turana karaia.
Idia ese idau bese taudia idia abidadama henia dainai,
edia goada idia maragi lao noho,
to idia diba lasi.
Israela taudia edia dina be idia ore lao noho,
buruka taudia bamona,
to idia diba lasi.
10 Israela taudia edia hekokoroku,
ese edia dika ia hedinaraia noho.
To idia ese lau, Lohiabada,
edia Dirava dekenai idia giroa mai lasi.
Dika momo ia vara vadaeni,
to idia ese lau idia tahua lasi.

11 “Israela be pune manu bamona,
ia kavakava,
bona mai ena lalona lasi,
badina Israela ese Aigupito ena durua totona ia boiboi henia,
bona unai murinai Asuria ena durua totona Israela ia heau lao.
12 To idia heau lao neganai,
lau ese reke ta do lau atoa,
bona reke lalonai do lau abidia,
manu idia abia bamona.
Edia kara dika ena davana,
idia dekenai do lau henia.
13 Idia madi, dika do idia davaria!
Idia ese lau idia rakatania,
bona lau dekenai idia dagedage.
Bese ta ese idia do ia hadikaia ore.
Lau ura idia do lau hamauria,
to dala lasi, idia ese,
egu ladana idia hadikaia dainai.
14 Idia ese mai edia kudoudia danu,
lau dekenai idia guriguri lasi,
to idia be tano dekenai idia moru,
bona idia tai mai boiboi danu,
Dirava diba lasi taudia idia karaia bamona.
Uiti bona uaina totona idia noia neganai,
edia kopina idia utua bona kakasia noho,
Dirava diba lasi taudia bamona.
Momokani idia ese lau idia dagedage henia noho.
15 Lau ese idia lau hadibaia,
bona idia lau hagoadaia,
to idia ese lau hadikaia dalana idia laloa noho.
16 Idia ese Bala dirava dekenai,
idia tomadiho henia noho.
Idia be koikoi pevana bamona.
Edia lohia taudia be mai dagedage,
bona mai hekokoroku danu idia hereva noho dainai,
idia be tuari kaia dekena amo do idia mase.
Bona Aigupito taudia ibounai ese,
unai lohia taudia do idia kirikirilaia.”
Copyright information for `HMO