Isaiah 11

Iese dekena amo Rigi ta do ia mai

Iese ena bese taudia,
be au ena badina,
idia utua diho gauna bamona.
Inai badina dekena amo,
herahera matamata do ia tubu,
bona Iese ena ramu dekena amo, Rigi ta do ia tubu,
King matamatana ta unai.
Lohiabada ena Lauma ese, ia dekenai do ia kamokau.
bona inai bamona do ia hanamoa:
Aonega bona laloa kehoa ena Lauma do ia henia.
Sisiba namona henia dalana,
bona siahu ena Lauma do ia henia,
Diba maorona,
bona Lohiabada gari henia kara,
ena Lauma be do ia henia.
Mai moale bada danu,
ia ese Lohiabada ena ura do ia karaia.

Iena kota biaguna kara,
be do ia maoromaoro momokani,
taunimanima edia toana dekenai lasi,
bona ia kamonai hereva sibona lasi.
To ogogami taudia be mai maoromaoro danu,
do ia kota henidia.
bona manoka taudia idia hisihisi henia taudia,
be ia ese do ia panisidia.
Taunimanima edia kerere davana,
be ia ese do ia gwauraia,
bona ia oda neganai,
kara dika taudia do idia mase.
Iena Basileia taudia be do ia gunalaia,
mai maoromaoro bona momokani danu.

Uda sisia bona mamoe,
be do idia noho hebou mai maino danu,
bona taiga be nanigosi danu do idia hekure hebou.
Boromakau natuna bona laiona natuna be do idia aniani hebou.
bona taunimanima ena natuna maragina ta ese do ia hakaudia.
Boromakau hahine bona bea,
be do idia aniani hebou.
Edia natudia do idia hekure hebou mai maino danu.
Laiona ese rei kakoro do ia ania,
boromakau ese ia ania bamona.
Rata ia inua merona,
be gaigai ena guri latanai do ia gadara,
bona mero ese gaigai koremana ena guri lalonai,
iena imana do ia toia vareai.
Siona, Dirava ena ororo helagana dekenai,
dika ta, o hadikaia gauna ta do ia noho lasi.
Badina be tanobada ibounai,
be Lohiabada ena diba maoro dekena amo do ia honu momokani,
davara be ranu dekenai ia honu bamona.

Do mauri noho Israela taudia do idia giroa mai

10 Unai dina dekenai, Iese ena Ramuna, King matamatana unai, be bese ibounai taudia ese do idia tahua. Ia be do ia gini, bese ibounai edia pepe, bona bese idauidau taudia ese ia dekenai do idia haboua. Iena noho gabuna be do mai hairaina momokani.

11 Unai dina dekenai, Lohiabada ese nega iharuana dekenai, iena siahu dekena amo, iena bese taudia, do mauri noho taudia, do ia abidia mai lou, Asuria, Aigupito, Pataro, Etiopia, Elama, Babulonia, Hamata bona kone kahana gabudia dekena amo.

12 Ia ese pepe ta do ia abia isi,
bese idauidau taudia ese,
iena kara do idia itaia totona.
Bona ia ese Israela bona Iuda taudia,
tano idauidau dekenai hesiai mai guia danu karaia taudia,
do ia haboua lou.
Unai neganai Lohiabada ese,
unai Israela bona Iuda taudia do ia mailaia lou edia gabu dekenai.
13 Bona unai neganai,
Israela taudia ese Iuda taudia do idia mama henia lou lasi.
Iuda taudia ese danu Israela do idia ura tuari henidia lou lasi.
14 Idia ruaosi do idia haboua,
Pilistia taudia do idia tuari henidia, dina diho kahanai.
Bona idia ruaosi ese,
dina ia daekau kahana taudia do idia halusia.
Idia ese Moaba bona Edoma taudia dekena amo do idia kwalimu,
bona Amono taudia ese,
Israela bona Iuda taudia edia oda do idia kamonai henia.
15 Lohiabada ese Aigupito ena Davara Kakakaka do ia hakaukaua,
bona lai siahuna do ia siaia,
Euperate Sinavai danu do ia hakaukaua.
Lohiabada ese Euperate Sinavai do ia hamakohia,
vadaeni sinavai maragidia 7 do idia halaoa,
taunimanima ese idia raka hanaia haraga diba gaudia.
16 Bona Asuria dekena amo,
laolao dalana namona do idia karaia,
vadaeni Israela taudia unuseni do noho,
be edia gabu korikori dekenai do idia raka mai,
mai hekwarahi lasi.
Unai be gunaguna,
Israela taudia ese Aigupito idia rakatania neganai bamona.
Unai neganai danu,
idia durua totona Lohiabada ese,
edia lou mai dalana do ia kehoa.
Copyright information for `HMO