Isaiah 28

Isaia ese mirigini kahana ia noho basileia, Israela, ia sisiba henia

Israela basileia be do ia dika momokani! Israela ena gunalaia taudia idia kekero momo dainai, edia kwarana dekenai idia noho herahera, be idia dika lao noho. Israela ena hairai danu be unai bamona ia dika lao noho. Io, unai gunalaia taudia edia kwarana be mai bonana namo muramura, bona idia be mai hekokoroku danu, to idia hekure, mase bamona, idia kekero momokani dainai. Kamonai! Lohiabada dekenai goada bona siahu tauna ta ia noho, ia ese Israela do ia tuari henia. Ia be do ia mai haraga, medu, aisi nadidia bamona, medu bada, mai abata bada danu bamona, bona Israela tano do ia halusia momokani.

Unai kekero gunalaia taudia mai edia hekokoroku, be tuari taudia ese edia aena dekenai do idia moia diho.

Unai gunalaia taudia edia hairai, ia dika lao noho gauna, be do ia ore haraga, fig huahua matamata, idia mage guna gaudia, idia ania haraga bamona.

To dina ta do ia mai, Siahu Ibounai Lohiabada be kwara herahera gauna mai hairaina bada danu do ia lao. Oibe, iena bese taudia, iena matakani dekenai idia mase lasi taudia edia vairanai, Lohiabada be do ia hairai herea momokani. Lohiabada ese kota biaguna taudia dekenai laloa maoromaoro bona laloa momokani do ia henia. Bona ia ese tuari taudia do ia hagoadaia, idia ese hanua badana ena magu iduara do idia gimaia, mai boga auka danu.

Isaia ese Iuda ena kekero peroveta taudia ia gwau henia

Peroveta taudia bona hahelagaia taudia danu be muramura idia inua dainai idia kekero, bona idia raka namonamo diba lasi. Idia be uaina bona bia momo idia inua dainai, idia moru kava bona idia laloa daradara. Peroveta taudia be idia kekero dainai, Dirava ese idia dekenai ia siaia mata hanai edia anina idia diba lasi. Bona hahelagaia taudia be kekero dainai, taunimanima edia hepapahuahu idia hamaoromaoroa diba lasi. Edia aniani patadia ibounai be mumuta dekenai idia dika, bona mumuta dainai, goeva gabuna ta ia noho lasi.

Idia ese lau idia maumauraia, idia gwau, “Isaia ese daika ia hadibaia gwauraia? Daika ese iena hadibaia hereva ia ura henia? Iena hadibaia hereva be memero maragidia sibona totona, varani sibona rata idia negea maragidia totona! 10 Isaia ese sisina, sisina, dekena amo ita ia hadibaia. Ia be iniseni gau maragina ta, unuseni gau maragina ta, ia hadibaia noho, ela bona ita hesiku momokani.”

11 Vadaeni, bema lau Isaia dekenai do umui kamonai lasi neganai, Dirava ese idau gado idia hereva taudia do ia siaia, bona idia dekena amo, umui do ia hadibaia.

12 Lohiabada ese laga-ani bona mauri namona umui dekenai ia henia gwauraia, to umui ese ia dekenai umui kamonai lasi.

13 Unai dainai Lohiabada ena hereva umui dekenai be sisina sisina dekena amo, hadibaia hereva maragidia dekena amo, iniseni gau maragina ta, unuseni gau maragina ta. Bona unai neganai, umui raka gwauraia neganai, do umui moru kava, moru kava. Bero do umui davaria, tarapu lalonai do umui moru, bona tuari taudia ese umui do idia dogoatao, umui do idia guia.

Dirava ese Siona dekenai ruma ena kona nadina do ia atoa

14 Vadaeni, umui hekokoroku taudia, Ierusalema dekenai Iuda besena umui gunalaia taudia e, Lohiabada ena hereva do umui kamonai: 15 Mai hekokoroku danu umui hereva, umui gwau, “Ai be mase danu ai gwauhamata vadaeni, bona mase gabuna danu ai laloa tamona vadaeni.” Umui gwau nega dika ia ginidae neganai do umui mase lasi, badina be umui ese koikoi bona kara maoromaoro lasi umui abidadama henia, idia ese umui do idia hamauria momokani, umui gwau.

16 Unai dainai Lohiabada, Dirava Momokani ia hereva, ia gwau:

“Lau ese Siona dekenai ruma ena badina nadi goadana ta do lau atoa. Do ia abidadama henia tauna, be do ia laloa daradara lasi.
17 Lau ese kota maoromaoro do lau havaraia, ia be ruma ena badina tohoa varona bamona do ia lao. Bona kara maoromaoro do lau havaraia, ia be ruma ena du do idia gini maoromaoro ena levolo bamona do ia lao.

“Medu, aisi nadidia bamona ese umui emui hereva koikoi, umui abidadama henia gauna, do ia hadikaia ore. Bona abata bada ese emui goada kava do ia haorea momokani.

18 “Vadaeni mase danu umui karaia gwauhamata be do ia ore,
bona mase gabuna danu umui karaia laloa tamona be do ia gini lasi.
Bona nega dika be abata bamona do ia diho mai neganai,
ia ese umui do ia moia diho,
bona umui do ia hadikaia momokani.
19 Inai dika ese,
umui do ia botaia lou, botaia lou,
badina be daba ta ta ibounai,
inai dika do ia vara, abata bamona.
Dina lalonai bona hanuaboi lalonai danu do ia vara.”

Inai Dirava ena sisiba hereva ese,
gari bada do ia havaraia umui dekenai.
20 Umui be tau ta bamona,
iena mahuta patana be kwadogi herea,
bona ia hekure maoromaoro diba lasi.
Bona iena bilankesi ena lababana be hegeregere lasi dainai,
sibona ia koua namonamo diba lasi.
21 Badina be Lohiabada ese,
do ia toreisi, bona do ia tuari,
Perasimi Ororo dekenai ia tuari hegeregerena.
Bona do ia badu,
Gibeona Koura dekenai ia badu hegeregerena.
Inai bamona do ia karaia,
iena gaukara karaia totona,
iena gaukara be idau.
Momokani inai bamona do ia karaia,
iena gaukara karaia totona,
iena gaukara be idau.
22 Unai dainai egu sisiba hereva,
be do umui kirikirilaia lasi,
Dirava ese emui matakani do ia habadaia garina,
badina be lau ese,
Siahu Ibounai Lohiabada ena hereva lau kamonai vadaeni.
Ia gwau ia ese emui tano ibounai do ia hadikaia ore.

Dirava ena aonega

23 Emui taiadia do umui kehoa,
egu hereva do umui kamonai.
24 Biru tauna ese tano do ia geia lou,
geia lou nega ibounai, a?
Ia ese tano ia hamakohia,
bona geia noho nega ibounai, a?
25 Lasi, to ia ese tano ena kopina ia hamanadaia neganai,
ia ese aniani ava gaudia ia hadoa noho,
bona edia laini ta ta dekenai,
ia ese uiti bona bali uhedia ia hadoa noho,
bona uma ena isedia dekenai,
aniani uhedia haida danu ia hadoa noho.
26 Iena gaukara karaia dalana ia diba namonamo,
badina iena Dirava ese ia hadibaia noho.

27 Unai tau ese aniani avadia,
be uiti kwadia auna dekena amo ia kwadia noho lasi,
bona treila ena uili be edia latanai ia keia hanaia lasi,
to au maragina dekena amo idia ia kwadia noho.
Au severasevera dekena amo,
ia ese unai aniani avadia ia kwadia noho.
28 Paraoa karaia totona,
uiti idia moia diho noho.
Unai dainai unai tau ese,
uiti ia kwadia lou noho,
kwadia lou noho lasi.
Momokani ia ese iena treila ena uili,
be uiti ena latanai ia veria hanaia,
to iena hosi ese uiti idia moia lasi.
29 Inai aonega ibounai,
be Siahu Ibounai Lohiabada dekena amo ia mai noho.
Dirava ese ia karaia palani ibounai be mai aonega danu,
bona iena palani be nega ibounai,
edia anina idia vara namo herea.
Copyright information for `HMO