Isaiah 46

Lohiabada sibona be goada, dirava koikoidia be anina lasi

Lohiabada ia hereva, ia gwau,
“Babulonia taudia edia dirava edia dokona be inai!
Bela bona Nebo dirava,
be guna Babulonia taudia ese idia tomadiho henidia,
to hari idia be doniki edia doruna dekenai idia kwatua noho.
Doniki be idia manoka bona hesiku,
to idia ese unai kaivakuku edia metau idia huaia noho.
Oibe, Babulonia taudia edia dirava koikoi edia dokona be inai,
badina be unai kaivakuku ese,
idia sibona idia hamauria diba lasi.
Idia be idia guia noho taudia ese idia abia lao noho.

“Iakobo ena tubuna taudia e,
umui do mauri noho Israela taudia e,
umui vara dinadia ia mai bona hari,
lau ese umui lau naria.
Lau be emui Dirava,
bona lau ese umui do lau naria noho,
ela bona umui be buruka,
bona emui huina idia kurokuro.
Lau ese umui lau karaia,
bona umui do lau naria.
Lau ese umui do lau durua,
bona umui do lau hamauria.

“Umui emui vairana dekenai,
daika be lau danu ia hegeregere?
Daika ena mauri be lauegu mauri danu ia hegeregere?
Taunimanima ese edia puse idia kehoa,
bona golo idia abia.
Idia ese sikele dekenai siliva ena metau idia abia.
Idia ese golo ia gaukaralaia tauna idia hamaoroa,
dirava ta do ia karaia.
Unai neganai unai dirava dekenai idia tomadiho henia!
Idia ese unai dirava be edia pagana dekenai idia atoa,
idia huaia lao.
Iena gabuna dekenai unai dirava idia atoa,
ia gini unuseni.
To ia sibona ia marere diba lasi,
unai gabu ia rakatania diba lasi.
Bema tau ta ia guriguri henia neganai,
ia haere diba lasi,
bona ia ese unai tau ia hamauria diba lasi dika dekena amo.

“Umui kerere taudia e,
lauegu kara do umui laloaboio lasi.
Lau ese lau karaia vadaeni karadia do umui laloa noho.
Gunaguna idia vara gaudia do umui laloatao,
bona do umui gwauraia,
lau sibona be Dirava,
bona do umui gwauraia hedinarai,
dirava idauna ta,
lau hegeregerena ta ia noho lasi.
10 Hamatamaia neganai lau ese dokona lau gwauraia.
Gunaguna momokani lau ese,
dahaka do ia vara lau gwauraia guna.
Lau gwau lauegu ura,
lauegu palani, be do ia gini noho,
do ia moru lasi.
Lau ura karaia gaudia ibounai be do lau karaia.
11 Lau ese tau ta lau boiria noho,
dina daekau kahana dekena amo do ia mai.
Ia ese ugava manu bamona do ia diho mai,
bona lau ese lau palani guna karadia be ia ese do ia karaia.
Lau hereva vadaeni, bona lauegu hereva gauna be do ia vara.
12 Umui laloa auka taudia e,
umui laloa emui kwalimu dalana be daudau herea.
Lauegu hereva do umui kamonai!
13 Lau ese emui kwalimu dinana lau mailaia noho,
ia be daudau lasi.
Lauegu kwalimu be kahirakahira ia ginidae.
Lau ese Ierusalema do lau hamauria.
Bona lauegu hairaina be Israela dekenai do lau henia.”
Copyright information for `HMO