Isaiah 49

Lohiabada ena Hesiai Tauna be bese idauidau edia diari

Daudau dekenai umui noho besedia,
umui gabu daudau umui noho taudia e,
lau be do lau vara lasi neganai,
Lohiabada ese lau ia abia hidi,
bona lau dekenai ladana ia henia.
Lohiabada ese egu hereva ia hanamoa,
idia be mai edia matana,
tuari kaia bamona.
Ia sibona ena imana dekena amo lau ia naria namonamo.
Peva ena diba bamona lau ia halaoa,
diba mai matana bamona lau ia halaoa,
ia gaukaralaia diba gauna.
Lau dekenai ia hereva, ia gwau,
“Israela e, oi be egu hesiai tauna.
Oi dainai, taunimanima ese lau do idia hanamoa.”
To lau gwau,
“Lau ese lau gaukara kava!
Lau ese egu goada lau haorea kava,
lau be anina lasi.”
To lau ese Lohiabada lau abidadama henia diba,
ia ese lau do ia durua.
Bona ia ese egu gaukara ena davana,
be lau dekenai do ia henia.

Lau be do lau vara lasi neganai,
Lohiabada ese lau ia abia hidi.
Ia ese iena Hesiai Tauna lau ia halaoa,
lau ese iena taudia do lau hakaua lou totona.
Ia ura Israela taudia,
idia boio taudia,
be do lau hakaua lou.
Lohiabada ese iena mataurai lau dekenai ia henia noho.
Lohiabada be egu goada ena badina.
Lohiabada ese lau dekenai ia hereva, ia gwau,
“Momokani oi be lauegu Hesiai Tauna,
bona idia do mauri noho Israela taudia,
edia ladana bada do oi abia isi lou.
To lau ese gaukara badana ma ta oi dekenai lau henia inai:
Oi be idau bese, Iuda lasi bese taudia,
edia diari do oi lao,
vadaeni oi dekena amo,
tanobada ibounai ese egu mauri do idia davaria.”

Israela ena Dirava Helagana bona Hamauria Tauna ese,
inai bamona ia hereva,
idia badu henia noho Tauna dekenai,
bese idauidau ese idia ura henia lasi Tauna dekenai,
lohia taudia edia Hesiai Tauna dekenai:
Dirava ia gwau,
“Oi idia itaia neganai,
king taudia be do idia toreisi,
bona oi do idia matauraia.
King ena natuna taudia danu,
be oi idia itaia neganai,
idia ese oi dekenai do idia tui diho,
oi do idia hanamoa.
Inai bamona do ia vara,
badina lau, Lohiabada ese,
oi lau abia hidi vadaeni,
egu hesiai gaukara do oi karaia,
bona lau, Israela ena Dirava Helagana ese,
egu gwauhamata lau badinaia noho.”

Lohiabada ese ia gwauhamata, Siona do ia haginia lou

Lohiabada ese iena bese taudia ia hamaoroa, ia gwau,
“Umui do lau hamauria dinana ia ginidae neganai,
lau ese umui do lau durua,
bona umui be durua totona umui boiboi neganai,
umui dekenai do lau haere.
Lau ese umui do lau naria,
bona umui dekena amo lau ese,
bese idauidau ibounai danu gwauhamata do lau karaia.
Lau ese emui tano,
idia hadikaia vadaeni tano do lau hanamoa lou,
vadaeni do umui noholaia lou.
Lau ese dibura rumai idia noho taudia do lau hamaoroa,
‘Emui dala lau kehoa inai,
guia dekena amo umui raka siri!’
Bona dibura lalonai idia helai taudia do lau hamaoroa,
‘Umui mai,
diari lalonai do umui raka!’

“Idia be dala ena badinai do idia aniani.
Idia be mamoe bamona,
ororo dekenai rei idia ania totona do idia lao.
10 Idia be do idia hitolo o ranu mase lasi.
Dina bona tano kaukau gabuna ena siahu ese,
idia do ia hadikaia lasi,
badina be idia ia lalokau henia tauna,
ese do ia hakaudia.
Ranu namona gabudia badinai ia ese do ia hakaudia.
11 Lau ese dala badana do lau karaia,
ia ese egu ororo ibounai do ia hanaia.
Vadaeni inai laolao dalana dekenai,
egu bese taudia do idia raka.
12 Egu bese taudia be daudau gabudia dekena amo do idia mai.
Mirigini kahana,
bona dina diho kahana danu,
dekena amo do idia mai.
Bona haida danu be Asiwana,
diho kahana dekena mao do idia mai.”

13 Guba e, moale ane do umui abia!
Tanobada e, mai moale danu do umui boiboi!
Ororo e, ane do umui abia isi momokani!
Badina be Lohiabada ese iena bese taudia do ia durua.
Ia ese iena bese taudia,
idia hisihisi noho bese,
do ia bogahisihisi henia.

14 To Ierusalema taudia idia gwau,
“Lohiabada ese ita ia rakatania vadaeni!
Ia ese ita ia laloaboio vadaeni!”

15 Vadaeni Lohiabada ese ia haere, ia gwau,
“Be, hahine ta ese iena natuna maragina ia laloaboio diba, a?
Iena bogana dekena amo ia havaraia merona,
be do ia bogahisihisi henia lasi, a?
Io, sedira sinana ta ese iena natuna maragina ia laloaboio diba,
to lau ese umui do lau laloaboio lasi momokani.
16 Ierusalema e, lau ese oi do lau laloaboio diba lasi.
Lau ese oiemu ladana,
be egu imana palapala dekenai lau torea vadaeni.”
17 Lohiabada ese inai bamona ia hereva, ia gwau,
“Ierusalema e,
oi do idia haginia lou taudia be kahirakahira idia mai,
bona oi idia hadikaia taudia,
be oi dekena amo do idia raka siri.
18 Oiemu matana do oi negea, do oi itaia,
oiemu bese taudia idia haboua noho,
edia gabu korikori dekenai idia giroa mai noho!
Lau be Mauri Diravana momokani hegeregerena,
oi be oiemu bese taudia dainai do oi heagi,
headava matamata hahine ese,
iena herahera gaudia dainai ia heagi bamona.

19 “Oiemu tano be momokani idia hadikaia,
aniani lasi tanona idia halaoa,
to harihari inai tano,
be oiemu noho taudia totona do ia maragi.
Idia mai noho taudia,
oiemu bese taudia,
be momo herea dainai,
idia be hegeregere lasi inai tano maragina lalonai do idia noho.
Bona oi idia hadikaia vadaeni taudia,
be oi dekena amo daudau do idia noho.
20 Oiemu bese taudia momo,
be unai idia guia tanona dekenai madi idia vara.
Idia ese dina ta oi dekenai do idia hamaoroa, do idia gwau,
‘Inai tano be maragi herea.
Ai ura tano ma haida do ai abia,
do ai noholaia totona!’
21 Unai hereva oi kamonai neganai,
sedira inai bamona do oi laloa:
‘Ia, inai natuna momo be daika ese lau totona idia havaraia?
Egu natuna idia boio vadaeni,
bona ma haida lau havaraia diba lasi.
Lau be tuari taudia ese lau idia abia mauri,
edia tano dekenai lau idia doria lao.
Inai natuna momo be daika ese idia hatubua daekau?
Lau be sibona lau noho.
Inai natuna be edena gabu dekena amo idia mai?’ ”

22 Lohiabada Dirava be iena bese dekenai ia hereva, ia gwau,
“Kamonai!
Egu imana do lau duduia Iuda lasi bese taudia dekenai,
bona idia ese emui natuna umui dekenai do idia mailaia.
23 King taudia be emui tamana taudia hegeregere do idia lao.
Kwini be emui sinana hegeregere do idia lao.
Idia ese emui vairana dekenai do idia tomadiho,
bona umui do idia matauraia.
Idia be mai manau danu umui do idia hanamoa.
Unai neganai do umui diba,
lau sibona be Lohiabada.
Bona lau dekenai ia naria tauna,
be tau ta ese do ia hahemaraia diba lasi.”

24 Tuari tauna ia kwalimu murinai,
ia ese ia henaoa kohuna be ia dekena amo oi abia diba, a?
Lohia dagedage tauna ese ia guia vadaeni taudia ta,
oi ruhaia diba, a?

25 Lohiabada ese ia haere, ia gwau,
“Inai oi gwau idia karaia diba lasi gaudia,
be lau ese momokani do lau havaraia!
Tuari tauna ena guia taudia,
be haida ese do idia abia lao.
Bona lohia dagedage tauna ese tuari dekena amo ia abia kohu,
be haida ese do idia dogoatao.
Badina be umui dekenai idia tuari henia taudia,
be lau ese do lau tuari henidia,
bona lau ese emui natudia do lau hamauria.
26 Umui dekenai idia dagedage taudia be do lau hadikaia,
vadaeni idia ta ta sibona dekenai do idia alaia.
Idia be do idia kekero bamona,
vadaeni idia sibona edia orea taudia do idia badu henia,
do idia alaia mase.
Unai neganai taunimanima ibounai,
be do idia diba lau be Lohiabada.
Lau ese umui lau hamauria,
bona umui lau ruhaia noho.
Do idia diba lau be Israela ena Dirava mai siahuna.”
Copyright information for `HMO