Isaiah 55

Dirava ese iena davana lasi bogahisihisi be taunimanima ibounai dekenai ia henia gwauraia

Lohiabada ia hereva, ia gwau,
“E, umui ranu mase taudia e, umui mai,
ranu ia noho inai!
Umui moni lasi taudia e, umui mai,
koni umui hoia, bona ania.
Umui mai, uaina bona rata umui hoia.
Ena davana be lasi momokani!
Badina dahaka emui moni umui negea kava noho,
mai ena anina lasi gauna totona?
Badina dahaka emui gaukara ena davana moni umui negea,
to umui hitolo noho?
Lau dekenai do umui kamonai,
bona lauegu hereva do umui karaia.
Unai neganai aniani namo herea momokani do umui moalelaia.

“Lauegu hereva do umui kamonai,
bona lau dekenai do umui mai!
Lau dekenai do umui mai,
vadaeni emui lauma do ia mauri!
Lau ese noho hanaihanai gwauhamata taravatuna umui danu do lau karaia.
Bona Davida dekenai lau gwauhamata do lau henia hanamoa,
be umui dekenai do lau henia.
Lau ese Davida lau abia hidi,
bona gunalaia tauna, bona bese idauidau edia lohia lau halaoa.
Bona Davida dekena amo,
egu siahu badana bese idauidau dekenai lau hedinaraia.
Bona hari umui danu ese,
bese idauidau, umui diba lasi besedia, do umui boiria,
vadaeni idia be do idia heau mai umui dekenai,
umui danu do idia haboua totona!
Lau, Lohiabada, emui Dirava,
Israela ena Dirava Helagana,
ese inai kara ibounai do lau havaraia.
Lau ese hanamoa bona hairai umui dekenai do lau henia.”

Lohiabada do umui tahua,
umui do davaria diba neganai.
Ia dekenai do umui noinoi,
ia be do kahirakahira ia noho neganai.
Kara dika taudia ese edia dala do idia rakatania,
bona edia laloa dikadia do idia rakatania danu.
Namona be Lohiabada, iseda Dirava dekenai idia giroa lou.
Badina Lohiabada be mai ena bogahisihisi,
bona ia ese dika do ia gwauatao momokani.

Lohiabada ia gwau,
“Lauegu laloa be emui laloa bamona lasi,
bona egu dala be emui dala bamona lasi.
Badina guba be tanobada ena ataiai daudau herea hegeregerena,
lauegu dala be emui dala edia ataiai idia noho,
bona egu laloa be emui laloa edia ataiai idia noho.

10 “Lauegu hereva be sinou bona medu bamona.
Guba dekena amo idia diho mai,
tanobada idia hapariparia totona.
Idia ese uiti bona koni idia hatubua daekau.
Ma uhe idia havaraia noho, hadohado totona,
bona taunimanima do idia ania totona danu.
11 Inai bamona danu,
lau ese lau gwauraia hereva,
be anina do ia havaraia,
bona lau dekenai do ia giroa kava lasi.
Lau siaia totona gaukarana be do ia karaia momokani.

12 “Umui ese mai moale danu Babulonia do umui rakatania.
Mai maino danu umui do lau hakaua.
Umui emui vairana dekenai,
ororo badadia bona maragidia ese,
ane do idia abia,
bona au ibounai be,
mai moale bada danu do idia boiboi.
13 Au ginigini idia noho gabudia dekenai,
saipresi audia do idia vara,
bona ava ginigini idia noho gabudia dekenai,
raurau momo audia do idia vara.
Inai be do ia noho hanaihanai ena toa ta do ia lao,
vadaeni umui itaia negadia ibounai,
lau Lohiabada ese lau karaia vadaeni gaudia do umui laloa.”
Copyright information for `HMO