Jeremiah 1

Inai buka lalonai, be Ieremia, Hilekaia ena natuna ena hereva. Hilekaia be Anatoto hanua ena hahelagaia tauna ta. Anatoto hanua be Beniamina ena tano dekenai. Lohiabada ese Ieremia dekenai ia hereva henia, Iosaia Amono be Iuda ena king lagani 13 neganai. Bona gabeai, Lohiabada ese Ieremia dekenai ia hereva henia lou, Iehoiakimi Iosaia be Iuda ena king neganai. Unai murinai Lohiabada ese ia hereva henia nega momo, ela bona Sedekaia Iosaia, Iuda ena king ena lagani namba 11 lalonai. Unai lagani namba 11 ena hua namba 5 lalonai, Ierusalema hanua taudia be tuari taudia ese idia guia, idia abidia lao idau tano ta dekenai.

Lohiabada ese Ieremia ia boiria

Lohiabada ese lau, Ieremia, dekenai ia hereva, ia gwau, “Do oi vara lasi neganai, lau ese oi lau abia hidi. Oi be do oi mauri lasi neganai, oi lau hahelagaia. Lau ese peroveta dagi oi dekenai lau henia, bese idauidau dekenai.”

Vadaeni lau gwau, “Lohiabada Dirava e, lau be hereva dalana lau diba lasi, lau be mero sibona.”

To Lohiabada be lau dekenai ia haere, ia gwau, “Do oi hereva lasi, ‘Lau be mero sibona,’ badina be lau ese taunimanima dekenai oi do lau siaia, bona oi be idia dekenai do oi lao. Bona oi dekenai lau henia hereva ibounai be idia dekenai do oi hamaoroa. Idia dekenai do oi gari lasi, badina lau be oi dekenai do lau noho, bona lau ese oi do lau naria. Lau, Lohiabada lau hereva inai.”

Unai neganai Lohiabada ese iena imana lauegu uduna dekenai ia atoa, ia gwau, “Kamonai! Lau ese egu hereva oiemu uduna dekenai lau atoa inai. 10 Hari dina lau ese oi dekenai siahu lau henia, bese idauidau bona basileia idauidau edia latanai. Oi ese idia do oi kokia, do oi veria diho, do oi hadikaia, do oi haorea, do oi haginia, bona do oi hadoa.”

Mata hanai rua

11 Lohiabada ese lau ia nanadaia, ia gwau, “Ieremia e, dahaka oi itaia?” Lau haere, lau gwau, “Lau ese alamono au ena rigi ta lau itaia.”

12 Lohiabada ia gwau, “Oi hereva maoro, bona lau ese lau itaia noho, badina lau ura egu hereva gauna be momokani do ia vara.”

13 Vadaeni Lohiabada ese lau dekenai ma ia hereva lou, ia gwau, “Ma dahaka oi itaia?”

Lau haere, lau gwau, “Lau ese uro ta ia boila noho, mirigini kahana dekenai lau itaia. Bona uro ena ranu siahu be inai kahana dekenai ia bubua mai gwauraia.”

14 Lohiabada ese lau dekenai ia hereva, ia gwau, “Mirigini kahana dekena amo dika be do ia bubua mai, inai tano idia noho taudia ibounai edia latanai. 15 Badina be mirigini kahana idia noho bese ibounai lau boiria mai noho. Idia edia king taudia ese edia terona Ierusalema ena magu iduara bona ena magu edia vairanai do idia haginia. Edia terona haida danu be Iuda hanua ibounai dekenai do idia haginia hagegea.

16 “Lauegu bese taudia dekenai matakani do lau henia edia kara dika dainai. Idia ese lau idia rakatania, idau dirava dekenai boubou idia henia, bona kaivakuku idia karaia, bona idia tomadiho henidia vadaeni.

17 “Ieremia e, do oi hegaegae! Do oi toreisi, bona lau ese oi dekenai lau oda herevadia ibounai, be idia dekenai do oi hamaoroa. Bona idia dekenai do oi gari lasi, gabeai idia edia vairanai oi noho neganai, lau ese oi do lau hagaria garina. 18 Ieremia e, oi kamonai! Lau ese oi do lau hagoadaia, vadaeni do oi gini goada, hanua mai ena kohoro goadana, mai ena auri dudia bona mai ena auri laboralabora magudia bamona. Unai dainai Iuda ena king taudia, king edia opesa, hahelagaia taudia, bona taunimanima ibounai be hegeregere lasi oi do idia halusia. 19 Inai taudia ibounai ese oi do idia heai henia, to idia ta ese oi do ia halusia lasi. Badina be, lau be oi dekenai lau noho, bona oi do lau durua. Lau Lohiabada lau hereva inai.”

Copyright information for `HMO